Трамп е решен до крајот на мандатот да изгради Златна купола од стотици милијарди долари за да ги заштити САД, па и Канада од напад со проектили. Тоа го планираше и Реган со Војната на ѕвездите пред речиси половина век, но немаше соодветна технологија. Русија и Кина предупредуваат дека првото поставување оружје во вселената може да предизвика нова трка во вооружување.

Десетици милиони луѓе низ светот сè уште не се опоравиле од ковид, дури и пет години откако се разболеле. Ново истражување открило дека пациентите со континуирано замаглување на умот како последица на болеста имаат повисоко ниво на воспаление на мозокот, поголем стрес, когнитивни тешкотии и дале значително пониски оценки за квалитетот на животот и благосостојбата. 

Децата во Британија учат дека Црни Британци го изградиле Стоунхенџ или дека римскиот цар Нерон се оженил за трансродова жена, без да им се објасни дека Спорус бил насилно кастриран млад роб. Учебници со вакви спорни содржини претставени како факти биле воведени во бранот на „будењето“, но затоа биле исфрлени лекциите за историските битки кај Ватерло и Трафалгар.

Од изјавите на Трамп и Путин за нивниот разговор може да се заклучи дека се слушале преку „расипан телефон“. Првиот вели дека мировни преговори „само што не почнале“, другиот дека ќе се преговара дали воопшто ќе се преговара. Коментарите се дека и едниот и другиот повеќе мислеле на сопствените агенди и на билатералните односи отколку како навистина да запре војната во Украина.

Од симбол за слобода автомобилот се претвори во тројански коњ. Будно следи, бележи и анализира сè што се случува во кабината. Тој е џиновски USB стик со тркала, што несвесно го храните со податоци, од лозинки до отчукувања на срцето. Досиејата ги продава на сообраќајната полиција, осигурителни компании, корпоративни клиенти, огласувачи. Невозможно е да ги избришете трагите.

Во време кога не можеме да излеземе на крај со глобалното затоплување, освежувачки делува научното откритие дека се движиме кон уште едно ледено доба. Така барем покажуваат анализите од поместувањата на орбитата на Земјата околу Сонцето, кои варираат низ времето и се одразуваат на климата. Но, не брзајте да купувате топла облека. Ќе треба да почекаме уште барем 10.000 години.

САД се најголемата машина за задолжувања и трошоци. Најновиот месечен извештај на Министерството за финансии донесе ретко изненадување. Буџетски суфицит и тоа втор според износ во историјата. Дали тоа значи дека планот на претседателот Трамп функционира? Тарифите скромно помогнале, но еден добар месец не може да ја пополни големата дупка во буџетот.

Пред едно пет години, крајно навивачки посакувавме главиот лик од урнебесно ненормалната Нетфликс серија Tiger King („Ноќна мора“ на Жељко Малнар во американска реднек средина) да добие помилување од Трамп. Денес тој има желба да продолжи да живее со својот сопруг кој замина во Мексико. Мал технички проблем му е тоа што уште е зад решетки.   

Франција најде сурово решение за наркобосовите: затвор среде амазонска џунгла во Гвајана. Веднаш до озлогасениот работен логор од пред еден век, кај што беа Стив Мекквин и Дастин Хофман во филмот „Папијон“, но со ѕидови и правила што прилегаат на 21 век. Таму ќе ги чува чува локалците што пакуваат кокаин кон Европа, но и дилерите од Франција. И по некој радикален исламист.

Кога модели со вештачка интелигенција ги оставиле да комуницираат сами во група без централна координација тие самостојно формирале правила до кои почнале заеднички да се придржуваат. За да се стигне до консензус, се издвоиле мали подгрупи што успеале својата пристрасност да му ја наметнат на целиот систем. Слично како динамиката на критична маса во човечкото општество.

Компанијата на Марк Закерберг толерира измамнички реклами на своите социјални платформи за да не го загрози огласувањето како извор на 160 милијарди профит. Мета дозволува и по 32 лажни „неверојатно поволни“ понуди за туѓи производи на Фејсбук и на Инстаграм пред да ги блокира, а измамените корисници попусто бараат некој да им ги врати „ситните“ пари. 

Со еден од најголемите гласачки пресврти воопшто, завршија контроверзните претседателски избори во Романија, практично сè додека не победи проевропски кандидат. Во декември беа поништени откако најмногу гласови освои прорускиот Георгеску, а сега „романскиот Трамп“ го призна поразот иако во првиот круг водеше со двојно повеќе гласови од својот противкандидат.

Уште во февруари оваа година администрацијата на Трамп удри со санкции за главниот обвинител на Меѓународниот кривичен суд во Хаг, за да го обесхрабри да буричка по израелските злосторства во Газа, откако беше издадена потерница и по Нетанјаху. Како тоа изгледа? Карим Кан останал без меил, средствата му се замрзнати а некои „силни“ невладини организации сега се плашат и да одговорат не меилови од судот.

Кога американскиот потпретседател ја обвинува Европа дека не ја штити слободата на говорот, првата реакција е дека е тоа лицемерно. Актуелната Бела куќа е брутален непријател на мислења што не ѝ се допаѓаат, депортира студенти поради нивни политички ставови, ги ремети критичките медиуми и ги малтретира универзитетите. Но, само затоа што е лицемер, не значи дека Џеј Ди Венс греши.

Откако арапските земји го отфрлија проектот на Трамп да ја претвори Газа во „Ривиера на Медитеранот“, но без Палестинци во неа, САД имаат нов план за трансфер на 1 милион Палестинци во Либија. На Триполи му се ветува одмрзнување на либиските милијарди, а на луѓето од Газа бесплатни домови и финансиска поддршка. Ако пропадне дилот со Либија, резервна опција е Сирија.

Железничко-патен надвозник во холандскиот град Ријен има бетонски ѕид кој сам се обновува благодарејќи на бактериските култури кои се внесени во него. Штом ќе дојдат во контакт со вода и кислород, се будат и сами ја пополнуваат пукнатината. И да се совлада кај нас оваа технологија, очи ќе си извадат кој да го лапне тендерот за бактериите кои подоцна ќе ни се покажат како мрзливи.

Рекламите на Јутјуб сè почесто нервираат корисници но затоа на компанијата ѝ носат сè поголеми пари кои се мерат со десетици милијарди долари. Во меѓувреме, смислуваат и нови начини како рекламите да носат уште поголеми пари од маркетинг. Со помош на вештачката интелигенција ќе идентификуваат кој дел од видеото е највозбудлив и најнапнат за баш таму да уфрлат реклама.  

Аудио-снимката на сведочењето на Џо Бајден во 2023 година покажува зошто Белата куќа повеќе од една година строго забранувала да биде објавена. На транскриптот сè изгледа фино, но не може да се добие претстава за блокадите во говорот и шепкањата од адвокатот што му ја освежувал меморијата. Човек во таква состојба цела година ги водел САД, а можеше да добие уште еден мандат.

Нова студија за стапката на смртност од ковид во САД повторно ја засили дебатата за безбедноста на вакцините. Истражување спроведено кај повеќе од 1,4 милион луѓе на Флорида покажало пониска стапка на смртност од сите видови причини кај возрасни што ја примиле вакцината од Модерна во споредба со истите категории луѓе што примиле дози од Фајзер.

Деветмесечено бебе родено со ретко генетско нарушување е првиот човек што е излекуван со терапија за модификација на гени со техниката КРИСПР, која пред пет години заслужи Нобелова награда. Успехот на лекарите од Филаделфија се смета за историски во медицината, бидејќи им дава уште една шанса на луѓето со ретки болести, за кои нема други третмани што би им го спасиле животот.

Иако со децении добар дел европски земји се колнеа дека никогаш нема да ѝ се вратат на струјата од нуклеарен погон, некогашните нуклеарни скептици денеска се тркаат кој побрзо и повеќе ќе гради атомски реактори за да имаат доволно евтина струја која нема да ја загадува природата. Последна е Данска, на ред се Шпанија и Шведска, а Италија и Белгија веќе го сторија тоа. Се чека на Германија.

Британија бара нова земја на Балканот во која би ги префрлала имигрантите што не добиле азил, откако Рама го одби предлогот на Стармер. Коментирајќи го „фијаското“ на Стармер во Тирана, британски весници ја спомнуваат Македонија меѓу новите потенцијалните партнери за зделката. Лондон веќе најави дека во Македонија ќе ја прошири својата работна група за миграција.

Тајната служба на САД истражува дали енигматичната порака од поранешниот директор на ФБИ всушност е повик за убиство на претседателот Доналд Трамп, кој лани два пати беше цел на атентати. Тивката војна помеѓу Џејмс Коми и Трамп почна во 2016 година, кога ФБИ отвори истрага за „руските врски“ на републиканците во кампањата, а ја затвори истрагата за мејловите на Хилари Клинтон.

Стресот и емоционалната болка по раскинување на врска е тема на безброј песни, книги и филмови. Но, синдромот на скршено срце е медицински потврден како сериозна состојба по емоционален и физички стрес, со висока стапка на смртност од 6,5 % и од која страдаат се повеќе луѓе. Од синдромот почесто страдаат жените, но двојно повеќе е фатален за мажите.