Кинескиот лидер Си Џинпинг извлече огромна полза од војната во Иран без да испука куршум – со трпеливо чекање и гледање од страна како Доналд Трамп работи на својата штета. Додека САД ги потрошија својот арсенал муниција и угледот на меѓународната сцена, Кина го утврдува синџирот на снабдување, напредува во технолошката трка и го шири своето влијание во светот.

Генетски секвенци, медицински снимки и други здравствени податоци на половина милион луѓе во Британија биле понудени на продажба на кинескиот сајт Алибаба. Кинески институти легално ги презеле податоците од UK Biobank, но не е јасно како стигнале на продажба. Не содржеле имиња и адреси, но со едноставно вкрстување може да се открие идентитетот.

По 16 години ЕУ го дочека крајот на власта на Виктор Орбан во Унгарија, но сега може да добие уште понезгоден бунтовник во Романија – Георге Симион, кој ја опишува како „државен удар“ улогата на Брисел во поништувањето на претседателските избори пред две години. Владината коалиција во Букурешт се распаѓа, а партијата на Симион убедливо води на анкетите.

Последиците од блокадата на Ормускиот проток поттикнаа загриженост поради ризикот од битка за контрола врз Малачкиот теснец, низ кој поминуваат уште повеќе танкери и товарни бродови. Земјите од регионот тврдат дека немаат планови да го блокираат ниту да воведуваат „патарини“, но тоа може брзо да се смени, во зависност како ќе биде решена кризата во Персискиот Залив.

Германските конзервативци ѝ спремаат дочек на „својата“ Урсула фон дер Лајен, со строг ултиматум: Да ги демонтира контролата и бирократијата во Брисел или да се соочи со  ограничување на овластувањата на Европската комисија. ЦДУ и канцеларот Мерц го губат трпението поради бавното темпо на реформите, кое ги кочи бизнисите во ЕУ и во членките.

Тензиите меѓу Ватикан и Белата куќа не се ништо ново, но низ историјата главно се решавале со политички изјави или со намерно молчење. Трамп ги кренал на ниво на студена војна. Личните расправии со папата Лав XIV, ги смета за закана на интересите на САД и затоа ја активирал целата разузнавачка машинерија насочена против Ватикан.

Кол Ален, приведен по нападот врз Вечерата на дописниците од Белата куќа, на која беше присутен и претседателот Трамп, во манифест до членовите на  своето семејство објаснил дека има „праведна должност“ да ги елиминира административните службеници од највисокиот ранг до најниските. Плус, забележал дека слободно се прошетал вооружен до заби во хотелот.

Само во првите три и пол месеци од годинава во Франција биле киднапирани над 40 луѓе заради откуп во криптовалути. Обвинети се 88 луѓе. Работата на криминалците им ја олеснуваат слабата заштита на приватните податоци, а мошне веројатно и корумпирани бирократи, кои продаваат чувствителни информации на црниот пазар. Компромитирани се 23 милиони сметки.

Во Германија е предложен закон со кој за кривично дело би се прогласило негирање на правото на постоење на Израел. Може слободно да се негира „правото на постоење“ на Палестина, на Германија или на која друга било држава, ама за оспорување на правото на Израел ќе се оди пет години во затвор. Критичари велат дека ова може уште повеќе да го разгори антисемитизмот.

Во внатрешен меморандум што кружи низ Пентагон се наведени казните што претседателот Доналд Трамп ги разгледува за сојузниците од НАТО што не им помогнале на САД во војната против Иран. Шпанија би била суспендирана од Алијансата, а на Британија би ѝ била откажана дипломатската поддршка за територијален суверенитет врз Фолкландските Острови.

Долгата и исцрпувачка војна со Русија не само што ја остави Украина без доволно мажи за фронтот, туку ја продлабочи демографската криза. Многумина од петте милиони Украинци што избегаа на Запад не планираат да се вратат во разурнатата татковина. Киев планира да го пополни недостигот од работна сила со привлекување мигранти од земји од Третиот свет. 

Дури и ако утре биде деблокиран Ормускиот теснец, пазарот на нафта веќе претрпи огромна штета затоа што се скрши глобалниот синџир на снабдување. Рафинериите го намалуваат производството и наскоро ќе се грабаат за секој барел нафта за да не бидат затворени. Нафтата ќе биде прескапа, а владите ќе мораат да ја смируваат кризата со строго ограничување на трошењето.

Војната во Иран може да предизвика домино ефект во кој близу 20 земји ќе се стремат да стекнат атомски бомби. За тоа веќе отворено се зборува во Полска, Јужна Кореја, Јапонија, Турција и Саудиска Арабија, кои се чувствуваат недоволно заштитени во периодот на глобален геополитички хаос, предупредува првиот човек на светската агенција за атомска енергија.

Нафтата која остана заглавена во Персискиот Залив не е само за гориво за коли и авиони. Таа ја загрозува и глобалната безбедност на снабдувањето со храна, бидејќи земјоделството и прехранбената индустрија се потпираат на нафтени деривати – од почвата до лажицата. Ако Протокот остане блокиран и во мај, можна е голема катастрофа и глад, предупредува ФАО.

Трамп создаде огромна база од поддржувачи и победи на изборите поради политиката за одбрана на приватноста и на граѓанските права. Сега бара од своите најтврдокорни следбеници од MAGA да се откажат од своите лични права и да им дозволат на федералните власти да ги шпионираат без налог, заради поголема безбедност и за „доброто на нацијата“.

Исцрпеноста од долгата војна ги принуди украинските власти да бараат алтернативни начини како да ги пополнат строевите на фронтот. Успешниот развој на евтини и ефикасни беспилотни летала ги охрабрува да ги замени војниците со машини и на копно. Роботите не дезертираат од фронтот, не се противат на присилна мобилизација и не одбиваат наредби.

Обединетите Арапски Емирати побараа валутна размена со САД заради санирање на економските последици од војната против Иран во која беа вовлечени без некој да ги праша. Емиратите може да останат без долари ако кризата се влоши (а натаму оди работата), па предупредуваат дека ќе бидат принудени да користат кинески јуани или други валути за продажба на нафта и за трансакции. 

Уште Петер Маѓар официјално да ја преземе премиерската функција во Унгарија, Брисел му постави незгодна задача - да го поништи законот од Орбан за забрана на пристап на деца до LGBTQ содржини. Ова му доаѓа како „приемен испит“ за десничарот, кој во кампањата воопшто не го пипаше ова прашање, а ќе има двотретинско мнозинство за да го промени.

Киев има огромни проблеми да ја засили армијата до нивото од 800.000 војници кое го побара врховниот командант Зеленски. Бидејќи бројот на мажи кои имаат право на воена служба (на возраст помеѓу 18 и 60 години) постојано се намалува, украинското раководство ги тестира реакциите од јавноста за можноста за задолжително регрутирање жени.

Од 28 февруари, САД и Израел водат војна против Иран со последици далеку пошироки од бојното поле. Низ Персискиот Залив, владите го искористија конфликтот за да ја прошират репресијата дома. На монархиите од Заливот војната им даде тазе покритие за засилување на репресијата, криминализирање на несогласувањето и зацврстување на контролата врз секоја верзија на реалноста што е надвор од посакуваниот наратив.

Необична шема се повторила три пати откако САД ја почнаа војната со Иран. Некој става облог од милиони долари и точно ги предвидува клучните изјави на Трамп неколку минути пред да ги каже. Прекинот на огнот со Иран завршува утре. Трамп се заканува со нови жестоки напади ако Техеран одбие да ги продолжи преговорите. Уште една идеална можност за ризични облози.

Ако Унгарците гласаа за Петер Маѓар затоа што по 16 години им е преку глава од Виктор Орбан - ОК, нека им е со среќа. Ама ако го изгласале за да ѝ наштетат на Русија, како што ЕУ инсистираше во предизборната кампања, ја утнале работата. Маѓар нема намера да ги откаже договорите со Путин, а Брисел ќе мора во исто време да ги финансира и Украина и Русија во нивната војна.

Војна најдобро се шитка во претпродажба, како што беа американските интервенции во Авганистан и Ирак за кои американската јавност беше добро издинстана и расположена. Војната со Иран е првата голема воена операција за која Вашингтон нема мнозинско одобрување. Трамп имаше седум недели да ја убеди домашната јавност зошто Иран морал да се нападне, ама - не му оди.

Британска компанија доби лиценца да експлоатира гас од огромно поле во Јоркшир, кое има капацитет да задоволи 10% од енергетските потреби на земјата. Но, тоа нема воопшто да ја олесни енергетската криза ниту ќе ги намали сметките на семејствата. Струјата од гасната централа ќе се троши на рударење биткоини. Приоритет има приватниот ќар.