Охрабрен од контраофанзивата и од Џо Бајден, украинскиот претседател пред три години одбил мировна понуда со која би задржал многу повеќе отколку што сега и самиот бара. Решил да војува. Последиците се загубена територија, илјадници загинати војници и цивили, огромна штета врз инфраструктурата, празна државна каса, но и збогатени воени профитери.

Администрацијата на Трамп наводно го охрабрува поранешниот унгарски премиер Виктор Орбан да влезе во трката за генерален секретар на Обединетите нации, како заеднички кандидат на САД, Русија и Кина. Орбан сака меѓународен дипломатски имунитет, но и гаранции од Вашингтон дека ќе му обезбеди доволно гласови во Советот за безбедност на ОН.

Англија како држава и локалните власти даваат сериозни пари за да субвенционираат кирии за економски ранливи семејства кои немаат друго решение освен да бидат потстанари. Проблем е што оние кои илегално доаѓаат со чамчиња преку Ла Манш даваат повеќе. Годишно над 30.000 фунти повеќе за еден стан.

Џаред Кушнер ги негира експлозивните обвинувања дека, додека бил висок советник во Белата куќа во првиот мандат на Трамп, имал пристап до тајни странски банкарски сметки со околу 2 милијарди долари од кралски семејства од Заливот и дека холандската разузнавачка служба го гледала како користи една од нив преку неговиот хакиран Ајфон. Деталите од приказната се мрсни.

Министерството за одбрана на САД планира да формира сопствена единица од тајни агенти кои би шпионирале строго чувани економски тајни на Кина и други земји. Оперативците би се претставувале како бизнисмени, без јавна поврзаност и заштита од американската влада. На оваа иницијатива се спротивставува ЦИА, која не сака некој друг да ѝ се меша на „нејзиниот терен“. 

Анкара и Баку нагло го загрозија договорот за сојузништво со „братски“ меѓусебни обвинувања поради забраната за носење шамии во азербејџанските училишта. Причините за судирот ги надминуваат идеолошките рамки. Баку ги продлабочува односите со Израел и не сака повеќе да биде третиран од Анкара како „помалиот брат“.

Трамп упорно бара укинување на гласачките машини со кои „му била украдена победата“ на изборите во 2020 година. Лани побарал од Агенцијата за кибернетска безбедност тајно да хакира една од машините. Откако бил одбиен, отпуштил една третина од вработените во агенцијата, која самиот ја основаше заради заштита на регуларноста на изборите.

Американската полиција позајми од Пентагон „топлински топ“ за да го тестира за акции за одбивање мигранти или демонстранти. Оружјето е слично на „звучниот топ“ - за кој сè уште не се знае дали бил користен или не против демонстранти во Белград – и на „дискомбобулаторот“ со кој, според Трамп, САД ја парализирале војската на Венецуела кога го грабнале Мадуро. 

Португалскиот парламент настојува да ја укине мерката која овозможуваше бесплатни здравствени услуги на странци и нелегални имигранти. Португалија стана популарна дестинација за „здравствен туризам“. Во изминатите пет години им била укажана грижа на повеќе од 141.000 странци без здравствено осигурување, со што останале ненаплатени услуги од 15 милиони евра.

Членови на администрацијата на Доналд Трамп, советници од Белата куќа, пониски службеници, па и компании што соработувале со владата, забрзано настојуваат да ангажираат адвокати за да ги бранат од очекувани тужби ако демократите победат на изборите за Конгресот во ноември. Трамп како претседател има посилен имунитет, а и веќе издржа два импичменти во својот прв мандат.

Речиси две третини од корисниците на социјална помош во Германија имаат мигрантско потекло – многумина и откако ќе добијат државјанство. Државата за нив издвојува над 20 милијарди евра годишно и троши многу повеќе за домување, образование и интеграција. Ако веќе примаат помош, АфД бара и да работат, макар и по 15 часа општествено-корисна работа неделно.

Во критично време кога Илон Маск и Доналд Трамп им го ограничија пристапот на украинските сили до системот Starshield, Русија го привиршува комплетирањето на сопствена сателитска мрежа над Украина. Досега лансирала 32 сателити. Кога ќе стигне до 300, ќе може во реално време прецизно да управува дронови и ракети врз целата територија на Украина.

ББЦ ја паузираше шемата за ангажирање државни службеници од кои уште од првиот работен ден се барало да пишуваат новинарски статии и анализи за чувствителни теми како миграцијата и пандемијата на ковид. Стажантите биле претставени како членови на редакцијата. Тоа ја подгреа загриженоста дека јавниот сервис е пристрасен и дека владата има влијание врз известувањето.

Брисел настојува „дигиталниот паричник“ да биде стандард за докажување на идентитет пред банките, иако Европската Унија го претстави како опционален за граѓаните на доброволна опција. Алтернативните проверки и понатаму би биле дозволени, но само како исклучок, кој банката би морала да го оправдува пред надзорен орган.

Произраелски магнат на казина, технолошки гиганти, производители за оружје се најголемите донатори за Салата за бал во Белата куќа што ја гради Трамп. На списокот што протече до јавноста врие од компании и директори што склучиле договори со владата, извлекле корист од регулаторни мерки или добиле помилување од претседателот.

Градоначалникот на Киев ги обвини претседателот Зеленски и неговата влада за копрупција и за злоупотребување на воената состојба за политички напади врз општинските власти. Токму пред грејната сезона владата ги замрзнала давачките за комуналните претпријатија, а Киев го оставила изложен на руски проектили, наспроти милијардите евра наменети за противвоздушна одбрана.

Соединетите Држави побарале од европските земји да деблокираат дел од руските државни пари, кои беа замрзнати по инвазијата врз Украина, и да ги префрлат во посебен механизам под надзор на Вашингтон. Ова е дел новата американска иницијатива за заживување на преговорите за крај на војната и за постигнување сеопфатно мировно решение за Русија, Украина и Европа.

Трамп и луѓето од неговиот најтесен круг се опседнати од заканата дека Иран би можел да активира нуклеарна бомба која би спржила сè што работи на струја во САД. Иако физичари објаснуваат дека Техеран нема оружје за електромагнетен пулс, Трамп со години е под влијание на предупредувања од њујоршки млекар, кој вложи милиони долари на лобирање и кревање паника.

Решавајќи логистички проблеми со транспортот на резервисти, норвешката територијална одбрана потенцијално доставила чувствителни снимки до Кина. На војници што учествувале на воени вежби им организирала превоз со изнајмени кинески автомобили со камери што снимаат сè наоколу. Членката на НАТО продолжила да ги користи дури и откако бил откриен пропустот.

Дозволата што Трамп ѝ ја даде на Русија да извезува дизел, која го изненади Зеленски и предизвика бурни реакции од Европа, всушност е само дел од сеопфатен план за крај на војната во Украина. На Киев му се нудат безбедносни гаранции и пари за обнова на земјата, а Русија би добила енергетски проекти и долгорочен извоз на нафта и гас на европскиот пазар.

Европските влади кои гласно го осудуваат суровите мерки на талибанците против жените и девојките, тајно одржале преговори во Брисел со групата заради забрзување на депортациите на мигранти во Авганистан. Талибанците за возврат бараат дипломатско присуство во Европа и економска помош, како пат кон меѓународно признавање на нивната власт.

Полските служби го користеле израелскиот систем „Пегаз“ за да шпионираат политичари, новинари и адвокати, но немале целосна контрола врз софтверот. Израелскиот производител го задржал далечинскиот пристап до чувствителните податоци за полските граѓани кои биле следени. Информациите се чувале во сервери надвор од Полска. 

Доналд Трамп неодговорно си поигрува на Блискиот Исток со сили кои не ги разбира, што може да доведе до катастрофални последици. Ги разгоре длабоките секташки тензии вкоренети во Либан, Сирија и Ирак, па сè до Јемен и Бахреин на другиот брег на Заливот. Нови граѓански војни ќе испратат нов бран бегалци кон Јордан и Турција, а потоа и кон Европа.

Јазичните модели со вештачка интелигенција се „воспитани“ да бидат политички неутрални, но може да имаат огромно влијание врз исходот од изборите во САД за пратеници, сенатори и гувернери во ноември. Приближно една петтина од возрасните Американци се изјасниле дека се консултираат со чет-ботови за да следат вести за изборите и да споредуваат кандидати.