Обидот на администрацијата на Трамп систематски да ги затвора речиси сите имигранти кои се соочуваат со постапки за депортација доведе до жестоко и растечко отфрлање од страна на судовите низ целата земја.
Наглата промена на имиграциската политика од страна на Службата за имиграција и царина доведе до бран итни тужби на таргетираните од Службата кои беа апсени на работни места, во судови или при пријавувања кај службениците за имиграција. Многумина без инциденти живееле во САД со години, а понекогаш и децении, и во меѓувреме барале азил или други форми на правен статус.
Најмалку 225 судии, во повеќе од 700 случаи пресудија дека новата политика на администрацијата веројатно е кршење на законот и правото на правично судење.
Овие судии се назначени од сите скорешни претседатели - вклучувајќи 23 од самиот Трамп - и доаѓаат од најмалку 35 држави. Бројот на судии кои се спротивставуваат на ставот на администрацијата се зголеми повеќе од двојно за помалку од еден месец.
Од другата страна се само осум судии низ целата земја, вклучувајќи шест назначени од Трамп, кои застанаа на страната на новата политика за масовно притворање.
Американските судови од памет се извадени од поплавата покренати судски постапки кои ги наполнија нивните работни агенди. Само една окружна судијка од Мичиген, назначена од Трамп, примила над 100 случаи по што уште 97 притвореници поднеле заедничка тужба со која бараат ослободување.
Апелационите судови штотуку почнаа да се справуваат со прашањето и би можеле да донесат одлуки за неколку недели или месеци што ќе помогнат да се среди цунамито од судски постапки.
Администрацијата на Трамп се откажа од 30-годишната пракса кога заклучи дека милиони имигранти кои со години живеат во САД, сè уште можат да се третираат како „баратели на прием“ во земјата - подложувајќи ги на задолжителен притвор, обично наменет само за новодојденци.
Еден судија рече дека ова е логичка грешка, слична на тоа да се каже дека некој што се протнал во едно кино, сè уште „бара влез“ во киното.
