Летонската министерка за надворешни работи Баиба Браже се пожали дека Европа упорно ги игнорира руските провокации, чија цел е да се тестира реакцијата на европските земји.
Потребен е проактивен одговор. Не да се зборува, туку да се дејствува, изјави министерката за Политико.
Полска и Романија во изминатите недели пријавија дека нивните воздушни простори биле повредени од руски беспилотни летала. Поради надлетувања од дронови, за кои се уште не е утврдено кој ги управувал, во изминатите неколку месеци беше запрен сообраќајот на аеродроми во Данска, Германија и во други земји. Глобсек, тинк-тенк со седиште во Прага, пресмета дека имало повеќе од 110 акти на саботажа и обиди за напади извршени во Европа помеѓу јануари и јули, главно во Полска и Франција.
Русија ја отфрла одговорноста за нападите. Претседателот Владимир Путин во октомври изјави дека Москва ја следи засилената милитаризација на Европа.
САД се наш противник. Европа, сепак, не сака војна со нуклеарно вооружена Русија и затоа мора да открие како да одговори на начин што би ја одвратил Москва, но да не ги премине црвените линии на Кремљ, забележа поранешниот претседател Дмитриј Медведев, кој сега е заменик-шеф на Советот за безбедност на Кремљ.
Европа досега се фокусираше на зајакнување на одбраната. Откако над Полска беа соборени заталкани руски дронови, НАТО соопшти дека ќе ја зајакне противвоздушната одбрана на своето источно крило.
Италијанскиот министер за одбрана, Гвидо Кросето, пред една недела ја критикуваше инертноста на континентот и претстави план за одмазда од 125 страници. Тој предложи формирање Европски центар за борба против хибридното војување, кибернетска единица од 1.500 припадници, како и воен персонал специјализиран за вештачка интелигенција.
Како потенцијални цели за европските кибернетски напади се посочуваат системи што се критични за воените напори на Русија.
Можеме да ги нападнеме и да го нарушиме функционирањето на економската зона Алабуга во Татарстан во која се произведуваат беспилотните летала Шахид, енергетските објекти или железничкиот транспорт на оружје, вели Филип Бријка, политиколог и експерт за хибридни закани во Полската академија на науките.
Анонимен офицер изјавил за Политико дека Европа мора да тргне и во информативна контраофанзива. Тој бара соработка со „сојузници што добро разбираат како размислуваат Русите“ заради војување со информации.
Сите нови мерки треба да имаат веродостојна можност за негирање, додава дипломат од Брисел.
