Европската Унија најде заобиколен начин да овозможи следење на разговорите помеѓу корисници на онлајн платформите, иако официјално се откажа од експлицитното барање за тоа.
За предлог-законот се води жестока дебата повеќе од три и пол години. Повеќето членки на ЕУ поддржуваат строга контрола, но немаа доволно мнозинство за да се усвои законот на ниво на Унијата.
Во спорните членови од оригиналната верзија на нацрт-законот се бараше од давателите на онлајн услуги да ги надгледуваат четовите и секоја сомнителна содржина што потенцијално сведочи за кривични дела или загрозување на безбедноста на деца да им ја пријавуваат на властите.
Поради блокадите и критиките дека се кршат приватноста и основните права, нацртот беше изменет за да овозможи барем „доброволно“ следење на разговорите. Ова беше забрането во ЕУ од 2002 година, но привремено беше дозволено под одредени услови од 2021 година. Новиот текст на нацртот овозможува оваа промена да остане трајна.
Ни во новата верзија нема експлицитната обврска за скенирање на пораките, но во Членот 4 се бара од давателите на услуги како WhatsApp или Signal да ги преземат „сите разумни мерки за ублажување на ризикот“. Ова значи дека платформите сè уште би можеле да бидат принудени да скенираат приватни пораки - дури и со енкриптирани комуникациски услуги од крај до крај.
Дури и скенирањето од страна на клиентот (CSS) на нашите смартфони наскоро би можело да стане задолжително. Ова овозможува следење директно на уредите на корисниците, заобиколувајќи го криптирањето и отворајќи потенцијални безбедносни ранливи точки, предупредува експертот за дигитално право Патрик Брејер.
Данското претседателство со Советот на ЕУ ја повика Европската комисија да ја процени изводливоста од воведување задолжителна идентификација во иднина, ако тоа го налага технолошкиот развој. Оваа клаузула ја остава отворена можноста за државите да наметнат следење на четовите.
Законот, исто така, налага проверка на возраста за одредени услуги. Критичари предупредуваат дека проверката на возраста „носи вроден и непропорционален ризик од сериозни прекршувања на заштитата на податоците и дискриминација, без никаква гаранција за ефикасност“. И Федералниот комесар за заштита на податоците предупреди дека ова ќе биде „далекусежно укинување на анонимноста на интернет“.
