Проектите за изградба на огромни центри за податоци беа на референдумски гласачки ливчиња во повеќе од 40 окрузи во десет сојузни држави. Во огромно мнозинство случаи, локалните заедници се изјаснија против изградба.
Само во Охајо, најмалку 14 општини воведоа забрани или ограничувања за центри за податоци. Во Мејн, осум општини изгласаа привремени мораториуми. Во Канзас беше блокирана изградба на центар со капацитет од 1 гигават, кој би зафаќал површина од 4 квадратни километри. Има и еден значаен исклучок: Хардвуд во Северна Дакота, место со помалку од 1.000 жители, отфрли ограничувања за развој на центри за податоци.
Анкетите спроведени меѓу Американците што излегоа на гласачките места покажаа дека за речиси една четвртина центрите за податоци биле најважното прашање што ги поттикнало да се определат за кого да гласаат. Само 13% изјавиле дека ова прашање воопшто не им било важно.
Противењето на граѓаните против овие гиганти што трошат струја и вода беше изразено и на изборите на конгресмени и други функционери. Кејша Ленс Ботомс, која беше избрана за гувернерка на Џорџија, и Ејми Актон, новоизбраната гувернерка на Охајо, во своите кампањи ветуваа мораториуми за изградба на големи центри.
Во Тексас, демократката Џина Хинохоса до својата историска победа стигна преку кампања во која вети мораториуми и се обврза на поактивно вклучување на локалните заедници во одлучувањето за ваквите проекти. Нејзиниот републикански противкандидат Грег Абот долго време ја промовираше изградбата на компјутерски центри како извор на инвестиции за локалните заедници.
Не може да се разубави фактот дека префрлањето на мнозинството на страната на демократите, особено во Сенатот, ќе создаде сериозни пречки за Вашингтон и за индустријата за вештачка интелигенција во текот на следните две години, вели аналитичарот Ден Ајвс.
Како особено голем пораз за технолошките инвеститори тој ја спомна промената на власта во сојузната држава Тексас, од каде беше планирано да доаѓаат 25% до 30% од капацитетите на центрите за податоци.
Од вкупно 470 милиони долари кои Илон Маск ги вложи во кампањата на републиканците, речиси половината отидоа за Кен Пакстон - кандидатот за сенатор од Тексас.
Парите не завршија работа. Маск потроши половина милијарда долари и изгуби во секоја трка, изјави за Фајненшл тајмс извор вклучен во политички операции на големите технолошки компании.
