По примерот на американски фенси ресторани, во округот Чешир во Англија е отворен првиот ресторан во кој покрај мени и винска листа, имаат и одбрана водна листа. При рака е и посебен сомелиер кој врши брзинска обука за гостите и ги убедува дека ќе бидат задоволни ако дадат 22 евра за шише вода. Хидроевангелистите веруваат дека водата долго била потценета па време е таа да се прецени.  

Властите на јапонскиот град Тојоаке ги повикаа сите корисници на смартфони да го ограничат на два часа времето што го поминуваат пред ептен малите екрани, откако ќе им завршат секојдневните работни обврски или наставата за учениците. Мерката не е обврзувачка и не се предвидени казни за прекршителите. Младите Јапонци реагираат дека денес тоа е невозможно да се спроведе.

Бавно и внимателно, големата градска црква во Кируна сосе камбанаријата го почна својот историски пат до нова локација некои 5 километри на исток, за да не биде проголтана од рудникот ископан под неа. Транспортот на објектот тежок стотици тони е круна на преселбата на целиот град со 23.000 жители – куќа по куќа. Швеѓаните не брзаат. Преселбата почна во 2017 година и ќе трае уште со години.

Во какво лудо време живееме... Луѓе запросуваат ботови, а роботи наскоро ќе раѓаат бебиња. Во „зрела“ фаза е развојот на хуманоиден робот во чија механичка утроба, во средина слична на онаа во матката, ќе се развива човечки плод, од оплодена клетка до раѓањето, тврди кинеска компанија. Планирано е прототип да се појави на пазарот веќе идната година за цена од околу 12.000 евра.

Во прва студија од таков вид, се проценува дека ударите од гром убиваат 320 милиони дрвја секоја година. За контекст, овие мртви дрвја сочинуваат до 2,9 проценти од годишната загуба на растителна биомаса поради што остануваме со 1,09 милијарди тони јаглерод диоксид. Во проценката се влезени само оние кои се уништени со директен удар а не и оние кои страдаат од предизвиканиот пожар.

Интеракциите на корисниците со ЧетГПТ и другите јазични модели со вештачка интелигенција го достигнало максимумот при крајот на мај, а потоа во јуни нагло се намалиле. Трендот е јасен и се поклопува со завршните испити и крајот на школската година. Ботовите ќе можат да одморат од решавање задачи и пишување есеи додека децата и студентите одмараат од препишување домашни.

Во кратер во Луизијана се откриени нови докази што ја поткрепуваат оспорената хипотеза за исчезнувањето на древна цивилизација, која имала напредни познавања за астрономија и навигација. Била збришана од комета што пролетала покрај Земјата и со парчиња од опашката како со сачми ја прострелала во Северна Америка, Белгија, Сирија, Чиле, дури и во Антарктикот. 

Ништо во историјата на политички глупости во Калифорнија не е близу до проектот за експресна железница од Лос Анџелес до Сан Франциско. Планиран за 33 милијарди долари, може да достигне 250, а сè уште нема пруга. „Возот-куршум“ на Њусом може да послужи како пример дека економските закони постојат со причина и дека оние што ќе ги извртат ќе мора да ги трпат последиците.

Храмот Шаолин, родното место на зен будизмот и на кунг-фу, повеќе од 1.500 години бил центар на спокојство и телесна дисциплина. Светската слава што му ја донесе кунг-фу филмот на Џет Ли привлече туристи, но ги урна вредностите и му ги отвори апетитите на главниот монах. Чуварот на моралниот компас е сменет поради злоупотреба на парите од храмот, а не му ги простуваат ни љубовниците.

Кина го блокира пристапот до OnlyFans, наведувајќи го како „закана за националниот морал, културните вредности и општествениот поредок“. Прашање е како оваа платформа на која главно се споделуваат порно содржини од домашна изработка, воопшто се протнала преку строгите кинески цензури кои одамна ги забранија и побезопасни канали како Јутјуб, Фејсбук и Инстаграм. 

Стартап од Сан Франциско тврди дека конечно ја решил милениумската тајна на алхемијата – како да се направи злато од некој друг метал. Магијата е во нуклеарната фузија, која досега е постигната само во термонуклеарни бомби. Фузиските нуклеарни реактори во иднината би можеле да прават тони злато годишно и така двојно да го зголемат ќарот од произведената струја. 

За разлика од нивните родители, денешните се бомбардирани со совети и филозофии како да ги воспитаат своите деца. Тоа прерасна во бизнис. Пазарот на апликации за родители се проценува дека вреди 600 милиони долари. Студија што цела деценија следела развој на речиси 6.000 деца, нуди докази кое воспитување е поврзано со најдобрите резултати: Авторитативно, со доза на нежност.

Мајкрософт ќе собира милиони тони човечки измет од канализации, животински лепешки и арски гној за да ги спакува длабоко под земја и така да добие прошка за ѓубрето што во воздухот го испуштаат огромните центри за податоци со кои се напојува вештачката интелигенција. Нема да ги извалка рацете, туку ќе ѝ плати на специјализирана компанија за безбедно складирање отпад.

Агенции за изнајмување автомобили сè почесто користат скенери со вештачка интелигенција што темелно го снимаат возилото и пронаоѓаат и најситни оштетувања. Гребнатинка на бандаж може да чини повеќе од изнајмувањето. Чаре нема. Корисниците немаат можност ни да се пожалат дека можеби им е накалемена туѓа штета. Слаба одбрана им се осигурувањето или снимањето на колата.

Биотехнолозите што го вратија во живот изумрениот страшен волк (иако е оспорено дека е баш истиот) најавија дека ќе ја оживеат и новозеландската птица моа. Технологијата е малку поразлична, зашто гигантската птица се испилува од јајце. Коски и пари обезбедија од Питер Џексон. На ред чекаат мамутот и додото, но ќе дојде време некој да плати да воскреснат тираносаурус.

Креативен предизборен слоган знае да придонесе за победа, а несмасно склопените може да уништат кариера на политичар. Темелна научна анализа на слогани од целиот свет покажала дека има неколку клучни зборови им се заеднички на многу успешни кампањи. Но, сами по себе не се волшебна формула за изборен успех. Нема многу да им помогнат на „нехаризматични ѓубриња“.

Ако денеска не ви стаса време да ги сработите обврските или ако чувствувате вртоглавица, до планетата е. Поради забрзаната ротација на Земјата, oвој 9 јули е пократок за 1,3 милисекунда. Аномалијата ќе се повтори во уште два летни дена. Луѓето нема ни да забележат, ама за научниците и компјутерите е многу важно да ги курдисаат часовниците за да не изгубат некоја милисекунда.

Бројот на „ситни“ милионери, со богатство проценето под 5 милиони долари, е четирикратно зголемен во изминатите две децении. Денес ги има речиси 52 милиони, половината од нив во САД и во Кина. За другите 99% луѓе што не располагаат со седумцифрени суми звучи неверојатно тоа што милионерите воопшто не се чувствуваат богати. Многумина и не знаат дека се во елитниот клуб.

FlightRadar24 деновиве следеше интересна „трка“ на авиони кога, сосема случајно, два патнички авиона се упатија кон истата дестинација речиси истовремено, но по различни рути. Од Хелсинки до Токио. Едниот имал одбрано траекторија која била 457 километри подолга од оној другиот. Сепак, стигнал саат време порано. 

Анализа на владини податоци покажува дека во Велика Британија се доделени речиси 10.000 сертификати за признавање на посакуваниот пол. За три месеци оваа година се издадени 1.169 такви сертификати кои овозможуваат стекнатиот пол на лицето да биде легално признат и тоа е највисок број откако шемата започна во 2005 година.

Италијански истражувач во март објави дека открил огромна структура под Големата пирамида во Гиза. Прочуени археолози го отфрлија ова како „глупости“, тврдејќи дека нема радар што може да снима толку длабоко. Наместо да замолчи пред авторитетите, Бјонди им фрла нова јадица: Не бил еден подземен град, туку два. Ако се покаже дека е прав, историјата ќе мора да се пишува од нула.

Пензионирани американски воени лица проговорија за теориите дека во Зоната 51 биле криени вонземјани. Не само што во строго забранетата зона немало „мали зелени“, туку офицерите самите ги ширеле гласините за да го прикријат развојот на авионите од „стелт“ технологија. Тоа го правеле толку добро што и многумина вработени во Зоната 51 се пензионирале верувајќи во приказните.

Намаз од лешници ко се произведува во Алжир, со години без проблем се увезувал и се продавал по дуќанчиња во Франција. Но, минатото лето има фаќа око на инфлуенсери кои се одушевуваат од неговиот вкус а фамата се префла и на стандардните медиуми. Не мина долго време за земјата во која се продава најмногу Нутела на свет, да најде закачка и да забрани увоз на алжирскиот крем.

Најпопуларните порно сајтови Порнхаб, Редтјуб и Јупорн денеска привремено ќе го блокираат пристапот до своите содржини за корисници во Франција, во знак на протест против новиот закон за верификација на возраста. Своите пет минути ги дочекаа Французите што се палат на голите гради на „Слободата“ на Делакроа, која ќе ги пречекува на сајтовите. Другите ќе одморат рака.