ОпенАИ сега седи на двете страни на масата во затворена сала за состаноци и преговара самата со себе за да склучи договор во името на човештвото, а не ни дозволува да ја видиме содржината и да ги знаеме условите, а камо ли да решаваме дали да ја прифатиме одлуката, забележуваат потписниците на отвореното писмо.
Претставувајќи се како „легални корисници на вашата добротворна мисија“, потписниците ја потсетуваат ОпенАИ дека е основана со правно обврзувачка заложба да обезбеди полза за човештвото од општата вештачка интелигенција (АГИ) што ја развива.
Мисијата за добра волја опишана во основачките документи поттикна инвестиции и привлече таленти, наведуваат потписниците, на чие чело се Џефри Хинтон - „кумот на вештачката интелигенција“ и тројца други нобеловци - Џорџо Паризи, Оливер Харт и Шелдон Ли Глешоу.
Влијателните потписници ја обвинуваат компанијата на Сем Алтман дека со реструктуирањето во профитен субјект „се става во улога на бог“ и ги напушта важните одбранбени механизми дизајнирани да гарантираат дека технологијата ќе му служи на човештвото - ограничувањето на профитот за инвеститорите, непрофитното управување со комерцијалните операции и експлицитните заложби да се даде приоритет на добротворниот карактер на мисијата.
Групата поставува седум прашања за спецификите на реструктуирањето, вклучувајчи го и најважното: дали ќе ја комерцијализира својата AGI кога ќе ја развие.
Влоговите не би можеле да бидат поголеми. Одлуките што ги донесувате за управувањето, распределбата на профитот и одговорноста ќе ја обликуваат не само иднината на вашата организација, туку и иднината на општеството во целина, се наведува во писмото.
Ова не е ни првиот, а веројатно ни последниот притисок од јавноста кон ОпенАИ. Многумина од сегашните потписници неодамна испратија писма до обвинителите на американските сојузни држави Калифорнија и Делавер со барање да го запрат реструктуирањето на компанијата.
Лани, пак, група активни и поранешни вработени во ОпенАИ објавија дека „биле замолчени кога сакале да проговорат за опасностите што ќе се појават ако она што го гради компанијата се оствари“.
Наместо да одговори на писмото, Сем Алтман ги промовираше првите две бесплатни и отворени верзии на ЧетГПТ, кои треба да бидат конкуренција на кинеските Дипсик и Квен и на Лама на Мета.
