Над 40 камили биле дисквалификувани од натпреварот за убавина во Саудиска Арабија. Главно поради примање ботокс инекции и други козметички додатоци. Натпреварот за МИС Камила е врв на фестивалот на камили на кралот Абдулазиз, каде во игра се 66 милиони американски долари парична награда.

Пакистанската национална авиокомпанија (ПИА), на која во 2020 година ѝ беше забрането да лета за за Англија, САД и ЕУ поради безбедносна загриженост, објави дека ги обновува летовите за Европа. И како паднати од Марс да не чуле за 11 септември, пуштија реклама во која се гледа авион како лета директно кон Ајфеловата кула. Префинето.

Луѓето на претседателката на Европската комисија периодов се обидуваат да и закажат состанок на Урсула фон дер Лаен со Доналд Трамп, во Флорида, пред неговата официјална инаугурација.

„И да се биде роб има свои предности. Најблагородната е правото на слугата да не учествува во битките на својот господар, туку да живее во мир. Но, на американското водство ова не им се допаѓа“, изјави лидерката на десничарската Алтернатива за Германија, Алисе Вејдел, обвинувајќи ја власта на Олаф Шолц за поданички однос кон Вашингтон.

Италијанска Прада е еден од потенцијалните кандидати за купување на Версаче групацијата која беше ставена на продажба од нивниот сопственик Капри Холдингс.

Новите правила на Мета за користење на платформата не им дозволуваат на корисниците како навреда да нарекуваат други луѓе дека се ментално болни, освен ако тие други луѓе не се ЛГБТ.

Уште не го раситнил својот втор мандат во Белата куќа, Доналд Трамп нè потсети на неговата мегаломанија од трговски карактер па повтори дека сака купуванка во форма на Гренланд. Оти во сегашна и волкава Америка нема работи кои треба да ги среди (миграција, фентанил криза, бездомништво, инфраструктура...) па му треба поголема Америка.  

Кога Трамп во првиот мандат порача дека сака да го купи Гренланд, тие што не бе шокирани од изјавата не можеа да се приберат од смеење. Овој пат, барем за Данска, работите станаа многу посериозни.

Најбогатиот човек на светот приватно разговарал со своите соработници за тоа како Кир Стармер може биде избркан од премиерската позиција во Британија и пред следните избори во земјата.

Не мораа да бидат владеачки партии но успеваа да ја наметнат својата агенда на сите политички играчи. Родова идеологија, ковид, миграција, диверзификација... секој свој наратив го претворија во догма која не дозволува преиспитување. Како можеа да помислат дека тоа ќе мине туку така? Дека народот ќе каже, стварно, слободата е страшна, ни треба цензура?

Тие што веруваа дека посетите на Кина во кои беше пречекувана од заменик градоначалник ќе бидат дното на дипломатската кариера на германската министерка за надворешни работи, не очекуваа дека Бербок некогаш ќе ја посети Сирија или пак дека таму ќе ја дочека ребрендиран ИСИС.

Белгиската државна агенција за безбедност на храната деновиве мораше да ја опомене домашната јавност дека божиќните дрвја, како вештачки, така и природни, не се за јадење.

На помалку од две недели од инаугурацијата, Трамп објави дополнителна своја амбиција за засилување на брендот „Америка“, овој пат со преименување на Мексиканскиот залив во Американски.

Мета ќе се ослободи од проверувачите на факти, „драматично ќе ја намали количината на цензура“ и ќе препорачува повеќе политички содржини на своите платформи, вклучително и Фејсбук, Инстаграм и Тредс, најави основачот Марк Закерберг. Се молат факт-чекерите да ја проверат оваа вест, дур им трае платата. Не дека се секираме за нив, ќе најдат тие нови газди.

Тринесет вработени на ББЦ споделија дека на човекот кој го води нивното биро за Блискиот исток, главна работа му е да ублажува сè што звучи критички кон Израел и дека во целата куќа владее естремен страв да не се каже нешто погрешно за таа држава. Човекот за кого се зборува во својата канцеларија држи врамено писмо од Бенјамин Нетанјаху во кое тој ја фали неговата книга за разузнавање.

Иако до пред некое време ни даваше фора од неколку години, првиот човек на стартапот за вештачка интелиганција, ОпенАИ, најавува дека сме блиску до онаа точка кога вештачката интелигенција доаѓа на исто рамниште со човечката интелигенција. Со тоа што таа супер интелигенција ќе продолжи да се развива и станува сè посилна (пошто нема друга работа), додека ние ќе си останеме онакви какви што сме. 

Џастин Трудо конечно се соочи со реалноста и поднесе оставка. Човекот кој покажа дека може истовремено да се биде и либерал и автократ. Започна спектакуларно, со домашна и глобална акламација а потоа земјата ја потопи во надмена и елитистичка идеологија. На камионџиите кои тргнаа против неговите ковид политики им ги замрзна банкарските сметки. Малкумина диктатори би се осмелиле на тоа.

Се зборуваше за донации од стотина милиони од Маск за партијата на Фараж, сопственикот на Тесла и Спејс Икс пишуваше дека на Британија ѝ се неопходни Реформистите на Најџел, заедно беа во во Мар а Лаго на Доналд Трамп... и од нигде никаде, Маск пиша дека Фараж „го нема тоа што треба“ за да ја води партијата. Па бар за жена да се скараа.

Холандската десничарска влада планира да го заузда напливот на мигранти, особено оние кои се дојдени по азил, за да има контрола врз вкупниот прираст и димензионирањето на јавните сервиси. Најтешка за економијата е структурата на надворешниот прилив. Некои веднаш се исплаќаат, некои пак, дури и нивните деца не можат да го покријат она што државата го потрошила на нив.   

Во 80-тите години, во Њујорк и особено во некои негови делови, како метрото и Централ парк, беше толку опасно што крадците почнаа да бидат пљачкани од други крадци. Тогаш се појавија групи граѓани кои се самоорганизираа за да се заштитат од бандитите. Неколку децении подоцна, ваквите групи се враќаат. Случајно ли е што речиси сите најнасилни американски градови ги водат демократи?

Се работи за планот на Лабуристите до 2030 Британија да ја постигне границата од нула издувни гасови, а за тоа ќе требаат многу ветерници и фотоволтаици кои главно ќе се произведат во Кина.

По неброени работни часови и милијарди долари потрошени на спасување и чистење на социјалните мрежи од какви лажни и автоматизирани профили, сега Мета планира, не само да го дозволи, туку и да го поттикне креирањето на ботови, кои по ново се викаат ВИ инфлуенсери.

На неполн месец од инаугурацијата на Доналд Трамп за претседател на САД, демократите расправаат за тоа како би можеле да го блокираат враќањето на Трамп на власт, бидејќи „Уставот предвидува дека човек што ја прекршил заклетвата е неподобен да биде претседател“.

На почетокот на инвазијата, Запад се надеваше дека драконските санкции кон Русија не само што ќе го оладат Путин за војување туку и дека ќе доведат до пресврт во расположението на народот, побуна и пад на режимот. Неполни три години подоцна, дури и руските опозициони медиуми резигнирано признаваат дека нема ништо од тоа. „Кухариците“ и другите скрипти не минуваат лесно таму.