Кога ќе почнеш со алишта со неброени иксови на нив, наплаќање две седишта во авион и кино-седишта со вонредни димензии, нормално е да завршиш со пазар кој бара поголеми ковчези. Просечниот Американец денес е 6,8 килограми потежок во споредба со пред 20 години, а просечната Американка за истиот период има качено 7,7 килограми.

Зборувајќи за падот на вредноста на лирата во однос на доларот, околу 10% во изминатите 5 дена, Ердоган се повика за финансиска стратегија која ама еднаш на никого никаде му нема помогнато: „ако тие го имаат нивниот долар, ние го имаме нашиот народ, нашата правда и нашиот Алах.“

Белата куќа официјално ја објави својата намера и план за формирање на вселенски сили, како 6-та гранка на американската војска. За почеток ова во пракса прво ќе значи тегнење на предлогот низ Конгрес во следните најмалку две години.

Зборувајќи за мантрата од добата на Обама, Мајкл Мур промовирајќи го својот анти-Трамп документарец ја опиша „hope“ идеологијата на поранешниот американски претседател како „мрзливо решение“.

Основачот на Тесла на Твитер напиша дека би ја тргнал Тесла од берзата откупувајќи го уделот на сите акционери по цена од 420 долари од акција. Не многу математика подоцна, излезе дека Маск за таков подвиг би требало да плати 50 милијарди долари.

Апелирајќи на традиционализмот и патриотизмот на Полјаците, полската црква побара 100 годишнината од независноста на државата да се прослави со 100-дневно апстинирање од алкохол. Голем дел од прозваните (трезвено) реагираат: тешко тоа.

Зукерберг, човекот кој е прилично лабав со сечија туѓа приватност, сопствената ја чува така што ги поседува сите четири куќи околу неговата куќа во Силициумската долина и купува 40 хектари земјиште околу викендицата на Хаваи притоа на сила иселувајќи ги локалците.

На секој државјанин на Австралија по закон му следува портрет од актуелната британска кралица и истиот треба да биде обезбеден на сметка на државата.

Вештачка интелигенција која скенира вести во потрага по превидени јавни личности состави список од 40.000 успешни научници за кои не постои никаков запис на бесплатната енциклопедија.

Пишувајќи дека Владата започна со официјалниот дел од убедувањето на сопствениот народ да го смени името на сопствената држава, Грикрепортер не е ни најмалку воодушевен како сето тоа уште почеток изгледа издишано.

Глобалниот феномен на „Приказната на слугинката“, романот на Маргарет Атвуд и истоимената серија снимена според него, инспирира мноштво политички, идеолошки и дистописки толкувања. Но она што притоа го забораваат оние кои го слават ова дело, особено од феминистички ракурс, е фактот дека главниот лик, оној на слугинката Офред, е аполитичен. Како нејзин пандан нашиве простори можат да понудат многу појаки примери.

Тоа што Елон пробува да го проработи на западниот брег на САД, Вирџин реши да го прави сред една недојдија од село во Шпанија, каде ќе гради истражувачки центар од 500 милиони долари.

Сириски бегалец кој изминативе 8 години живее во Германија и пишува колумни, во отворено писмо го повика секој Австриец да ги дели своите пари и домот со бегалци, бидејќи „интеграцијата функционира само ако е двострана - само едната страна не е доволна.“

Пред да се приклучи на кампањата на Трамп, Пол Манафорт подолго време не е присутен во Вашингтон. Иако својата репутација ја гради во главниот град на САД, парите ги прави преку море, претежно во Источна Европа, и по нешто во Африка и Азија.

Чистејќи ги каналите низ Амстердам и копајќи нови тунели за метро, Холанѓаните извадија над 700.000 артефакти меѓу кои има и примероци постари и од самиот град кои датираат од 4300-та година пред нашата ера.

И во врвот на Студената војна, германските домови се греат благодарејќи на горивото испорачано преку 4.000 километри долгиот советски нафтовод Пријателство. Иако Пријателство ќе продолжи со работа, апдејтот на руско-германската соработка во форма на Северен тек 2, е сериозен извор на проблеми и притисоци врз Меркел.

Не важно колку е долг одморот се додека тој трае повеќе од 8 дена. Сè што е под оваа бројка ниту има вистински позитивно влијание на вашето здравје, ниту доволно ќе ве опушти за остатокот од работната година.

Група која се опишува како „мрежа за работните жени во Британија,“ што по дефиниција опфаќа и жени лидери, сега од едни треба да трпи критики, а од други да трпи сеир откако реши да назначи маж за претседател на организацијата.

Феминизмот и веганството може да ги поврзува една разбирлива линија на размислување: како одбивност кон агресијата и угнетувањето. Ама ламбичето се пали кога во име на феминизмот, ќе ти додадат и ваков аргумент: Знаете ли дека повеќето животни кои ги јадете се женски? 

Да завршиш каква било работа во Германија во август е еднаков подвиг како да завршиш каква било работа тука во кој било дел од годината. Таму причината е што Германците го сметаат годишниот одмор за едно од основните човекови права.

Денешната левица се соочува со вознемирувачкото искуство, на крајот на една цела епоха на прогресивно движење, искуство кое ја присилува да ги преформулира најосновните координати на сопствениот проект.

Бидејќи немаме ништо добро да кажеме за мамурлакот (освен дека е единствениот процес кој те штити од самоуништување), директно ќе минеме на наука, а според неа многу е веројатно дека си подеднакво зависен од мамурлакот како и од процесот што доведува до него.

Социјалните медиуми создадоа уште еден психолошки деформитет за кој прва помош се бара од - пластични хирурзи. Сè почесто им доаѓаат луѓе со желба да изгледаат како што изгледаат со филтрите на Снепчет. 

Извештајот на германското сојузно министерство за социјални прашања покажува дека за комплетниот систем за социјална заштита во земјата минатата година биле платени 965,6 милијарди евра.