Угледниот и јако влијателен водич низ светските ресторани и кујни стана мета на критики заради неговиот елитистички пристап и фокусираност на западната кујна, истовремено занемарувајќи ја разновидноста на други традиции кои и не се баш локални, како што е индиската кујна. Во негова одбрана, луѓе велат дека врвната кујна која педантно ја рангира Мишелин, секогаш ќе остава впечаток на ексклузивност.  

На популарните протеински плочки се гледа како на брз и ефикасен начин да се внесат толку посакуваните протеини потребни за енергија, мускули и слично. Не е сè така идеално. Испитале преку илјада разни видови протеински плочки. Дури и оние кои не мамат за количината протеини кои ја содржат, орагнизмот не може ни половина од тоа да искористи.

Минатиот месец во Велика Британија почна продажба на кучешка храна со месо произведено во лабораторија. Ако на нивите газди им потекоа лиги, има добри вести: и тие ќе може да се омрсат со истото месо за едно две години. Италија на време ја забрани ваквата идеја. Во Сингапур веќе пет години се продава месо од лабораторија.

Белгиската државна агенција за безбедност на храната деновиве мораше да ја опомене домашната јавност дека божиќните дрвја, како вештачки, така и природни, не се за јадење.

Од сите битки што можеа да ги водат двете престолнини, Берлин и Анкара се фатија за врат околу статусот на донерот и кој ќе каже што е прав донер.

Заради едно погрешно произведено чоколатце Марс, човек од Англија добил и слава и пари како отштета односно компензација. Само што не знаеш што е понекорисно од тие две работи кои ги добил: славата, која е интернет слава (една од најзалудните цели во животот) или парите за обештетување кои изнесуваат цели две фунти.

Повеќегодишна вегетаријанка десет години не сакала да пипне месо од етички причини. Сета таа увереност паднала во вода за време на бременост кога станала анемична а телото почнало да ѝ бара нешто друго од она што стандардно го јаде. Пробала бургер и веднаш се навлекла. Денеска е месар. 

Властите на индиската сојузна држава Утар Прадеш решија да се зафатат со борба со проблеми што не би требало да постојат, ама ете, Индија, и под итно да воведат построги закони против плукање и уринирање во храна.

Европскиот суд ја укина забраната на француската влада за производителите на продукти од растително потекло да ги нарекуваат нивните производи „стек“ или „колбас“, која Париз ја воведе за да ги заштити сточарите. Судот вели дека не може да се забрани нешто кое не е прецизно правно дефинирано.

Македонија е една од земјите кои имаат некои од највисоките проценти на население кое не може да си дозволи да јаде здрава храна. Во тој поглед слични сме со луѓето од Грција и Словачка но ако бараме нешто да нè утеши (а секогаш бараме нешто да нè утеши), тоа не е ништо во споредба со процентот Романци кои можат да си дозволат да се хранат здраво.

Јапонец кој сака да постигне целосна финансиска слобода (да не работи ништо, а да има пари), последниве 20 и кусур години јаде само ориз и живее во фирмата во која работи, само за да се пензионира пред 50 години.

Само 13% од испитаниците изјавиле дека се подготвени редовно да јадат оброци со инсекти, кои во последно време се натураат како еден од столбовите за спас од глобалното затоплување. И тоа мора да се поправи во име на климатските промени, не инсектите, туку вашето гадење од нив.

Академици од Оксфордскиот музеј со пари од британскиот буџет ќе ја истражуваат „политичката природа“ на млекото и неговото „колонијално наследство“, за кое еден од истражувачите тврди дека е „северноевропска опсесија“ која е наметната на остатокот од светот.

Дали нивото на зачинетост и лутина на некоја храна е нешто околу што треба да интервенира државата? Данска мисли дека да. Нејзината државна агенција за храна повлече од пазарот еден популарен вид инстант тестенини од Јужна Кореја со образложение дека тоа е многу луто за нежните дански непца и мешиња.

Сте тркнале скоро до некоја бутка за фаст фуд? Големо мнозинство Американци денес на тоа гледаат како на екстравагантност. Половина од американските потрошувачи оценуваат дека брзата храна во последно време е скапа како да јадеш во пристоен ресторан а некои тврдат дека е и поскапа.

Ако му свртиме грб на црвеното месо и наместо тоа во нашата исхрана се фокусираме на ситната риба како што се сардините, инчуните или харингите, до 2050-та година би можеле да се спасуваат годишно по 750.000 човечки животи на оваа планета. Најголем аир би виделе земјите со среден или мал доход. Супер звучи, а сега малку да попазиме да не ни изгори кременадлата.

Ненаситноста на Французите за жабји батаци е деструктивна за природата и ги загрозува водоземците во Азија и југоисточна Европа, алармираа група на научници и ветеринари.

Вегански ресторан кој или погрешно ја проценил својата публика или своето знаење од веганска гастрономија, ставен пред избор меѓу пропаѓање или воведување месо, одлучил да го распафка ќумурот.

Јужнокорејските одгледувачи на кучиња за јадење се заканија дека ќе пуштат два милиона кучиња на улиците на Сеул доколку владата ја воведе забраната за јадење кучешко месо. Во останатите вести, во Јужна Кореја има два милиони кучиња што чекаат да бидат изедени.

Едно ново истражување открива дека е зголемен јазот меѓу половите на тема кој повеќе готви по дома. Жените готват повеќе оброци од мажите во речиси секоја земја во светот. Освен во една.

Нема крај креативноста на оние кои сакаат на луѓето да им наметнат грижа на совест за состојбата на планетата и и нивниот учинок во климатските промени. Не чини да имаш дете, не чини да имаш куче или маче, а најнечини да продолжиш да јадеш нормално месо (сега кога имаме златни штурци на понуда). Како против месото? Со еко даноци, како против шеќерите.

Во Швајцарија преку училиштата се работи на кампања за убедување на децата да јадат помалку чоколадо, а повеќе инсекти или барем производи од инсекти, пример крекери од скакулци.

Скушата и другите видови сина риба долго време важеа за „храна за работничката класа“ поради достапноста и ниските цени, но сега ѝ се подготвува етикета која сигурно ќе ја поскапи: еколози од запад проценија дека нејзиното консумирање веќе не било одржливо. 

Земјата која има построги правила за тоа како да замесиш тесто за пица отколку што има сообраќајни правила, на сите можни нивоа ќе блокира какво било припарување на „вештачко месо“ во нејзините граници.