Угледниот и јако влијателен водич низ светските ресторани и кујни стана мета на критики заради неговиот елитистички пристап и фокусираност на западната кујна, истовремено занемарувајќи ја разновидноста на други традиции кои и не се баш локални, како што е индиската кујна. Во негова одбрана, луѓе велат дека врвната кујна која педантно ја рангира Мишелин, секогаш ќе остава впечаток на ексклузивност.  

Лондонски стартап, едно време проценет на 1,5 милијарди долари а поддржан од ултра сериозни компании како Микрософт, отиде во банкрот откако беше откриено дека наместо вештачка интелигенција, компанијата користела 700 инженери од Индија да глумат ВИ алатка, односно да комуницираат со заинтересираните кои верувале дека комуницираат со четботот Наташа.

Министерството за одбрана на Холандија објави план за користење на 1.000 хектари земјоделско земјиште за одбранбени цели. Ваквата одлука за дополнително милитаризирање на Холандија се правда со моменталната глобална безбедносна ситуација и хроничниот недостаток на простор во земјата. Земјоделци стравуваат дека на многумина од нив ќе им биде загрозена егзистенцијата. 

Лиз Трас, која беше британска премиерка само 49 дена, на гостување кај Стив Бенон (сè уште влијателен во МАГА круговите), му призна дека кога станала прв човек на Даунинг стрит број 10, верувала дека како премиерка ќе биде капетан на бродот и ќе може да спроведува политики. Набргу сфатила дека полугите на власта не се во нејзини раце туку во рацете на Банката на Англија.

Се вжештува битката за близу 300 милијарди евра што ѝ се заробени на Русија во Европа поради санкциите. Путин предупредува дека нема да преговара за мир додека не ѝ бидат вратени на Москва. Украина ги сака за себе, како воени репарации и за обнова на земјата и војската. Европската Унија сепак им даде приоритет на западни инвеститори што изгубиле бизниси во Русија.

Сеирџиите предвидоа, чекаа и дочекаа. Претседателот Трамп и милијардерот Маск веднаш штом ја прекинаа врската од интерес се спукаа со лични навреди и политички обвинувања. Со гнасотии, лудаци, епштајни, импичменти, дијагнози, сè до тесли и вселенски бродови. Кој знае колку тешко им било да се воздржуваат во 129-дневното пријателство. Давајте од тоа пуканките.

Првиот човек на Советот на Европа ги прифаќа критиките дека Европската конвенција за човекови права по 75 години мора да биде обновена. Девет европски земји протестираа дека Конвенцијата ги ограничува националните политики и спречува депортација на криминалци. Британските конзервативци тврдат дека таа сега се користи како „меч што удира врз демократијата и здравиот разум“.

Образовна невладина организација од Британија бара од наставничкиот кадар кој го стипендираат  да ги отфрлат традиционалните „евроцентрични“ наративи во корист на „деколонизиран“ пристап кон историјата. Според нив, учениците и студентите треба да учат дека Викинзите не биле баш сите бели како што ги замислуваме а дека некои од нив биле муслимани.

Јошуа Бенџо, еден од пионерите на развојот на вештачката интелигенција, развива нов машински систем што ќе ги следи активностите на моделите со ВИ, ќе ги препознава нечесните одговори и ќе ги блокира пред да предизвикаат штета. Нешто како психолог за четботовите, кои веќе покажуваат знаци на „себичност“ и манипулираат со корисниците кога се чувствуваат загрозени. 

Мерењата за забрзаното ширење на Универзумот му ја донесоа на Адам Рис Нобеловата награда за физика во 2011 година и го зацврстија Стандардниот модел на космологијата. Но, новите мерења на Рис покажуваат дека темната енергија што го шири Универзумот згаснува. Космолозите немаат храброст да признаат дека сè што досега знаеле не важи и мора да градат нова теорија.

Првиот голем и сеопфатен преглед за глобалната реакција на пандемијата на ковид-19 потврдува многу слабости: Се манипулирало со дефиниции, модели и статистики за да се доведат луѓето во заблуда и да се принудат на мерки наметнати од политичари. Главната поука за во иднина е да се охрабрат различни научни мислења, а не да се цензурираат научниците што скршнуваат од наративот.

Доналд Трамп ѝ нареди на администрацијата да спроведе истрага за постапките на Џо Бајден како претседател, за да се утврди дали некој од неговите најблиски помошници го прикривал неговиот нарушен когнитивен капацитет и го злоупотребувал за да потпишува документи во негово име. Ако тоа биде потврдено, ќе се создаде основа за поништување на низа одлуки на Бајден.

Ако по некој случај се воведат тотални трговски бариери, една единствена земја во светот произведува доволно храна од седумте основни видови за да може да го прехрани своето население, покажува ново истражување. Шест земји се апсолутно зависни од увоз на храна. Ние сме некаде во златната средина. Ниви и бавчи имаме за орање, но од каде ни риба кога си немаме море?

Администрацијата на претседателот Трамп ги поништи барањата до итните служби низ САД да им овозможат итни абортуси на жени на кои им е загрозено здравјето, дури и во сојузните држави што го забрануваат тоа. Политиката ја воведе поранешниот претседател Џо Бајден во 2022 година, веднаш откако Врховниот суд го поништи правото на абортус на национално ниво. 

Главната обврска на папите е да ја штитат католичката доктрина и да им помогнат на верниците да се соочат со предизвиците. Во духот на своето време, новоизбраниот папа Лав ќе настојува да ги заштити ранливите од „повикувањето на демонот“ и „создавањето дигитален Бог“, како што Илон Маск неодамна го опиша ризикот од неодговорен развој на вештачката интелигенција. 

Најпопуларните порно сајтови Порнхаб, Редтјуб и Јупорн денеска привремено ќе го блокираат пристапот до своите содржини за корисници во Франција, во знак на протест против новиот закон за верификација на возраста. Своите пет минути ги дочекаа Французите што се палат на голите гради на „Слободата“ на Делакроа, која ќе ги пречекува на сајтовите. Другите ќе одморат рака.

Не се чекаше многу Маск да распали по Трамп откако ја напушти Белата куќа. Милијардерот го нападна клучниот закон за даноци и трошоци на својот довчерашен пријател како „одвратна гнасотија“ поради претераното кревање на дефицитот. Најави и политичка одмазда: Ги повика Американците да не гласаат за „предавници“. Всушност Маск е фрустриран зашто му се загрозени бизнисите.

Кај илјадници пациенти во Англија ќе се применува револуционерната „течна биопсија“ со која во крвта на пациентот рано се откриваат фрагменти од ДНК на тумор. Со рутински тест на крвта ќе се избегнат биопсии и скенирања. Тестот ќе биде стандарден за откривање рак на белите дробови, ќе се применува и на жени со рак на дојка, а се планира да се прошири на уште шест видови канцер.

Огромно мнозинство од еврејските Израелци би сакале сите Палестинци да бидат протерани од Газа, покажува ново истражување. Речиси секој втор (47%) нема ништо против да бидат убиени сите Палестинци во Газа. Авторот на анкетата спроведена кај 1.005 Евреи од Израел тврди дека ова не е одраз само на терористичкиот напад на Хамас пред две години, туку било системски негувано.

Одлуката на Трамп да им воведе царини и на непријателите и на сојузниците на САД ја разниша довербата во доларот. Тоа ги поттикна европските амбиции еврото да го замени доларот како глобална резервна валута. Претседателката на Европската централна банка Кристин Лагард го изложи својот план, но Европа се уште нема капацитет за да биде водач на финансискиот свет.

По хаваријата во нуклеарната централа во Чернобил, на урнатините на експлодираниот реактор била забележана чудна мувла, која се ширела по ѕидовите и покрај високото ниво на зрачење. Анализите покажале дека габата се храни со радијација и бара средини со поголемо зрачење за да напредува. Отпорноста на екстремни соли и киселини ѝ го зголемува потенцијалот за примена во ризични средини.

Независна комисија побара од Шведска да ги забрани посвојувањата деца од други земји и јавно да им се извини на илјадниците жртви на меѓународна трговија со деца. Властите во Стокхолм со децении не реагирале, иако имале информации дека меѓу „сирачињата“ што се прифаќаат во Шведска имало и грабнати деца од сиромашни семејства во Азија, Латинска Америка и Европа.

Англичаните и Велшаните ќе ја тестираат ефикасноста на вакцина прилагодена против трипер, прва во светот. На Островот во изминатата деценија за 2,5 пати се зголемил бројот на случаи на гонореја. Се лекува само со антибиотици, но бактеријата ја засилува отпорноста и го отежнува третманот. Ако не фати вакцината, единствената опција против триперот е безбеден секс.

Дизајниран е нов ласерски засилувач што овозможува десет пати поголем проток на информации во споредба со сегашните системи со оптички влакна. Надградувањето на технологијата ќе биде нужна, бидејќи се очекува сообраќајот на податоци да се удвои до 2030 година поради ширењето на услугите за стриминг, паметните уреди и генеративната вештачка интелигенција.