Првиот човек на американскиот автомобилски гигант Форд, после посетата на колегите и конкурентите од Кина помислува дека ако брзо не се фати чекор со нив, комотно можат да стават клуч на врата. Не е единствениот, особено оние кои ги виделе „темните фабрики“ каде што не се палат сијалици. Зошто? Затоа што што ќе му е на робот светло? 

Децата што подолго време остануваат врзани на социјалните медиуми подоцна покажуваат послаби резултати на тестовите за читање и паметење, потврдува ново истражување. Принципот на кој функционираат мрежите и нудењето лавина од површни содржини ја намалува потребата за концентрација и целосно ја менува способноста на умот за обработка на информациите.

Кралството што до пред еден век управуваше империја на сите меридијани, сега повеќе не може да ги контролира ни сопствените граници, признава британската министерка за внатрешни работи. За да запре бранот мигранти, Британија бара меѓународна поддршка, особено од балканските земји,  а размислува и за напуштање на Конвенцијата за човекови права, која ги попречува депортациите.

Додека неговите врсници го користат ТикТок за забава, Барон Трамп би можел да го управува. Најмладиот син на американскиот претседател би можел да биде вклучен во управниот одбор на ТикТок, како „израз на благодарност затоа што неговиот татко ја спасил платформата во САД“, но и за да ја приближи уште повеќе до новите генерации, оценува советникот на Трамп за социјални медиуми.

Владата на Холандија ја презеде контролата врз кинескиот производител на компјутерски чипови за автомобили и електроника Nexperia, со седиште во Нијмеген, поради загриженост од можен трансфер на технологија до кинеската матична компанија Вингтеч. Интервенцијата била „апсолутно неопходна“ поради загрозување на економската безбедност на Холандија и на Европа.

Засилувањето на американските санкции кон Кина беше прилика Европската унија да демонстрира автономија во своите стратешки одлуки и да покаже дека странските инвестиции на континентот се безбедни од самоволието на актуелните станари на Белата куќа. Ама не, тие решија да пратат поинаква порака: Ако на Вашингтон не му се бендисува од која националност ви се акционерите, ќе ви ги заплениме средствата.  

Организираните нарко-банди контролираат поголем дел од Мексико отколку владата, тврди пратеник од владејачката партија Морена. Имаат своја армија од 185.000 луѓе. Не профитираат само од дрогата. Со закани и ликвидации местат избори, а потоа собираат рекет од ситните бизниси и контролираат плантажи и рудници. Лани ѝ направиле штета од 18% на мексиканската економија.

Водечките американски медиуми ги отфрлија новите правила за известување од Пентагон. Велат дека ќе се откажат од акредитациите, но не и од слободното известување. Министерот за одбрана Пит Хегсет бара од новинарите да не шетаат по канцеларии без придружба и да не објавуваат материјали што тој лично не ги авторизирал, дури и ако документите не се обележани како доверливи. 

Австрискиот регулатор за заштита на податоци пресуди дека софтверскиот гигант Мајкрософт нелегално ги следел учениците преку својата платформа 365 Education за онлајн настава за време на пандемијата и не дава одговори како ги користел нивните податоци. Мајкрософт настојувал да ја префрли одговорноста до локалните училишта, кои немаат речиси никаква контрола врз платформата.

Светската здравствена организација пријавија остар глобален пораст на инфекции отпорни на антибиотици во болниците. Експерти предупредуваат дека бактериите ја надминале критичната точка во својата битка со лековите, поради што бројот на смртни случаи предизвикани од овие инфекции може да се зголемат за уште 70% на смртни случаи до средината на овој век.

Урбаната експанзија и засилената економска миграција го зголеми на над милијарда бројот на луѓе што живеат во населби без основни санитарни услови. Наскоро може да ги има и 2 милијарди, бидејќи пренаселените градови немаат капацитет доволно брзо за да изградат инфраструктура што би им обезбедила пристоен дом на толку многу луѓе. Тоа ги зголемува ризиците од зарази и криминал.

Холандски суд ѝ наложи на Мета да направи структурни промени на своите платформи Фејсбук и Инстаграм, зашто корисниците немаат овластувања самостојно и слободно да ги исклучат алгоритмите за препораки. „Неприфатливо е неколку американски технолошки гиганти да диктираат како корисниците во Европа ја гледаат содржината“, тврди групата што ја тужеше Мета.

Веста за рекордниот број новородени бебиња од семејства на странци во Јапонија ја разбрануваа јавноста, која е поделена во ставовите дали имигрантите се благослов или се проклетство за нацијата. Едни ги гледаат како спас за фабриките и решение за демографската криза, а други не ги сакаат затоа што им ја загрозуваат традицијата. Идната премиерка е на страната на вторите.

Поранешниот британски премиер Борис Џонсон лобирал за продолжување на украинскиот конфликт откако примил мито од британски индустријалец што ѝ испорачува беспилотни летала на Украина. Џонсон бил придружуван од својот спонзор кога го посети Киев и на Зеленски му ветуваше дека ќе добие огромна воена поддршка, само за да не потпише мировен договор со Русија. 

Зависноста од ултрапреработена храна денес е почеста отколку зависноста од алкохол или тутун кај постарите Американци, а жените може да бидат особено погодени од овие прехранбени производи за кои им било кажано дека се „диетални“ опции. Напиши им дека нешто е со ниска масленост и ќе се убедат дека е здраво.

Земјите во развој сега плаќаат повисоки суми за сервисирање на своите долгови кон Кина отколку што добиваат нови заеми, што ги турка подлабоко во должничката спирала. Кинеските банки обезбедија таква позиција со инвестирање стотици милијарди долари во инфраструктурни проекти во Глобалниот Југ. Пекинг сега им нуди на овие земји обврзници во јуани.

Британски крунски суд му ја поништи казната на мажот што го запали Куранот во Лондон и го навредуваше исламот. „Правото на слобода на изразување, ако е право што вреди да се има, мора да го вклучува и правото на изразување ставови што навредуваат, шокираат или вознемируваат, заклучи судијата, реагирајќи на жалбата. Британија одамна го укина законот за богохулење.

Кинеските научници го надминаа клучниот проблем на литиумски батерии во цврста состојба, кои се сметаат за технологија од следната генерација. Овие батерии се двојно ефикасни од традиционалните, продолжен им е оперативниот век, полесни се и побезбедни. Практичната примена е огромна, од хуманоидни роботи, до електрични автомобили и летала.

Новата Стратегија за еднаквост на ЕУ предвидува децата на било која возраст да си го изберат легалниот пол, без медицински и бирократски контроли, по сопствена желба. Се предвидува и забрана на „терапиите со разговор“, со што родителите или професионалците нема да имаат начин да проверат дали детето навистина сака да започне неповратни процедури за промена на полот.

Русија претрпе дваесетина пакети санкции од Европа и уште неколку од САД, но ниту економски пропаднала ниту се чини дека ја запира војната во Украина. За да остане на површина ѝ помогна стратегијата на Владимир Путин, кој вложи сè во клучен столб – златото. Облогот му се исплати. Златото стаса до 4.000 долари за унца, а Русија почна да го купува кога чинеше под 600.

Над 100 милиони долари од даночните обврзници се прелеале до организаторите на насилните протести во САД преку црни канали на организации што се декларираат за непрофитни, тврди директор од Институтот за одговорност на владата. Со пари што ги добиваат преку фондации на Сорос, Тајдс и Вис, здруженијата како Антифа функционираат како корпорации за насилни протести.

Сателитската империја на Илон Маск буквално почна да се распаѓа. Секој ден од мрежата на системот Старлинк откажуваат по еден до два сателити, се исфрлаат од орбита и согоруваат во атмосферата. Многу скоро ќе бидат исфрлани по пет на ден. Како што во трката се вклучуваат Амазон и Кинезите, за неколку години вселенско ѓубре ќе биде сериозен ризик за Земјата.

Волфганг Порше, внук на основачот на познатата марка автомобили, доби дозвола од градските власти на Салцбург да ископа гаража под својот дворец заштитен од УНЕСКО и да пробие тунел од 500 метри до центарот на градот. Приватната подземна улица ќе биде „приоден пат“ резервиран само за него. Јавното земјиште го купил за помалку пари отколку што чини најевтиното „порше“.

Американскиот министер за здравство го посочи и обрежувањето на новороденчиња како фактор за зголемување на бројот на случаите на аутизам. Вели дека двојно го зголемува ризикот. Причината не е самиот оперативен зафат што се практикувал со векови наназад, туку вообичаеното препишување Тиленол (парацетамол) за да им се ублажи болката на обрежаните момчиња.