Шест години по смртта на Гадафи неговиот замрзнат имот во Брисел носи камати од милиони долари. Она што не се знае е на кого точно му носи.

„Станав режисер само за да бидам сигурен дека некој режисер нема да ми го зезне сценариото,“ вели човекот кој во филмовите сака да си игра со времето и кој би се убил од досада да треба да прави конфекциски филм. Признава дека со текот на времето, сè поважна му станува добрината на човека, а сè помалку дали е некој паметен, талентиран или успешен. За уплавот на Холивуд (oд различното), за смртта на Дебар Маало (од Мирослав Грчев), за тоа како би изгледал Ајрон Мен кога тој би го режирал, за тоа како е можно во време во кое е толку лесно да се провери вистината, толку да се лаже на ангро. И за разнимити други работи, Милчо Манчевски, изволте.

Секое купување на нова работа создава спирала на потрошувачка која доведува до купување други нови работи, без да се има никаква реална потреба од нив.

Писмо од Славорум, веб-сајт и Фејсбук страна кои, главно со хумор, се занимаваат со животот, културата и суб-културите на Словените, слично како што ние тоа го правиме во македонштина/балканштина. Објаснуваат како добиле прво 3, па 7, па 30 дена забрана на Фејсбук. Нема зезање со левица.

Несигурноста и негативните очекувања создадени од рецесијата (а не од невработеноста) се причина за глобален раст на прекумерната тежина, дијабетесот и проблемите со ментално здравје.

Гардијан започна серија статии со наслов Upside посветени на реалности кои се добри и влеваат верба во иднината. И не е чудно што еден од првите текстови е посветен на Финска, земја која денес е фасцинантна по сите линии а е истата онаа територија која пред 150 години изгуби 250.000 луѓе од глад.

Неполн месец откако една новозеландска компанија им понуди на своите вработени да работат 4 дена неделно а да бидат платени за 5, друга реши да им плаќа бонуси на вработените што со велосипед ќе доаѓаат на работа.

Главниот сојузник на САД во Сирија се повлече од фронтот против ИСИС, за да оди и да се бори против војската на главната членка на НАТО во регионот.

Над 500 доктори и уште 150 студенти по медицина, потпишаа јавно писмо до канадската влада во кое протестираат против покачувањето на докторските плати. Доста им е плата, нека има и за другите.

Деновиве во словачките градови Михаловце и Требишов полицијата спроведе рација во која беа уапсени 7 Италијанци. Неколку дена претходно во Словачка беше убиен новинарот Јан Куциак, кој ја истражуваше словачката мрежа и операции на Ндрангета, вклучително и нивната вмешаност во сомнителни земјоделски зделки и врски со високи политичари.

Сторијата на Њујоркер започнува со брачен пар од Јужна Каролина, кои една есенска вечер ги наоѓаат ѕидовите од својата спална прекриени со стотици и стотици смрдулки, конкретно со кафеава мраморна смрдулка.

За годинава Нетфликс планира снимање на речиси 700 оригинални серии, вклучувајќи и 80 кои ќе бидат снимани во САД, плус 80 филмови.

Не е за паника кога комшии оговараат или се шпекулира по социјални мрежи, станува сериозно кога темата стига до Би-би-си, во случајов темата е млади од Британија кои немаат пари да си ја платат киријата.

Научна студија сугерира дека марихуаната го штити џигерот од злоупотребите на алкохол. Да. Гледате како тоа некој „горе“ фино го смислил. А потоа луцидниот народен гениј кој има отворени чакри кон вишите сфери, тоа умешно го преточил во препораката „лута трава на лута рана“. А дел од вас упорно верува дека ќе бидете во божја милост ако - не мрсите во петок.

„ЦИА секогаш успеваше да најде ентузијастички партнери меѓу локалните елити кои се спремни да се усогласат со нејзините барања за да добијат помош во нивната борба со домашните политички опоненти“, пишува американски професор во статија за тоа како САД, кои сега се мета на руско мешање во нивните внатрешни прашања какви што се изборите, повеќе од 70 години го прави токму тоа низ целиот свет. 

Авио-компанијата Јунајтед ерлајнс одлучи да ги укине досега востановените бонуси за сите вработени, и на нивно место да воведе нешто многу поисплатливо за компанијата - лотарија.

Тони Блер и неговиот Институт за глобални промени решија со онлајн анкета да покажат колку многу луѓе го поддржуваат нивниот став за останување на Велика Британија во ЕУ. Што сум прашуел глупости.

На почетокот на 90-тите, сликите од балканските воени ужаси беа доволни западната јавност да се заинтересира/ангажира за проблемот и да поддржи воена интервенција, а доаѓањето на Кристијан Аманпур во некоја земја беше сигурен знак кој ќе биде домаќин на следната крвава теревенка. Веројатно заради презаситеноста од информациите, таа јавност денес е огуглана на таквите слики и едноставно е индиферентна во однос на војните и страдањата.

Во Барселона периодов се случија две важни работи. Прво, како дел од глобални климатски промени врнеше снег. Второ, се одржа најголемиот саем за мобилни уреди во светот, каде како дел од глобални технолошки промени, главен беше Самсунг со новиот Галакси С9.

Неконтролираното ниво на шеќер во крвта обично се дели на тип 1 и тип 2. Ново заедничко истражување од Шведска и Финска откри дека станува збор за 5 одделни болести, и секоја од нив бара посебна терапија.

За време на Националниот ден на Катар, 18-ти декември, заливската држава на прославата извади 6 Мираж ловци, 6 товарни авиони и ескадрила авиони за обука. Сето ова заедно претставува половина вкупната авијација на Катар, за сега. Во јуни 2017 Катарците потпишаа договори вредни 20 милијарди долари за купување 96 нови воени авиони.

Дел Торо е најдобар режисер и го има најдобриот филм (The Shape of Water), Гери Олдман, непрепознатлив како Винстoн Черчил, е победник кај машките улоги, одличната Френсис МекДорманд зема Оскар за најдобра женска улога, за најдобри споредни ролји прогласени оние на Сем Роквел (цајканот во Три билборди) и Алисон Џени (мајката на Тоња Хардинг). Годинава немаше фрка со пликовите. Водеше Џими Кимел кој рече дека статуетката е пример каков маж му треба на Хoливуд: да ги држи рацете онаму кај што се гледаат и да нема пенис.

Џек Вајт ја најави првата комплетна турнеја на која ќе се блокираат смарт телефоните на посетителите. И посетителите ќе си платат за тоа. Друштвото уметници кое од бина не сака два часа да зјапа во дигнати телефони станува сè поголемо.

Експериментот во кој вестите добија посебен таб и беа иселени од њуз-фидот ќе биде прекинат од Фејсбук по сериозната опозиција и критики на темата. За почеток експериментот беше спроведен врз публиката од 6 држави.