Дури и кога по неколку милиони Американци неделно завршуваат на Завод за вработување, нето вредноста на најбогатите Американци упорно и незапирливо расте, па за сега богатството им е на 10% плус во споредба со почетокот на март.

Во досега невиден здравствен пресврт, медицинска студија, која во повеќе наврати ги нагласува сериозните здравствени последици од пушењето, открива дека во тутунот има некоја супстанца која може да го намалува ризикот од заразување со коронавирус.

Додека жителите на градот и понатаму се на задолжително седење дома, Милано планира да претвори над 35 километри улици во велосипедски и пешачки патеки.

Управите на најголемите британски болници изразија загриженост дека евентуална владина препорака за општо носење маски ќе го поремети ланецот на набавки и дека без маски ќе останат оние на кои најмногу им требаат. СЗО проценуваше дека општото носење маски може да доведе до чувство на лажна сигурност па луѓето да се опуштат.

Науката ја дочека пандемијава неспремна како што ЈНА што го дочека распадот на СФРЈ. Таман глобално се рашири надежта околу комбинацијата анти-маларик со антибиотик, стигнува студија дека кај пациенти третирани со тоа комбо, смртноста е поголема отколку кај оние без таа терапија.

Хрватскиот писател не може да се изначуди со каква леснотија слободарите од Запад и демократските општества почнаа да се одушевуваат од ефикасноста со која тоталитарните држави се справуваат со епидемијата. Па потсетува: дечки, тоталитарните држави во сè се поефикасни. Демократијата има смисла само кога ѝ служи на слободата.

Чешките туристички асоцијации во обид да ги спасат летните аранжмани што ги имаат во Хрватска предложија создавање „корона коридор“ од Чешка до Јадранско море.

Њујорк Тајмс објавил мислење на „наш Крсте“ во нивната рубрика „писма на читатели“ во кое се зборува за нешто со кое тој професионално се занимава во приватната психијатриска ординација во Њујорк. 

Откако Борис Џонсон и брегзитерите го поништија внимателно создаваниот мит за перманентноста на ЕУ, еурофилите тврдеа дека Британија е специјален случај, островска нација која никогаш целосно не се посвети на континентот. Многу е подруго кога Италија ќе се сврти против тебе.

Земјата нема затворено ниту училишта, ниту вежбални, ниту кафулиња или ресторани, но ги има замолено граѓаните да се однесуваат одговорно и да следат правила за социјално дистанцирање. И за сега ништо апокалиптично не се случи во земјата.

Иако светско жариште, иако извор на најтрагичните вести и статистики повеќе од еден месец, Италија им овозможи на деца со аутизам да излезат од дома и да си играат во парк, кој посебно се реорганизираше за нивните потреби.

Човештвото ќе мора да живее со заканата од коронавирус „во догледна иднина“ и да се адаптира на тоа бидејќи нема гаранција дека може успешно да биде развиена вакцина, порачува еден од водечките светски експерти околу болеста професорот по глобално здравје на Империјалниот колеџ од Лондон, Давид Набаро.

Не се работи за тоа каде се направени, колку се квалитетни и веродостојни. Овојпат суштината не е медицина и технологија, туку -  статистика. 

Бидејќи имаат повеќе нафта отколку што имаат капацитети за складирање, производителите на нафта од САД се присилени да плаќаат пари за да се ослободат од вишокот нафта со кој располагаат. Моменталната цена на нафтата е - 2 (минус два) долара за барел.

Тестирале клошари од еден шелтер за бездомници: речиси нема кој нема вирус ама па не речиси, туку баш ниеден не се разболел од тоа.

Студија на Харвард покажа дека долгорочната загаденост на воздухот е тесно поврзана со актуелната стапка на смртност од ковид-19 во тие средини. Дури и најмала покаченост на ПМ 2,5 честичките сериозно ја менува равенката. 

Коронавирусот го има добиено името по специфичната круна/ореол кој го има вирусот кој инаку е сличен на оној на грип. Кога Џун Алмеида во научен магазин го пријавила она што го открила, била одбиена со образложение дека тоа е обичен вирус на инфлуенца, само лошо снимен. 

Луѓето забележуваат промени во сопственото и однесувањето на другите луѓе, а забележуваат промени и општо во заедниците во кои живеат, во околината и во природата, и кај сите овие промените (по првичното алчење по тоалет хартија) главно се на подобро.

За среќа, контра-науката се има собрано таков живописен џган што се чувствуваме природно имунизирани да бидеме инфицирани од нив. Ама па и другиве се за чудење. Ем глобалново срање ги начека со прстот во уста, ем отпосле ќе најдат безброј детали за да те излудат. По најново, спокојното зборување е опасно за пренесување вирус. Оукеј, само ќе дигаме веѓи и ќе си фрламе ишарети.

Дури и откако ќе заврши карантинот и ќе се даде дозвола за глобално продолжување на животот, тоа продолжување нема да биде од истото место на кое застана во февруари / март, туку ќе биде со сериозни измени и комплетно нови навики. Предвидувањето на Италијанците е дека една од новите навики ќе биде одење на плажа во плексиглас кафези.

Сите што посетувале каква било настава / градинка до 11-годишна возраст се враќаат во училниците, одлучи владата на Данска.

Колку и да се важни физичкото дистанцирање и само-изолацијата за намалување на ширењето на коронавирусот, не треба да се игнорира дека овие мерки земаат данок во психичко здравје.

Домашниот притвор ќе заврши само и само кога ќе се стабилизира бројот на луѓе кои го имаат вирусот и кога здравството ќе има доволно капацитет за да се справи со бројот на заболени. Во пракса ова значи дека тие што нè затворија по дома периодов треба како знаат да најдат доволно тестови за масовно тестирање и да го унапредат системот да може да се справи со заканата, инаку џабе дремењето по дома.

Она што требаше да биде почеток на туристичка сезона во Грција ќе биде почеток на бранот на банкроти, предупредуваат од грчката комора на хотелиери.