Запрашан зошто продолжил да оди на гости и да престојува кај Епстин дури и откако милијардерот бил обвинет за педофилија, одговорот на британскиот принц Ендру (титула која му носи слободен претстој на безброј места низ светот) е - па некако беше пријатно.

Во развој на настаните кој личи на неинвентивен холивудски римејк на филм од 70-те, претседателот на Боливија мораше да избега од земјата откако тамошната армија „го замоли“ да си даде оставка. За да биде римејкот комплетен, по неговото заминување обидот на домородните Боливијци да се кренат против воениот удар, беше дочекан со палки, солзавец, скршеници и неколку мртви.

Мајкл Керол порано бил ѓубреџија а денес е рудар. Во таа работна траекторија нема баш многу материјал за филм ако не беше еден период во неговиот живот во кој Керол списка 11 милиони евра.

Официјално поранешниот њујоршки градоначалник и актуелен мултимилијардер, се уште се нема приклучено во трката за претседателски кандидат на демократите. Исто така официјално тој започна 100 милиони долари вредна кампања со реклами против Доналд Трамп.

Само неколку дена по посетата на Џинпинг на Грција (која ние ја проследивме преку субмисивниот говор на домаќинот), кај нашите соседи веќе има плодови од договорената поблиска соработка меѓу двете земји. Во Атина се уапсени 4 лица заради медитирање. Медитирале на начин кој на Кинезите ама ич не им се допаѓа.

Во вест што ќе го израдува секого кој објавува постови за порција крилца на попуст и сонува дека еден ден може ќе дотера и до пар патики, агенција за анализа на пазарот објавува дека цените за инфлуенсерството се скокнати за над 10 пати.

Еден од најголемите сервиси за примање и плаќање пари без никаква најава одлучи да ги прекине сите врски со Порнхаб, и со тоа да го блокира изворот на финансии за стотици илјади „модели“.

А кој досега ви забрануваше да соработувате? Која беше пречката за соработка и нормализирање на односите, ако не вашите национализми, кои сега треба да бидат нахранети со Македонија, Босна и Херцеговина и Црна Гора? Сојузот кој го прават Вучиќ и Рама, со учество на Заев како „корисен идиот“,  е тампон зона поставена пред вистинскиот Шенген, која за разлика од некогашната „Мала Антанта“, наместо од воени закани, ќе штити од миграција.

ЦЈР (Columbia Journalism Review) доаѓа до еден отворен документ на кој американски новинари (од публикации како Њујорк тајмс, Вашингтон пост..) анонимно пишуваат колку пари заработуваат од тоа што го работат. И тие и ние имаме причина за плачење, само по различна основа.

Веројатно најпознатото филмско студио во последните 80 години, неделава ја лансираше својата стриминг платформа Дизни плус. Во неа има речиси сè од импозантниот анимиран, филмски и документарен капитал на Дизни и пријателите. Проблемот е во она „речиси сè“.

Заради лошото време производството на кромид во Индија годинава доживеа дебакл, а оди зготви прописен индиски ручек без кромид.

Што е полошо од 30 до 50 диви свињи? 30 до 50 диви свињи на кокаин.

Околу 20.000 вработени на Хуавеи се наградени за нивните напори за минимизирање на ефектите од американското ембарго врз компанијата, и тоа со сума од вкупно 286 милиони долари.

Минатиот месец во една ноќ во Стокхолм имаше 3 експлозии на бомби. Просекот на експлозии во градот е од Втората светска војна до пред некое време е - ниедна.

Расистичките дела понекогаш или секогаш се оправдани, е ставот на повеќе од половина анкетирани Италијанци по серијата расистички и анти-семитски инциденти во земјата.

Просек од 15% неточни одговори е најдобар и најбрз начин за учење, тврдат луѓе длабоко запознаени со учење.

Ко што вика еден пријател, во нашиот Матрикс и тоа се случи, да имаме роботи - стечајци (така е кога не знаат синдикално да се организираат). Веста е дека Адидас ги затвора своите роботизирани фабрики во Европа и САД и ги сели во Азија.

Во новите правила што Јутјуб ги воведува од декември (по основа кој не сака, слободно нека напушти), компанијата „нема обврска“ да хостира ничие видео што не и се бендисува, а и тие што ги хостира ќе треба да почнат да носат пари.

Деновиве француската левица излезе на протест против исламофобијата во земјата, претходно имаше отворено писмо против истата, меѓутоа најзабележително на двете беше отсуството на дел од истата таа левица.

Во врвот на 220 милијарди долари вредната афера, Данске банк на своите клиенти им нудела златни шипки за полесно криење на нивните богатства.

Родителите што сакаат нивните деца празнициве да се сликаат со Дедо Мраз во лондонски Хародс, ќе треба да направат минимум 2.320 евра (2.000 фунти) сметка во стоковната куќа за да се квалификуваат.

Исто као нас, Делхи има сериозни проблеми со ужасно загадениот воздух. Исто како нас, Делхи да ти имал и сериозни политичари кои знаат да помогнат со драгоцени совети.

„Европскиот проект отсекогаш служел да му го олесни животот на капиталот. Затоа толку многу го сакаат мултинационалнтие компании“, пишува економскикот уредник во Гардијан.

Американски робијаш умира накратко, во клиничка смрт, по што го враќаат во живот. Сега тврди дека со тоа ја отслужил доживотната казна затвор. Има логика. ама не наиде на разбирање кај судиите.