Во очајнички обиди да се одржи во живот наративот за итна закана од климатските промени, се нудат и решенија што ќе ја спржат земјата побрзо од какво било глобално затоплување. Инженери предлагаат авиони да прскаат сулфур ниско на небото за да се создаде сенка што би ја оладила планетата. Самите признаваат дека сулфурот брзо ќе падне во форма на убиствени кисели дождови. 

Не знаеме какви се оние ликови кои би фрлиле илјадници долари за џиџ-миџи сувенири со ликот на Доналд Трамп, убедени дека нивната вредност ќе им се зголеми десетина пати после неговата победа на изборите. Ама знаеме кои би ги убедиле и на крајот офајдиле од таквите наивци - легендарно досетливите велешани.

Мета најавува револуција во дигиталното рекламирање, преземајќи сè врз себе, од креативноста до пласманот и продажбата. Бизнис што сака оглас на Фејсбук ќе треба само да го опише својот производ и да плати. Мета ќе го визуелизира производот, ќе ја пласира рекламата кај таргетирани корисници и ќе им овозможи да го купат. Спремете се за уште повеќе реклами со вештачка интелигенција.

Акцијата на Трамп за кратење на непотребните трошоци се одразува врз Обединетите нации – глобален пример за бирократија со сите нивни агенции, одделенија и канцеларии, а без видливи резултати. Внатрешната анализа открила  преклопување на мандатите, неефикасно користење на ресурсите, фрагментација и дуплирање и надуеност на високите позиции. Сето тоа ќе се чисти.

Група тврдокорни конзервативни католици се залагаат следниот папа да биде подобро усогласен со нивните ставови и се чинат решителни да користат тактики за да ги дискредитираат кандидатите што не им се по волја. Кога ќе почне конклавата во Ватикан ќе имаат тешка битка, бидејќи 80% од електорите што го избираат новиот папа се либерали назначени од Франциско.

„Светиот грал“ на енергијата, чудото од фузиски генератор ИТЕР, конечно ја доби својата централна компонента – најголемиот магнет во светот. Реакторот е замислен да биде контролирано Сонце на Земјата што ќе создава практично неисцрпна струја хранејќи се со вода и без загадувања. Трошоците скокнаа четирикратно, но што се 20 милијарди за неисцрпен извор на енергија.

Постои надеж дека ова „бунтовништво на средната класа на тинејџерски хормони“, конечно ќе престане да се восхитува на својата големина и бројност и ќе влезе во политиката, пишува универзитетскиот професор по историја Чедомир Антиќ, некогашен водач на студентските протести против Милошевиќ и ја рецензира програмата која српските блокадерите неодамна ја извадија. Општи места, јалов анархизам, незнаење, Црвени Кмери....

Алатки за компјутерски монтирани снимки одамна можат да го прелажат човекот дека се вистински. Дипфејк технологијата за десетина години стана толку напредна, што сега го доловува и пулсот на манипулираниот лик - ситница невидлива за човековото око, која за машинските детектори беше сигурен белег дека содржината е измама. Како ли ќе биде за десет години од сега?

Ии рикнал системот за читање на електронските картички за наплата па операторот решил да ги подигне сите рампи на 106 наплатни пункта бидејќи дефектот бил нивен а автомобилите имаат право да минуваат. Подоцна операторот им рекол дека сепак е фер да платат што возеле по автопат. 24.000 совесни Јапонци се согласиле дека е така и се пријавиле да платат. 

Трамп силно го почна вториот мандат со бран наредби што ги урнаа политиките на режимот на Бајден за цензура, регулатива, родова идеологија и гранична контрола. Оваа фаза на брз оган, шок и стравопочит остави впечаток на власт со чувство за цел и динамика. Но по серијата погрешни чекори, хиперактивниот пристап на Трамп сега изгледа повеќе несовесно отколку стратешки.

Финска, најчесто посочувана како пример за квалитетно образование на децата, им се приклучи на земјите што решија дека на мобилните телефони не им е местото во училниците. Не само што го одвлекуваат вниманието за време на наставата, туку и за да се поттикне развојот на социјалните вештини и да им се остави повеќе време за игра на децата за време на одморите.

Додека се прават очајнички дипломатски напори како да запре тригодишното крвопролевање на фронтот, украинските власти создадоа систем сличен на видео-игра за да ги поттикне војниците да убиваат повеќе руски трупи. Секој убиен војник или и уништен тенк носи поени, со кои потоа може да се купи уште повеќе оружје за уште повеќе убиства. Човечкиот живот вреди 6 поени.

- Како да познаеш кога адвокат лаже? - Му мрда устата.... Поради вакви и слични јадачки за адвокатите, нивната етичност, лакомост и слично, денес секој трет Британец би претпочитал пред суд да го застапува вештачка интелигенција а не адвокат. Тоа сведочи за напредокот на новата технологија, но и за недовербата во адвокатите и фрустрираноста на граѓаните од елитистичкиот правен систем.

Стратегијата на Европската Унија до 2030 година да самата да ги произведува чиповите што ѝ се потребни е „длабоко исклучена од реалноста“ заклучија ревизори. Предизвикот е сериозен, бидејќи индустријата и домаќинствата зависат од увезени микрочипови повеќе отколку што се мислеше. Секој трет чип во автомобилите или машините за перење во Европа е произведен во Кина.

Основната причина за затемнувањето во Шпанија не беа временските услови. Тоа беше структурната ранливост од претераното потпирање на обновлива енергија базирана на инвертери, без доволно резервна моќ, инерција или стабилизација, што ја даваат тешките машини. Ова можеше да се спречи ако политичките лидери ги слушаа предупредувањата наместо да ги ингорираат.

Лабуристите го игнорираа реформистот Најџел Фараж, а потоа и конзервативците кога бараа да се отфрли политиката за „нето нула“ емисии на гасови. Тони Блер бара уште порадикални промени – да се укинат и глобалните конференции за климата, зашто не даваат резултати. Решението за климатската криза треба се бара во прагматични иницијативи и вложувања во нови технологии.

Водач на вооружена група што учествувала во колежот во Руанда повеќе од две децении се криел во ексклузивна заедница на Лонд Ајленд, каде што чувал пчели и средувал градини на богати имоти. Може да добие 30 години затвор за лажно сведочење за натурализација во САД. И тоа е поблага казна од доживотниот затвор што му го изрече Специјалниот суд за геноцид во Руанда.

На Шпанија и на Португалија ќе им требаат седум дена за да се опорават од десетте часа без струја. На Европа ќе ѝ биде потребно многу повеќе време за да ја закрпи електричната мрежа и да го среди регулаторниот хаос на „единствениот“ пазар. Главниот проблем се парите, но Европската Унија  веќе реши големите пари да одат кон воената индустрија.

По една година дигитална рехабилитација, Мајкрософт повторно ја лансира алатката Рикол, како придружник на моделот со вештачка интелигенција Копилот. Алатката импресивно добро ја извршува својата функција. Снима буквално сè што се случува на компјутерот и комуникациите преку интернет. Ако тоа звучи како кошмар за приватноста, сомнежите се основани.

Крајно време беше, реагираат туристите што ги посетиле Пирамидите во Гиза на најавата дека ќе биде реновирана најголемата туристичка локација во Египет. Нема да се малтерисува фасадата ниту ќе се копаат нови тунели, но ќе мора да се расчистат ѓубрето, турканиците и сообраќајниот хаос околу единственото светско чудо од антиката што преживеало до денес.

Бредфорд Смит е парализиран, апарат за дишење го одржува во живот, може да ги мрда само очите, јазикот и краевите од устата, но сега повторно може да комуницира и тоа со сопствениот глас. Ова му го овозможило електронскиот чип од Неуралинк што му е вграден во мозокот. Со јазикот движи курсор и составува реченици, кои ги вокализира моделот Грок со вештачка интелигенција.

Претерано користење ултраобработена храна - како месо, житарки или готови оброци, го зголемува ризикот од прерана смрт, покажува глобално истражување. Ваквата храна веќе содржи превисоки концентрации на масти, сол и шеќер, а уште поголема штета создаваат адитивите за боја, вкус и засладувачите. На секои 10% внесена брза храна, ризикот за прерана смрт се зголемува за 3%. 

Зошто во фабричките хали во Кина не се запаленo светло? Зашто нема работници. А сепак има производство 24/7. Роботите управувани од вештачка интелигенција беа одговор на Кина против стареењето на нацијата и демографскиот пад, но може одлично да послужат и како одбрана од тарифите. Масовната автоматизација ги намалува трошоците и го подобрува квалитетот.

Пекинг засилено ангажира невладини организации за да ја бранат Кина пред Обединетите нации од обвинувањата за грубо кршење на човековите права во Ксинџијанг, Тибет и Хонг Конг. Целта е пофалбите да ги задушат критиките. Ги фотографираат оние што креваат глас за да ги заплашат. Тактиката функционира. ОН не прават и не сакаат да прават разлики помеѓу невладините групи.