Се рзбира дека прашањето и дилемата се глупави. Но, баш таков е светот во кој живееме. Студенти на престижната Лондонска школа за економија пробале да откажат дискусија за сексуалните злосторства извршени од Хамас за време на нападите од 7 октомври 2023 година. Глејте сега ова: да не се зборува за силувањата на Хамас побарале феминистките од кампусот.

Комунистичката партија на Кина од понеделник зад затворени врати ќе го трасира економскиот пат на земјата во следните пет години. Ако се суди според професионалниот профил на делегатите, може да се очекува да додаде уште повеќе гас на големи инфраструктурни проекти и на иновации, со кои веќе се проби во светот. Но, економијата вели дека и ова има свој врв, по кој следува пад.

Германскиот канцелар практично веќе ја признава легитимноста на талибанските власти во Кабул, во обид да склучи договор со милитантната група за депортација на мигранти во Авганистан. На талибанците ова им овозможува да го развеат знамето на Емиратот во Берлин и да се вратат на меѓународната сцена. Австрија и Белгија внимателно го следат развојот, за да се уфрлат во шемата.

Спортистите го достигнуваат својот максимум до 30 години, шахистите до 40, но ако се сумираат сите квалитети на човековиот ум, тие го достигнуваат својот максимум на 55 до 60 години, покажува ново истражување. Луѓето на оваа возраст се најефикасни за решавање сложени проблеми и лидерство. Ете им научен аргумент на властите да ја зголемат возраста за пензионирање.

По нападот на Хамас врз Израел пред две години, еврејските конгресмени во Калифорнија си поставија приоритет да се борат против антисемитизмот и составија список на фрази и идеи што не смее да се спомнат во училниците. Но, дури и автори што ги поврзуваат антиционизмот со омразата против Евреите се согласуваат дека забраната за слободата на изразувањето прави поголема штета.

Брисел предлага нова одбранбена стратегија што би требало до 2030 година да ја направи Европската Унија спремна за воен судир со Русија. Документот предвидува европските земји повеќе да купуваат оружје заедно, наместо посебно, и да ги фаворизираат домашните индустрии. Нема сигнали дека од Брисел ќе излезе и некаква стратегија за мир со Русија.

Анализа на 800.000 европски автомобили покажа дека реалното загадување од плаг-ин хибридите е речиси пет пати повисоко од декларираното, одредено на тестови во лабораториски услови. Возилата чии батерии се полнат од електричната мрежа загадуваат речиси исто со колите на бензин. Промовирајќи ги овие возила како „зелени“, производителите заработиле милијарди евра.

Иако пред две години ЕУ договори Закон за азил, повеќето европски членки не сакаат да прифатат мигранти на своја територија за да им помогнат на најоптоварените земји – Грција и Италија. Тие, пак, не ги примаат барањата за азил на луѓето што продолжиле кон север. Конфликтот води кон укинување на Шенгенската зона и повторно кревање на огради и гранични контроли.

Глобалниот државен долг е на пат да се изедначи со светскиот БДП до 2029 година, што не било уште од крајот на Втората светска војна, предупредува Меѓународниот монетарен фонд. Вкупниот долг пораснал побрзо од очекуваното поради пандемијата на ковид, кога креаторите на политиките презедоа мерки за заштита на граѓаните и спасување на тешко погодените бизниси.

Вечната научно-фантастична тема дали треба да ги бараме вонземјаните меѓу нас на Земјата, наместо по далечни соѕвездија, добива понагласена научна димензија. Истражувајќи бази со податоци за човечка ДНК, биолог пронашол невообичаени генетски секвенци што не се наследени од родителите и чие постоење не може да се објасни и водат кон претпоставката дека се вметнати.

Европратениците воведоа построги мерки против авиокомпаниите, кои битката за поголем профит ја водат врз грбот на патниците, набиени како сардини во авионите. Ќе биде зголемена отштетата што компаниите ќе мора да ја платат за одложувања на летови, а патниците ќе добијат право без доплата да носат поголеми и потешки куфери покрај рачниот багаж во кабините. 

Првиот човек на американскиот автомобилски гигант Форд, после посетата на колегите и конкурентите од Кина помислува дека ако брзо не се фати чекор со нив, комотно можат да стават клуч на врата. Не е единствениот, особено оние кои ги виделе „темните фабрики“ каде што не се палат сијалици. Зошто? Затоа што што ќе му е на робот светло? 

Децата што подолго време остануваат врзани на социјалните медиуми подоцна покажуваат послаби резултати на тестовите за читање и паметење, потврдува ново истражување. Принципот на кој функционираат мрежите и нудењето лавина од површни содржини ја намалува потребата за концентрација и целосно ја менува способноста на умот за обработка на информациите.

Кралството што до пред еден век управуваше империја на сите меридијани, сега повеќе не може да ги контролира ни сопствените граници, признава британската министерка за внатрешни работи. За да запре бранот мигранти, Британија бара меѓународна поддршка, особено од балканските земји,  а размислува и за напуштање на Конвенцијата за човекови права, која ги попречува депортациите.

Додека неговите врсници го користат ТикТок за забава, Барон Трамп би можел да го управува. Најмладиот син на американскиот претседател би можел да биде вклучен во управниот одбор на ТикТок, како „израз на благодарност затоа што неговиот татко ја спасил платформата во САД“, но и за да ја приближи уште повеќе до новите генерации, оценува советникот на Трамп за социјални медиуми.

Владата на Холандија ја презеде контролата врз кинескиот производител на компјутерски чипови за автомобили и електроника Nexperia, со седиште во Нијмеген, поради загриженост од можен трансфер на технологија до кинеската матична компанија Вингтеч. Интервенцијата била „апсолутно неопходна“ поради загрозување на економската безбедност на Холандија и на Европа.

Засилувањето на американските санкции кон Кина беше прилика Европската унија да демонстрира автономија во своите стратешки одлуки и да покаже дека странските инвестиции на континентот се безбедни од самоволието на актуелните станари на Белата куќа. Ама не, тие решија да пратат поинаква порака: Ако на Вашингтон не му се бендисува од која националност ви се акционерите, ќе ви ги заплениме средствата.  

Организираните нарко-банди контролираат поголем дел од Мексико отколку владата, тврди пратеник од владејачката партија Морена. Имаат своја армија од 185.000 луѓе. Не профитираат само од дрогата. Со закани и ликвидации местат избори, а потоа собираат рекет од ситните бизниси и контролираат плантажи и рудници. Лани ѝ направиле штета од 18% на мексиканската економија.

Водечките американски медиуми ги отфрлија новите правила за известување од Пентагон. Велат дека ќе се откажат од акредитациите, но не и од слободното известување. Министерот за одбрана Пит Хегсет бара од новинарите да не шетаат по канцеларии без придружба и да не објавуваат материјали што тој лично не ги авторизирал, дури и ако документите не се обележани како доверливи. 

Австрискиот регулатор за заштита на податоци пресуди дека софтверскиот гигант Мајкрософт нелегално ги следел учениците преку својата платформа 365 Education за онлајн настава за време на пандемијата и не дава одговори како ги користел нивните податоци. Мајкрософт настојувал да ја префрли одговорноста до локалните училишта, кои немаат речиси никаква контрола врз платформата.

Светската здравствена организација пријавија остар глобален пораст на инфекции отпорни на антибиотици во болниците. Експерти предупредуваат дека бактериите ја надминале критичната точка во својата битка со лековите, поради што бројот на смртни случаи предизвикани од овие инфекции може да се зголемат за уште 70% на смртни случаи до средината на овој век.

Урбаната експанзија и засилената економска миграција го зголеми на над милијарда бројот на луѓе што живеат во населби без основни санитарни услови. Наскоро може да ги има и 2 милијарди, бидејќи пренаселените градови немаат капацитет доволно брзо за да изградат инфраструктура што би им обезбедила пристоен дом на толку многу луѓе. Тоа ги зголемува ризиците од зарази и криминал.

Холандски суд ѝ наложи на Мета да направи структурни промени на своите платформи Фејсбук и Инстаграм, зашто корисниците немаат овластувања самостојно и слободно да ги исклучат алгоритмите за препораки. „Неприфатливо е неколку американски технолошки гиганти да диктираат како корисниците во Европа ја гледаат содржината“, тврди групата што ја тужеше Мета.

Веста за рекордниот број новородени бебиња од семејства на странци во Јапонија ја разбрануваа јавноста, која е поделена во ставовите дали имигрантите се благослов или се проклетство за нацијата. Едни ги гледаат како спас за фабриките и решение за демографската криза, а други не ги сакаат затоа што им ја загрозуваат традицијата. Идната премиерка е на страната на вторите.