Поради контроверзите околу туц-муц ставот за Хамас, Клодин Геј даде оставка од челната позиција на Харвард. Подбутнаа моќни конзервативни донатори кои се незадоволни од „разбуденоста“ во оваа елитна институција. Нит да се штити, нит да се реформира, Харвард треба да се руши, смета еден автор за кого ваквите институции се главната пречка кон идеалот за слободно образование за сите.

Гледајќи го изгледот на украинскиот претседател последниов период, колумнистот на британски Телеграф констатира дека „уморниот Зеленски изгледа премногу слаб за да може да постигне победа.“

САД и британската компанија БАЕ го обновуваат производството на моделот на хаубица М777 која се покажа како едно од најуспешните западни оружја испорачани на украинскиот фронт. Претходно, последната нарачка за оваа хаубица е направена пред 5 години.

Не е ново дека пластичните шишиња испуштаат нано-пластика во водата (а и друга течност) спакувана ви нив, ново е дека таа бројка изнесува 250.000 парчиња на литар.

Поглаварот на римокатоличката црква одамна го смета сурогат мајчинството за нехумана практика која е понижувачка и за мајката и за детето. Пред некоја година ја нарече „матка на изнајмување.“ Франциско бара глобална забрана на оваа практика и порачува дека е жално едно дете да постои на основа на комерицјален договор.

Заради создавање хаос кој го загрозува животот на останатите, вклучително и оние на кои им се потребни итните служби, секој што ќе се реши да блокира комплетен сообраќај во име на климатски правдини треба да заврши во затвор, предлага германската ЦСУ.

Инженери дизајнирале вибрирачка пилула за слабеење која може да создаде чувство на ситост. Капсулата е со големина на капсула мултивитамин, а во експериментот со свињи, го намалувала апетитот на животните. Пилулата останува во дигестивниот тракт четири до пет дена, со тоа што, после тоа, од веце шољата ќе слушнете едно „цангрр“, пошто од себе ќе испуштите моторче со батерија.

Кога во 2019 САД го отсече Хуавеи од пристапот до каква било американска / западна технологија и пазари, очекувањата беа дека за некоја година компанијата ќе ја снема од пазарот. 2023 Хуавеи ја заврши со продажба од 98,7 милијарди долари.

Два месеца откако Абрамсите влегоа во Украина, допрва треба да се види каква било трага од нив на фронтот. Како што пишува Форбс, не е јасно што прават 31 Абрамс тенк во Украина, ама јасно е што треба да почнат да прават: да го засилат својот оклоп за да парираат на руските камикази дронови.

Истражни органи во Англија го истражуваат првиот случај на „силување“ во метаверзум, откако девојче било „нападнато“ во видео игра за виртуелна реалност. Нема физички повреди бидејќи и немало физички напад, но малата била вознемирена откако нејзиниот дигитален лик бил нападнат во виртуелна „соба“. А за оние силни убиства во катаљарда игрици, кога ќе почнат истраги?

Американски новинар решил да пресмета колкав е неговиот личен придонес кон војната и страдањата во Газа. Тргнал од данокот што ќе го плати и да смета колкав е тоа дел од американските пари што се слеваат во израелската држава. Не му испадна некоја голема сума но и толку не му се дава за да страдаат цивили и деца. Така доаѓа до потешкото прашање на кое, за жал, не наоѓа одговор.

Откако афро-американката претседателка на Харвард си даде оставка затоа што беше фатена дека трудови низ нејзината кариера што ја донеле до оваа позиција биле плагијат, една од најголемите глобални новински агенции оцени дека барањето плагијати станало алатка на конзервативците против колеџите.

Користејќи сателитски снимки и вештачка интелигенција, истражувачи ја мапираа човечката активност на море со поголема прецизност од кога било досега. Се обелодени огромна индустриска активност што претходно не беше детектирана, од сомнителни  риболовни операции до експлозија на енергетски сектор во водите.

Еден од највисоките офицери на холандската армија и порача на војската и општо на своите сограѓани дека треба да почнат да се подготвуваат за војна со Русија.

Во време кога Суецкиот канал стана проблематичен за користење, Панамскиот, кој е една од главните кратенки на глобалниот поморски сообраќај што на глобалната трговија и скратува неброени километри и пари за транспорт, периодов е неупотреблив бидејќи нема вода.

13 годишен тинејџер од Оклахома е првиот човек кој успеа да победи во Тетрис, прочуената Нинтендо игрица, која постои цели 34 години. Интересно е што до пред неколку години се веруваше дека на Тетрис има најмногу 29 нивоа. Малиот стигна до 157 ниво по што играта се скрши.

Од 18-те Леопард 2 тенкови што Германија и ги испрати на Украина речиси сите или се уништени и оставени на фронтот или се идентично неупотребливи како никогаш да не биле повлечени од фронтот, затоа што дремат на сервис а нема резервни делови.

На денешен ден на планетава речиси и да не постои случај на историска сиромаштија, беда и глад која не е директно поврзана со некоја од големите западни колонијални сили. Пример, хуманитарната катастрофа која се уште се одвива во Хаити од една и Франција, САД и банките, од друга страна.

Германските социјалдемократи минатата година никако не успеаа да пркнат во рејтинзите, а анкетите покажуваат дека тоа што најмногу им смета на рејтинзите е нивниот лидер и канцелар, Олаф Шолц.

Два тазе примера од островот: шеф на албанска мафија осуден за шверц на милиони фунти останува во земјата затоа што има право да биде со семејството. Друг, од Судан, илегално влегува во државата и добива азил за да не го мачат ако се врати во матичната земја. По азилот, без никакви проблеми оди и се враќа од таму. А нас бескрајно нè тупат со визи.

На времето, кога беше јак, некогашниот њујоршки градоначалник Руди Џулијани, великодушно се откажа од пензијата која му следуваше, препуштајќи ги парите на градот кој го водеше. Сега кога е рикавела и мораше да прогласи личен банкрот, поштено се кае што дигнал раце од таа добивк, која досега ќе му донесеше околу половина милион долари.  

Раатот на источното крило на НАТО може да биде осигуран само ако Русија излезе уништена од војната со Украина, порачува висок европски одбранбен функционер.

Иако до сега само неколку луѓе стигнале до таму, научниците бараат на Месечината да се воведат национални паркови кои целосно ќе останат недопрени од човештвото и отпадот што човечките експедиции го оставаат зад себе.

Има цела деценија како главните политичари низ Европа престанаа да ветуваат подобрување на  животниот стандард на нивните гласачи и наместо тоа, понудија планови тој да се ограничи. Очекуваа повисоките трошоци за живот и деиндустријализацијата да биде мазно прифатено затоа што сето тоа требаше да се прави во име на „спасување на планетата“ од климатските промени.