Во калкулациите на Убер, роботаксијата се како патнички авиони: создаваат трошоци дури и кога не превезуваат патници. Колку повеќе патувања прави секое возило, толку повеќе приходи компанијата може да извлече од скапата инвестиција, која освен единечниот трошок за купување опфаќа и одржување на возилата, осигурување и користење на инфраструктурата.
Од друга страна, услугата за превоз преку апликација е бизнис што зависи од понудата. Теоријата на Убер е дека автономните возила не треба да бидат замена за возачите, туку дополнителна форма на понуда. Поголемата понуда носи пониски цени, пократко време на чекање и поголема доверба од клиентите што ја поттикнува побарувачката и на крајот го зголемува вкупниот пазар.
Економската исплатливост на роботаксијата сè уште не е докажана. Ниту една компанија сè уште не заработува пари ниту пак некој ги користи во огромен обем. Треба да се докаже дека автономните возила и сè што е потребно за поддршка на флотата на крајот ќе бидат поевтини од денешниот модел на превоз, вели Сарфраз Маредија, шеф за автономна мобилност и испорака во Убер.
Слична филозофија има и компанијата Lyft. Автономните возила би се справиле со основното оптоварување на секојдневната побарувачка, а човечките возачи би обезбедиле дополнителен капацитет за време на сообраќајниот шпиц, лоши временски услови, концерти, спортски натпревари и други скокови на побарувачката.
Маредија како пример ги посочува и услугите во доцните часови. Тогаш вообичаено се полнат роботаксијата бидејќи струјата е најевтина, па во времето на затворање на баровите товарот за брза услуга се префрла на возачите. Автономните возила, исто така, главно се насочуваат на пократки патувања до центарот на градовите, а возачите добиваат подолги, попрофитабилни патувања.
Хибридниот пристап ѝ овозможува на компанијата да ја димензионира својата флота за нормална побарувачка, задржувајќи возачи „на повик“ во вонредни услови. Возачите се платени само кога работат, додека роботите чинат пари дури и кога се паркирани.
Компанијата признава дека новата политика непропорционално ќе ја погоди категоријата возачи кои се во Убер заради дополнителни приходи. Некои ќе бидат отпуштени, а други ќе мора да работат подолго за да ја заработат истата сума.
Луѓето може да помогнат да функционира математиката на Убер. Помалку е сигурно дали математиката ќе биде исто толку добра и за луѓето, заклучува Аксиос.
******
Види и: Возачи го тужат Убер поради „бездушниот“ алгоритам
