Литванија гори од желба следната фабрика на Тесла да биде изградена на нивна земја. За да му го привлечат вниманието на Маск, создале виртуелна Тесла фабрика во играта Мајнкрафт. Да види човекот како убаво ја личи.

Преку 50% од вкупниот интернет-сообраќај во светот не го прават луѓе туку ботови. Како и кај луѓето, има добри и лоши ботови. Како и кај луѓето, повеќето се лоши. 

Гледањето порно доведува до групен секс, е еден од главните аргументи на законодавците на Вирџинија, кои разгледуваат резолуција со која порнографијата ќе биде прогласена за штетна и токсична.

Во Скопје порано копиљаци можеа да изиграат сервис на улица (до 21, молим лепо) без да ги прекине кола, или да се тргнат најмногу еднаш-двапати за да пројде возилото. Денес би гинеле и пред да дознаат кој ќе сервира. Британците имаат добар штос за враќање на старо Скопје. 

„Трамп ќе биде неправедно обвинет за катастрофата“ вели гуруто на американските либертаријанци Рон Пол кој предупредува дека САД и светот се пред уште една, досега најголема финансиска криза која е имплантирана уште во претходната.

Поранешниот норвешки премиер бил задржан на вашингтонскиот аеродром и испитуван од остроумните американски служби. Им станал сомнителен откако во пасошот виделе дека пред три години го има посетено Иран. Пасошот бил диплломатски. 

Канадскиот премиер ја изненади светската јавност кога на еден ден по нападот на џамијата во Квебек во кој загинаа 6, а ранети се 19 луѓе, случајот го карактеризираше како терористички напад. Ова е прва пат напад врз муслимани на Западот да биде наречен тероризам.

Пред кое било решение што ветува одржливост на системот на храна во светот да биде сфатено сериозно, треба да мине три прашања: дали пак купуваш од продавница, дали менува само неколку работи или скоро сè во твојата исхрана, дали ти дава изговор да не направиш сериозни промени во исхраната? „Да“ на кое било од овие прашања е знак дека решението е гола вода на граница со измама.

Мапа на европското иселеништво покажува дека Македонија е на врвот на земји во кои оние што се родиле таму, решиле да дигнат сидро. Босна, па Албанија па Македонија. А ние овде пак не наоѓаме слободно паркинг место.

Очекувањата се дека Британија добро ќе пројде со отцепувањето од Унијата, сè додека успее да ги постигне најдобрите трговски договори што некогаш се видени.

Еден ден ќе се умориме објаснувајќи дека другата страна не (мора да) е глупа туку (можеби) има поинакво мислење. Но, изгледа ова не е тој ден.

Поранешните европарламентарци по завршување на службата за европските народи, своето искуство масовно го ставаат во служба на европските и светски лобија.

Американците го почнаа февруари (меѓу другото) со информацијата дека нацијата е пред снемување сланина, и дека националните залихи на сланина се на најниско ниво во последните 50 години. Медиумите во земјата се на раб да прогласат ДЕФКОН 1.

Во последните два дена војување на фронтот во Донбас загинати се 27 војници на самопрогласената Народна република Доњецк и 78 украински војници, а Украинците имаат испукано и 2.500 топовски проектили, сето ова според бројки на прво-споменатите. Пред ова Трамп се слушна со Путин, а Порошенко слета во Берлин.

Сите забележаа како Доналд Трамп сред свечената инаугурација и се сврти на сопругата и кратко и рече нешто кое нејзе во моментот и ја тргна насмевката. Ја крена главата и од озареност потона во длабока, молчалива потиштеност. Ситуацијата е чудна, и малку морничава. Светот се запрепасти како Доналд Трамп е безобзирен и суров кон најблиските. Ама, ако мене ме прашате, тоа е тоа. Со Словенци поинаку не може да се разговара.

Стереотипот а ла Big Bang Theory е: научниците се социјално хендикепирани фрикови, изгледаат ко клошари и се позагрижени за спинот на електронот отколку за бројот на лајкови (бидејќи и онака немаат профил на Фејсбук). Но реалноста е поинаква и повеќе личи на House of Cards.

Србија и Хрватска тргнаа во набавка на ново оружје и размислуваат околу повторно воведување на воениот рок, додека Косово се погласно бара сопствена армија. На вака зовриената ситуација посебен "Балкан 1991" шмек и даваат медиумите.

Како ретко кога последниве децении не станува збор за амбиции на српските националисти, туку за автохтоно чешко барање - Чешка да се претвори во Србија.

Само во моментов ИКЕА има околу 12.000 производи кои за луѓето надвор од компанијата и надвор од Скандинавија, звучат како имињата да им ги дава генератор на рандом шведски зборови.

Кога во петокот Трамп ја објави забраната за муслиманите мигранти да влегуваат во САД, главното прашање беше колкав е нејзиниот опсег. Во саботата стигна објаснувањето - ова ги опфаќа и постојните 500.000 иматели на Зелена карта, кои ако се затекнале надвор од САД веќе немаат право да се вратат назад (или да пречекорат од транзит зоната на аеродром).

Како што републиканците и општо десницата направија светиња од религијата, така либералите ја претворија во табу тема, за која не знаат како вистински да зборуваат ниту со своите симпатизери.

Текстов зборува за лажните вести за наводни фудбалски трансфери како потпалувачи на емоции и јадици за кликови. Но неговите генерални заклучоци за тоа како стојат работите во медиумите, кои често го прават истото она што и некој безимен трол на социјалните мрежи, важи и во други области, во кои интегритетот и здравиот разум се на резервна клупа.

После почетното примирје меѓу технолошката индустрија и Трамп, одлуката на САД да го забрани влезот на муслимани во земјата ги врати двете страни на авансно подготвените фронтовски линии, па сега секоја компанија гледа некако да му направи зијан на Трамп или на неговиот план.

Почетните знаци се дека содржините објавени директно на трети платформи, како Инстант статии на Фејсбук и Дискавер на Снепчет, малку придонесуваат кон вкупните приходи на медиумите.