За некое време ќе излезе очекуваното овогодинешно издание на „Виски Библијата“ на Џим Мареј. Сите победници ги знаеме, ниеден победник немаме пробано. Тежок живот новинарски.

Влезницата во „Клубот 400“ е зголемена за 18% од лани а секој од првите 10 си го накачил богатството за барем една милијарда долари. 24-та година по ред, орото го води Бил Гејтс кој денес тежи 8 милијарди долари повеќе од лани. 

Случајот за кој треба да одлучува судот е „САД против Микрософт“ и уште од сега се смета за клучниот случај за иднината на интернет приватноста.

Минатата недела се појави веста за едно неочекувано откритие дека археолог за текстил од шведскиот Упсала Универзитет го открил зборот „Алах“ испишан на стотици години стара викиншка погребна облека. Времето, 5-6 дена подоцна, покажа дека веста пренесена од најдоверливите медиуми (Би-би-си, Нешнл џиографик...) не е така точна како што изгледа.

За Канаѓанецот кој минатата недела заедно со своето семејство беше ослободен по 5-годишно заробеништво во Авганистан, една од најтешките работи да поверува додека е во заточеништво е дека Трамп е претседател на САД.

Решението за загадувањето на колите моментално е идентично со решението на проблемот со дебели луѓе. Како што дебелината се повеќе се решава со бутај колку сакаш само гледај да е здраво, така и загадувањето се решава со вози колку сакаш коли, само гледај да се електрични. Не може така за сè.

Откако неколку месеци има директно спротивставување и пречки во својата матична телевизиска мрежа, новинарот на Ен-би-си њуз Ронан Фароу решава ексклузивната приказна за Вајнстин да ја однесе во Њујоркер.

На Патриша Аркет одеднаш ѝ текна дека на времето филмскиот режисер Оливер Стон ѝ пратил букет ружи. Што ѝ било чудно. А другпат пак, ја прашал, „што вака со дечко?“ И ете ти sexual harassment.

Биограф на Доналд Трамп раскажа како актуелниот американскиот претседател своевремено го убедувал како слика што ја поседува била прав, правцат Реноар. Скорешно видео интервју со првата дама на САД открива дека лажњакот уште им виси по дома.

Имаат 670 коњски сили, носат товар од 30 тони а кон атмосферата се добронамерни како чајник. Први на улица ќе можат да ги забележат жителите на Лос Анџелес.

Американски професор по историја во Њујорк тајмс ги потсетува Американците дека беспоштедната политичка пропаганда не е измислица на злите Руси. ЦИА во 50-тите години за истата цел го создава Радио Слободна Европа, станица која само за реклами добива медиумски простор од две милијарди долари.  

Изнервиран од тоа како беше закопан последниот филм на Дарен Аронофски на влијателниот Синемаскор, режисерот порача дека оценувањата кои се денес популарни немаат врска со вистинска филмска критика туку со тоа како се рангираат кујнски апарати.

Изнервиран што му се мешаат во оружјето, републикански законодавец изготвил предлог закон со кој истото се бара и за новинари. Кој е без лиценца,  може да биде новинар само по дома.

Апстиненцијата си го најде најимпресивниoт симбол до сега. Се вика Diploscapter paschys. Проѕирно црвче помало од зрнце афион, кое немало секс подолго од најзагорените меѓу нас. Цели 18 милиони години.

И двата сексуално малтретирале колешки. Првиот конзервативец, вториот либерал. На првиот ток-шоу домаќините душата му ја извадија  За вториот - штама. Освен Џон Оливер (подоцна и Колбер). Двајцата излезени од работилницата на Џон Стјуарт.

Заради претераното користење, антибиотиците стануваат сè помалку ефикасни бидејќи бактериите стануваат отпорни на нив. Проблемот е поголем отколку самиот рак.

Знаете што правеше Мис Стон на овие простори (пред да ја грабнат). Денес е обратно. Христијани од Афика, Јужна Америка и Азија се обидуваат да ја рашират божјата реч во земјите од кои им е дојдено христијанството.

Кинеските власти порачаа дека без никаков проблем ќе ги достигнат таргетите за економски раст кои им се проектирани на 6,5%. За споредба, ЕУ годинава брка просечен раст на БДП од 1,7%.

Изјавата дека тоа се внатрешни проблеми на Шпанија во кои ЕУ не треба да се меша  е израз на лицемерие од највисок ранг. Секако, лицемерието не е ништо ново во однесувањето на ЕУ. На нејзините функционери не им е под чест да се мешаат во внатрешните работи на државите членки кога, на пример, треба да ги сменат избраните политичари затоа што тие одбиваат да ги спроведат мерките (што лично го имам искусено).

Долгогодишната хистерија околу Русија, грижливо потпалувана од американските меинстрим медиуми и од НАТО пропагандата, ги втурна Американците во милитантно расположение, правејќи ги спремни „да се борат и да загинат“ за прекуоекански земји за кои до вчера немаа ни слушнато.

НАСА останува без најдрагоцениот елемент неопходен за идните вселенски мисии. Останува без гориво без кое не може да се добаци до тие планети кои се поџенем и од Брајчино. Пу, ама не јаз'к туку 238. 

До вчера просто се тркаа кој почесто ќе го нарече „последниот европски диктатор“. Сега му посакуваат добредојде на самитот на кој ќе се негуваат економските интеграции и европските вредности.

Австриската полиција казнила човек затоа што заради рекламирање на еден дуќан, бил маскиран во ајкула. По кој закон го казниле? По законот за забрана на бурки.

Паметни дечки од Гугл, Фејсбук и Твитер, и тоа од оние кои лично имаат придонесено во нивната популарност, почнуваат да се пишманат од сето тоа заради зависноста која ја предизвикуваат тие платформи. За почеток, треба да знаете добар дел од нив веќе не се „социјално вмрежени“ а децата ги праќаат во елитни школи во кои е забрането да се дојде со смартфон.