Што се однесува на годинешната Национална климатска проценка изработена од американската администрација, ставот на првиот човек на таа администрација е „не му верувам“ на извештајот.

Во својата намераченост за справување со мафијата, италијанските власти запленија сериозни имоти низ целата земја, од Сицилија до северот. А на толку запленет имот, проценката веројатно е дека е греота нешто да не се сруши.

На страна од глобалната стереотипна дебата околу Џорџ Сорос во која тој е или ангел чувар на вредностите на демократијата или демон кој стои зад сите денешни зла, конзервативниот магазин на еврејската заедница во САД нуди еден понијансиран поглед на неговата улога. Дека секој критика не е баш без основа, на линија на она што ние еднаш му го пишавме на Владимир Милчин, да знае Карл Попер што сè во негово име се финансира, ќе се превртува во гроб.

Непребирливоста на човекот во однос на партнерите нова студија ја регистрира уште во времето на праисториските луѓе и истите ги цинкари дека не пребирале многу дали ќе спијат со човек или со неандерталец.

Имајќи го предвид огромното влијание што Силициумската долина го има врз нашите животи, изненаден сум од тоа колку ретко таа е прецизно претставена во поп-културата. Би можел на една рака да ги избројам најдобрите примери, пишува Бил Гејтс.

Не е јасно дали ова го прават заради пари, или за да пробуваат нови играчки и технологии, или затоа што сакаат секаде да те следат, важно покрај стотици милиони он-лајн корисници Алибаба до сега има отворено речиси 90 супермаркети низ Кина. И одлично им оди.

Словачка стана 8-та земја од ЕУ која најави дека нема да го потпишува тн Глобален компакт за миграција, една рогобатен документ изработен под капата на ОН чии противници сметаат дека е опасен вовед во цензура: говор против миграцијата може да се квалификува како кривично дело а медиуми да бидат затворани на таа основа. Еден естонски актер навежбан на Шекспир го читаше целиот документ и тоа траеше повеќе од два часа.

Освен што ќе го променат начинот на кој патуваме, работиме и општо стигнуваме од точка А до точка Б, автономните автомобили ќе имаат коренито влијание врз сексот.

Во интервју по повод неговиот најнов роман, хрватскиот писател и еден од основачите на легендарното движење ФАК, Боривој Радаковиќ, допира една тема која насекаде ја гледаме и кај нас. Толку многу луѓе знаат што мислат другите што не им даваат ни да кажат. Бидејќи овие знаат. 

Пејачите, особено оние долгометражните, имаат разни цаки да ја сочуваат основната алатка од која вадат леб. Пазат на животниот стил, што пијат и јадат, колку топло а колку ладно, земаат медицински и народски амброзии...Мик Хакнел има едноставен рецепт - преку ден не зборува кога не мора.   

За тие што не се во тек, сета онаа ветувана баснословна иднина позлатена од ќар од криптовалути во која само треба да купуваш графички картички и да гледаш како парите ти легнуваат на сметка, моментално е сведена пепел и клетви.

Прашањето и размислувањето е поттикнато од растечкиот јавен активизам на поранешни вработени на ЦИА, што се смета за најнеочекуваната последица од претседателството на Трамп.

Спржени од работното темпо и динамиката на секојдневниот живот, на сè повеќе луѓе од Јужна Кореја им доаѓа самите да се пикнат во затвор кој им се чини како единствено место на кое можат да најдат малку мир и спокојство. Имаат решение за тоа.. Прв се сетил преуморен поранешен обвинител кој почнал да им завидува на луѓето кои ги праќа зад решетки.

Секој деветти автомобил на планетава е дојден од фабрика со која управувал тој. На Нисан му останува темелно да си го провери системот кој дозволил еден човек да го олесни за 44 милиони долари.

Организацијата која е во мртва трка сама со себе во бламирање и апсурдност, бара промена на името на британско село старо десетина векови за подобро да им легне на агендата што ја тераат.

Мед и лекови за кои не треба рецепт треба да бидат првата линија на одбрана за најголемиот дел луѓе што закачиле кашлица, стои во новите британски здравствени препораки чија главна цел е справување со проблемот со отпорност на антибиотици.

Европа и централната левица општо мора да има поцврст пристап кон феноменот кој доведе до Трамп и Брегзит, порачува поранешната американска министерка за надворешни работи и претседателски кандидат, Хилари Клинтон.

Си знаете и самите ама сега има и судска одлука за тоа. Контекстот е дилема дали адвокат и судија кои се Фејсбук пријатели, смеат да бидат ангажирани во ист судски случај.

Австралиска компанија со еден свој потег толку ја изнервира тамошната јавност што за темата мораше да се произнесе и австралискиот премиер. Значи вака: кромидот во сендвичот, под или над кoбасицата?

За сметководствените разлики кои ги покажа првата сеопфатна финансиска ревизија на американското министерство за одбрана ќе бидат потребни години за да се разрешат.

Анонимен вработен во центрите за полнење на нарачки на Амазон почнува да пишува колумна за Гардијан во која открива инсајдерски информации за работата и своите колеги. Во магацинот се вработува пред почетокот на главната сезона.

Милијардерот Мајкл Блумберг одлучи да го помогне Универзитетот Џонс Хопкинс, во кој има завршено, и да му донира 1,8 милијарди долари како финансиска помош. Иако не е ни блиску до најбогатите, Универзитетот само во 2017 има добиено околу 3,8 милијарди долари во донации.

Малата американска сојузна држава Мејн за првпат оддржа таканаречено рангирано гласање. Модел кој им дава шанса на независни кандидати да го разбијат двопартискиот систем и клетвата дека се бира меѓу змија и магаре. Систем за кој и Македонија би можела да размисли.

Во период нешто пократок од две недели врне 50% од годишниот дожд кој и следува на планетава, а како што минуваат годините до крајот на веков овој период само ќе се намалува.