Англија како држава и локалните власти даваат сериозни пари за да субвенционираат кирии за економски ранливи семејства кои немаат друго решение освен да бидат потстанари. Проблем е што оние кои илегално доаѓаат со чамчиња преку Ла Манш даваат повеќе. Годишно над 30.000 фунти повеќе за еден стан.

Различни модели на вештачка интелигенција биле прашани кој би бил нивниот најконтроверзен став за луѓето, без разубавување. Биле прашани трипати. Секој модел барем еднаш напишал дека луѓето прво го избираат она во што верува нивната група, а потоа ги измислуваат причините. 8 од 13 го дале овој одговор секој пат а Кими го дал истото мислење сите три пати.

Џаред Кушнер ги негира експлозивните обвинувања дека, додека бил висок советник во Белата куќа во првиот мандат на Трамп, имал пристап до тајни странски банкарски сметки со околу 2 милијарди долари од кралски семејства од Заливот и дека холандската разузнавачка служба го гледала како користи една од нив преку неговиот хакиран Ајфон. Деталите од приказната се мрсни.

Министерството за одбрана на САД планира да формира сопствена единица од тајни агенти кои би шпионирале строго чувани економски тајни на Кина и други земји. Оперативците би се претставувале како бизнисмени, без јавна поврзаност и заштита од американската влада. На оваа иницијатива се спротивставува ЦИА, која не сака некој друг да ѝ се меша на „нејзиниот терен“. 

Саша Барон Коен на големото платно го враќа еден од своите најпровокативни ликови, помпезниот и лажен  англиски „фраер“ Али Џи. „Фактот дека Али Г и денес е проблематичен е причината заради која решив повторно да го оживеам,“ објаснува Коен.

Анкара и Баку нагло го загрозија договорот за сојузништво со „братски“ меѓусебни обвинувања поради забраната за носење шамии во азербејџанските училишта. Причините за судирот ги надминуваат идеолошките рамки. Баку ги продлабочува односите со Израел и не сака повеќе да биде третиран од Анкара како „помалиот брат“.

Педро Санчез беше златниот дечко на западните прогресивни кругови. Промовираше феминизам но во воведе закони кои ја бришат суштината на законските заштити на жената. А додека неговата влада ветуваше дека ќе се справи со проституцијата во земјата, негов министер си набави проститутка од веб платформа.  

Трамп упорно бара укинување на гласачките машини со кои „му била украдена победата“ на изборите во 2020 година. Лани побарал од Агенцијата за кибернетска безбедност тајно да хакира една од машините. Откако бил одбиен, отпуштил една третина од вработените во агенцијата, која самиот ја основаше заради заштита на регуларноста на изборите.

Меѓугенерациската безнадежност носи револуции. Дури и ако луѓето видат дека предлозите на популистите или екстремистите нема да функционираат, тие сакаат да го срушат стариот систем затоа што ги изневери нив и нивните деца. Тие имаат малку што да изгубат, пишува поранешната естонска претседателка Керсти Калјулаид, опишувајќи ги причините за немирите низ Европа.

Американската полиција позајми од Пентагон „топлински топ“ за да го тестира за акции за одбивање мигранти или демонстранти. Оружјето е слично на „звучниот топ“ - за кој сè уште не се знае дали бил користен или не против демонстранти во Белград – и на „дискомбобулаторот“ со кој, според Трамп, САД ја парализирале војската на Венецуела кога го грабнале Мадуро. 

Португалскиот парламент настојува да ја укине мерката која овозможуваше бесплатни здравствени услуги на странци и нелегални имигранти. Португалија стана популарна дестинација за „здравствен туризам“. Во изминатите пет години им била укажана грижа на повеќе од 141.000 странци без здравствено осигурување, со што останале ненаплатени услуги од 15 милиони евра.

Членови на администрацијата на Доналд Трамп, советници од Белата куќа, пониски службеници, па и компании што соработувале со владата, забрзано настојуваат да ангажираат адвокати за да ги бранат од очекувани тужби ако демократите победат на изборите за Конгресот во ноември. Трамп како претседател има посилен имунитет, а и веќе издржа два импичменти во својот прв мандат.

Иако е општо познато дека постарите луѓе се екстремно ранливи на респираторни вируси, британските власти на почетокот на пандемијата на ковид не ги заштитиле луѓето згрижени во домови за нега. Меѓу нив префрлале нетестирани пациенти од болници, по што вирусот се проширил како пожар. Фокусот бил да се заштити здравствениот систем, покажува нов извештај.

Инвеститорот на огромен центар за податоци во Норвешка, еден од најголемите во Европа, изнајмил голем брод што порано се користел како пловечки затвор за да ги смести накнадно ангажираните градежни работници. Изградбата на комплексот за кинеската компанија ByteDance веќе доцни шест месеци поради проблемите со наоѓање доволно работници.

Речиси две третини од корисниците на социјална помош во Германија имаат мигрантско потекло – многумина и откако ќе добијат државјанство. Државата за нив издвојува над 20 милијарди евра годишно и троши многу повеќе за домување, образование и интеграција. Ако веќе примаат помош, АфД бара и да работат, макар и по 15 часа општествено-корисна работа неделно.

Француската левица полека, но сигурно, му го сврте грбот на „продуктивниот работник“ и влезе во токсична коалиција со наводно угнетените: лути млади, мигранти, бездомници, муслимани. „Посипете малку радикален ислам и овој сојуз од луд станува смртоносен“, пишува Брендан О'Нил.

Владата на Полска почна кампања со која им нуди високи награди на аматерските трагачи по богатства ако пронајдат вредни историски предмети. Се очекува за детектор за метал и за лопата да се фатат до 200.000 луѓе. Археолози предупредуваат дека златната треска може да предизвика измами и штета од над милијарда евра.

Во критично време кога Илон Маск и Доналд Трамп им го ограничија пристапот на украинските сили до системот Starshield, Русија го привиршува комплетирањето на сопствена сателитска мрежа над Украина. Досега лансирала 32 сателити. Кога ќе стигне до 300, ќе може во реално време прецизно да управува дронови и ракети врз целата територија на Украина.

Во петокот вечерта, додека Франција се подготвуваше за нови насилни протести кои ја разнишаа земјата, Емануел Макрон и неговата сопруга Брижит беа во ВИП-ложата на концерт на Селин Дион во Нантер. Ова беше еден вид „момент на Макрон-Антоанета“, кој доминираше на социјалните мрежи додека светот гледаше како хаосот се шири низ земјата.

Си Џинпинг, во книга достапна и на англиски, отворено и јасно го опишува владеењето со Кина, историските причини за тоа, предизвиците со кои е соочена Партијата, специфичниот развој наместо имитирање на туѓите модели... Ако ѕирнат во неа, читатели на Западот би ја разбрале Кина, но и би се загрижиле зошто нивните власти не можат да ги препознаат болестите на системот.

Економистот од „Голдман Сакс“ кој прв ја употреби кратенката БРИКС, уште пред 25 години ја предвиде улогата на земјите од развој на глобалната економска сцена. Но, во групата Г7 сè уште нема место ниту за Кина, ниту за Индија, затоа што „мрзливите“ европски нации љубоморно ги чуваат своите привилегии. Според Џим О’Нил, време е за сериозно надградување на тој систем.

ББЦ ја паузираше шемата за ангажирање државни службеници од кои уште од првиот работен ден се барало да пишуваат новинарски статии и анализи за чувствителни теми како миграцијата и пандемијата на ковид. Стажантите биле претставени како членови на редакцијата. Тоа ја подгреа загриженоста дека јавниот сервис е пристрасен и дека владата има влијание врз известувањето.

Научно списание повлече труд за вакцинацијата против ковид-19, откако било откриено дека главниот автор вметнувал фабрикувани податоци и слики. Во трудот објавен пред четири години се тврдеше дека вакцинацијата против SARS-CoV-2 поттикнува создавање на силни антитела. Досега се повлечени близу 800 лажни студии поврзани со коронавирусот и вакцините.

Додека се расфрла со стотици милиони долари за политички кампањи (годинава веќе дал 275 за републикански кандидати), Илон Маск отворено ги презира филантропите. За нив тврди дека прават повеќе штета отколку полза за општеството. А, сепак, Маск ја има петтата најбогата добротворна фондација во САД. И ја користи за претурање пари и даночни олеснувања.