Официјална Москва не ни стигна да распали со стандардните закани за уништување на секое парче американска воена помош, а Украина и САД речиси едногласно се сложија околу бесцелноста на испраќање американски дронови на боиштето во Украина, со објаснување „па не ти е ова Авганистан.“

Од првичното дека депортации „едноставно нема да се случат“ сега британскиот премиер изјави дека украинските бегалци кои нелегално ќе влезат во Британија би можеле да бидат испратени во Руанда.

Европската Унија и останатите сојузници успеаа да ја намалат дневната потрошувачка на руски гас за 75%, па Русија почна овие 25% да им ги продава по четири пати повисока цена.

Со оглед на тоа кој доби зелено светло од ЕУ (Украина, Молдавија) а кој не (Македонија, Албанија) јасно е дека Унијата не се пали толку ако некој ја сака, колку што се пали по држави кај што има луѓе кои се палат на Русија. Реформи - меформи? Дајте не се шалете.  

Долгогодишен сенатор од Нигерија, организирал доаѓање на 15 годишно момче од неговата земја во Велика Британија. Единствената причина за организирање транспорт на момчето било  - да му се земат органите, се разбира, без негово знаење. Купувачите се непознати. 

На средина на оваа недела, руската валута достигна вредност од 52,3 рубљи за долар. Пред три месеци, кога ЕУ и САД започнаа со воведување санкции за Русија заради нејзината инвазија на Украина, беа потребни 139 рубљи за еден долар.

Не само што војната во Украина (и покрај сите себе-честитања) не ја обедини Унијата на некој до сега невиден или трансформативен начин, туку таа има спротивно влијание на продлабочување на поделбите, менување на сојузништва и балансот на моќ. Токму тоа што Франција и Германија не го сакаат.

Како што повеќе се стегаат нафтените санкции против Русија, така се повеќе руски нафтени пратки сред Атлантикот исчезнуваат од радар. Само во изминатите две недели најмалку три руски танкери ги снемало од системите за следење бродови во моментот кога се приближиле до Азорските острови.

Добра вест за Белата куќа е што конечно има нешто на што почнаа да паѓаат цените во Америка. Лошата вест е што тоа е вториот човек во Белата куќа.

Од 1-ви јули ниту едно Тесла возило два месеца нема да смее да припари во кинескиот крајбрежен туристички дистрикт Беидаихе, во кој треба да се одржи летниот партиски состанок на раководството на Кинеската комунистичка партија.

Запад тврди дека за кризата со храната е виновна Русија чија стратегија е, меѓу другото, да ја доведе Европа до глас. Русија возвраќа, како тоа знаете да носите онолкаво оружје во Украина а не знаете да изнесете жито од таму?

И покрај првичната колебливост (Путин мора / не мора да биде соборен од власт), американската реторика се заострува со тек на време: во март целта на Америка беше Украина да се одбрани себе си; до крајот на април целта беше „ослабена“ Русија. Меѓутоа една конзистентна работа е дека Америка нема да почне војна со Русија за Украина.

Ако ви пречи 5 долари за галон гориво, тогаш помислете како е на 8 долари (колку што е во Италија). Или природниот гас кој во Италија е четири пати поскап отколку во Соединетите држави.

Транссексуалната ќерка на Илон Маск официјално побарала менување на своето име „во согласност со нејзиниот нов идентитет“, а за да не оди два пати по шалтери во исто време се откажала и од својот татко Илон.

За прв пат од почетокот на војната повеќе од три тони руско злато и биле испорачани на Швајцарија, што се толкува како сигнал дека на индустријата и пројдоа првичните праведнички дилеми околу руските скапоцени метали.

Граѓаните на Увалде кои изгубија 19 деца и две наставнички одлучија основното училиште Роб да биде затворено и срушено.

Дојде време да се камуфлираме и по дома и да ги збуниме оние кои нè прислушуваат, а ги има многу. Како може да ја надмудриме супериорната технологија на вештачка интелигенција? Или да се оди радикално аналогно или пак да се искористи нејзината моќ - против неа.    

Патрис Лумумба кратко откако е сменет од власт со белгиска помош е заробен од тамошните власти, стрелан во присуство на белгиски офицери, за потоа неговото тело да биде откопано од белгиски офицери, раскасапено со пила, распаднато во солна киселина а коските смелени и расфрлани. Од Лумумба останат е еден златен заб, зачуван од неговиот касап, кој до сега се чуваше во Белгија.

Прво папата го откажа одамна планираното патување во Африка заради здравствени проблеми, а потоа најави дека ќе именува 21 нов кардинал, два предзнака кои се толкуваат како сигнал за неговото напуштање на престолот во Ватикан.

Во нерамноправна битка ватиканската полиција успеа да го сопре и приведе Архангел Михаил кој во неделата бил решен да упадне во Ватикан со кола.

Пред десетина дена еден од столбовите на слободниот говор и размислување, Вашингтон пост, по итна постапка суспендираше еден од своите најдобри новинари затоа што ретвитнал виц. Серија твитови подоцна и ВП ја отпушти и новинарката што го накодоши колегата.

Со некои си 60-на километри должина, Сувалки коридорот е парче земја меѓу Полска и Литванија што го одделува руски Калининград од најблиското парче сојузничка територија, Белорусија. Деновиве Литванија одлучи да го ограничи железничкиот товарен сообраќај и снабдувањето на Калининград.

Заради пандемијата, Републиканците од Тексас се немаат меѓусебе видено во живо цели 4 години па сега кога се видоа, им тргна шутот. Бајден го прогласија за нелегален претседател а нивниот сенатор кој договара контролата на оружјето го исвиркаа. И нејќат да даваат автомобилски ленти за точаци. 

Најголемиот дел од Европејците се подготвени да ја отстапат окупираната територија на Украина во замена за крај на војната што е можно побрзо, покажуваат новите анкети објавени од британски Тајмс.