Првиот човек на Обединетите нации, Антонио Гутереш, драматично предупреди дека светската организација се соочува со непосредна опасност од финансиски колапс. ООН можат да состанат без пари веќе во јули оваа година доколку земјите членки веднаш не ги платат своите наталожени долгови. Првенствено се мисли на Содединетите Американски Држави кои должат милијарди. 

Американците кои историски имале корист од „одливот на мозоци“ сега се сведоци на овој феномен во нивната влада. Откако аднинистрацијата на Трамп ги скрати трошоците за федералните служби, илјадници високообразувани експерти ги напуштиле државните институции. Владата изгубила доктори на науки со вкупно работно искуство од 106.636 години.

Напуштените темели и преосмислената архитектура на визијата на саудискиот престолонаследник сведочат за замена на една постиндустриската иднина на светот со друга. Наместо да биде раскошен дом за милиони луѓе Неом може да стане огромен центар за податоци. Тоа ги покажува цртите на Големото ресетирање: иднина во која луѓето нема да бидат потребни.

Историјата се повторува. Во 2003 година лабуристичкиот премиер Тони Блер застана зад лажните тврдења за оружјето за масовно уништување на Садам Хусеин и ја вовлече Британија во американската инвазија врз Ирак. Сега лабуристичкиот премиер Кир Стармер вели дека би поддржал воена интервенција на САД за го запрат Иран да развие нуклеарно оружје.

Нова анализа укажува дека гените се двојно поважни за долг живот. Дури 50%. Науката досега за многу побитни ги сметаше начинот на живот, исхраната, вежбањето, социјалните односи и околината. Ова сепак не значи дека луѓето може да им се препуштат на гените и да пушат и пијат, очекувајќи дека ќе живеат долго како и нивните родители, баби и дедовци.

Додека Трамп агресивно се закануваше дека ќе ѝ го грабне Гренланд на Данска, дури и на сила, на многу поелегантен начин ја спроведе другата половина од стратегијата за воспоставување американска доминација на западната хемисфера. Под негов притисок, Панама ѝ ја поништи концесијата на хонгконшката компанија што го управуваше Панамскиот канал.

Израелските сили две години упорно одбиваа да го признаат бројот на Палестинци што ги убиле при операцијата во Газа. Ги отфрлаа локалните извештаи како „пропаганда на Хамас“. Дури сега го објавија сопствениот „проверен“ биланс, кој се поклопува со оној од министерство за здравство на Хамас. Убиени се најмалку 70.000 Палестинци. 

Кога научници пристигнале на норвешкиот северен архипелаг Свалбард за да гo испитаат влијанието од климатските промени врз поларните мечки, забележале дека топењето на мразот нема катастрофални последици. Напротив. Мечките биле подебели и поздрави. Се прилагодиле да ловат моржови, чија популација исто така се зголемила.

Дури и за време на најжестоките офанзиви во изминатите две години, руските сили на фронтот во Украина напредуваат по 15 до 70 метри на ден. Тоа е меѓу најбавните напредувања во современото војување, побавно дури и од рововската Битка на Сома во Првата светска војна, каде што сојузниците заземале по 80 метри германска територија на ден.

Секој што последниве години се осмелуваше да спомне мода, имитирање или социјална зараза во поглед на растечкиот број трансродови млади, се сметаше за закана за благосостојбата на децата. Дека таквите го напаѓаат физичкиот и психолошкиот интегритет на младата личност и се сомневаат во (моменталните) резултати на нивната самоидентификација. Омилена етикета за нив беше: трансфобични.

Стејт департментот им нареди на американските мисии низ целиот свет да ги преразгледаат сите програми за помош за да спречат финансирања на групи што поддржуваат абортуси, разновидност и родова идеологија. Невладините организации во странство што нема да се прилагодат на новите правила ќе останат без финансиска поддршка од САД.

Германски компании затвораат погони во својата земја и го префрлаат производството во нови модерни фабрики во Унгарија и во Србија. Тие нудат поевтина и висококвалификувана работна сила и разни бирократски и даночни олеснувања. И Кинезите отвораат погони во индустриската зона на потегот Будимпешта-Белград, која ја поврзуваат со брзи возови.

Чистењето на вечните хемикалии од природната средина и санирањето на здравствените штети од овие отрови ќе ја чинат Европа најмалку 440 милијарди долари до средината на овој век, покажува нова анализа. Европската Унија днајавува дека ќе ги забрани хемикалиите PFAS, но бара начин како да не ги загрози текстилците и други индустрии што испуштаат отрови.

Рок легендата Нил Јанг му тера контра на Доналд Трамп нудејќи им го на жителите на Гренланд целиот свој дигитален музички каталог една година бесплатно. Истовремено, порача дека никогаш нема да ја врати својата музика на Амазон додека негов газда е Џеф Безос. Јанг повлекуваше музика од други платформи и порано, па после ја враќаше.

Народната банка на Полска ги зголеми своите резерви на злато на околу 550 тони, во вредност од 63 милијарди евра. И планира да купува уште, барем додека не стигне до стотина милијарди. Стратегијата на гувернерот се покажува како исплатлива. Во време на геополитички хаос, вредноста на златото урива историски рекорди и надмина 5.500 долари за унца.

Пораното откривање, подобрените здравствени третмани и поздравите животни навики првпат ја кренаа над 70% стапката на луѓе со рак што ја победиле болеста, покажуваат нови статистички податоци за САД. Пред половина век стапката била 49%. Некои типови рак се победуваат во 98% од случаите, но ракот на панкреас го преживуваат само 13% од пациентите.

Родовата идеологија во Англија има приоритет над одлуките од Врховниот суд и при сериозни случаи на гонење криминалци. Полицијата им дава право на притворените осомничени лица по сопствена волја да го идентификуваат својот пол, што може да ги попречи истрагите и статистиките за криминал, особено за сексуални насилства, педофилија и силувања.

Високи американски функционери побараа од владата на Кир Стармер да го отфрли амандманот за блокада на услугата VPN, со која Британците може да ги заобиколат сè построгите ограничувања за пристап до интернет. Вашингтон предупредува дека тоа би бил прв чекор кон тиранија и дека Британија со степенот на интернет цензура ќе се изедначи со Иран.

САД заработиле близу 200 милијарди долари од царините на Трамп, но дури 96% од тие пари ги платиле американските граѓани, кои биле принудени да купуваат поскапи производи од увоз. Спротивно на очекувањата, другите земји не ги намалиле цените на производите, туку се преориентирале на други пазари, главно во Европа и Азија.

Еден месец откако Американците ја оставија Делси Родригез да се справува со обезглавената  и поделена држава, таа за првпат крена глас против постојаниот притисок и бескрајните барања на Вашингтон околу нивната нафта. Не чекаше многу за одговор кој дојде од државниот секретар кој ја потсети дека Американците ја сметаат Венецуела за своја бавча.  

Десетици милиони луѓе во главниот град на Индија секоја зима дишат загаден воздух илустративно измерен како чад од девет цигари на ден. Многу е полошо во индустриските квартови. Експерти пресметале дека очекуваниот животен век на луѓето им е скратен за осум години. Наместо да ги запрат загадувачите, властите прскаат вода од камиони.

Онаа петарда Канје Вест/ Канје/ Је закупи цела страна во Волстрит журнал за да им ги објасни своите маки на луѓето и да се извини за неговите антисемитски испади. Признава дека од умот се подизгубил и дека долго време се бори со своето биполарно пореметување. Најјако е што коренот на своите проблеми го гледа во тоа што многу одамна, си ја учукал главата а не бил соодветно третиран. Дој кај нас на Клиника. 

Многумина од белите американски прогресивци кои протестираат против единиците за имиграција, едвај да прозбореле со некој од нив, дури и со оние кои работат за нив како чистачи и градинари. Но, бидејќи од мали нозе сите ние сме учени дека против фашизмот вреди и да се жртвува, треба само попат да те убедат дека „тие“ или „оние“ се фашисти. И ете така се гине. Го пренесуваме ставот на Мајкл Шеленбергер.

Иако САД со години ги промовираа ветерните централи и сончевите колектори, „гнасниот“ јаглен се потврди како спасител на Американците во критичниот период на историски студениот зимски бран. Не само што термоцентралите обезбедувале доволно струја за греење, туку и ја спасиле од колапс преоптоварената и замрзната електрична мрежа.