Итните закани за луѓето при топлотни бранови се сончаница и дехидратација. Затоа властите и здравствените служби вообичаено ги предупредуваат луѓето да не се движат на отворено и да пијат повеќе вода.
Но, здравствени експерти предупредуваат дека луѓето треба да останат внимателни уште неколку дена откако ќе се спушти температурата на воздухот. Состојбата која ја нарекуваат мамурлак од топлотен бран се одразува со физичка исцрпеност, ментален замор, вртоглавица и намалување на крвниот притисок.
Тоа што веќе не е жешко, не значи дека сте целосно безбедни. Мамурлакот од топлотен бран не е дехидратација, ниту пак се однесува само на денот кога е жешко. Тоа се, всушност, последиците со кои телото мора да се справи и чија цена ја плаќа во текот на два или три дена откако ќе помине жештината, вели Џејк Мекфаден, сертифициран тренер за исхрана и корективни вежби специјализиран за ДНК-анализа.
За време на топлотен бран, телото ги троши сите електролити и минерали и работи со зголемен интензитет за да се разлади. Но, дури и откако ќе залади, нервниот систем може да остане заглавен во таа состојба. Токму затоа, по големите топлотни бранови, многу луѓе се чувствуваат целосно исцрпени, дезориентирани и уморни.
Во овие денови луѓето треба да му помогнат на своето тело, наместо дополнително да го исцрпуваат со активности или вежби. Како и при обичен мамурлак, телото треба да ги добие потребните материи за правилно да закрепне од екстремната топлина и можната дехидратација. Тоа не значи пиење повеќе вода.
Грешката што речиси сите ја прават е тоа што само наеднаш пијат многу вода. Кога се потиме, ги губиме и електролитите: натриумот, калиумот и магнезиумот. Малку сол и шеќер во водата или електролити ќе му помогнат на нервниот систем да излезе од состојбата на преголема напнатост, препорачува Мекфаден.
Додека телото се опоравува, не треба да се оптоварува со тешка храна. Се препорачуваат помали и почести оброци и храна што лесно се вари. Добро е да се избегнува пиење алкохол неколку дена, бидејќи тоа може да го забави закрепнувањето или дополнително да ја влоши состојбата.
Ако телото ви бара одмор, дозволете му го тоа. Не е време да се форсирате. Колку повеќе ги игнорирате сигналите на телото, толку посилни ќе стануваат. Одморајте сè додека не се почувствувате повторно нормално. Вашето тело ќе ви биде благодарно, додава Мекфаден.
