Ако салата останеше на својот почетен статус, како прв чекор на една долга неколкучасовна дружба, никој немаше да и се настрви да ја критикува, па да и ги реди сите можни глобални проблеми што ги создава. Откако запнаа да ја направат нутриционистичка светиња, почна и контра-ударот.

Будењето деца за на школо зимно време (во погрешната временска зона во која упорно остануваме) личи на будење јадни фабрички работници. Данокот го плаќа нивното здравје и образовниот успех. Америка мисли да поместува.

Во 1945-та, американскиот борд за Храна и нутриција објавува препорака дека на луѓето им се потребни 2,5 литри вода на ден. Ова станува мантра на секој доктор и нутриционист. Она што сите тие го имаат пропуштено е дека препораката продолжува со "најголемиот дел од оваа количина е содржана во храната што ја јадеме."

Минатиот петок берзите низ светот, под притисок од случувањата на кинеската берза, брзаа да затворат само за да не им се случи уште поголема загуба. Во понеделникот отворија со страв, по кој следуваше дополнително понирање на вредноста на акциите.

Автомобилите се агресивни суверени на градските улици додека пешаците треба да бараат пешачки премини и таму трпеливо да чекаат некој да се смилува и да застане. А бидејќи се сè подисциплинирани, сè почесто и гинат по зебрите. Индустријализација + пешацизација = раат?

Првото патување на Папата во странство е во Рио. Пред тргање од аеродромот во Рим, новинарите се веќе во авионот и го чекаат Папата кој необјасниво одбива да влезе. Во позадина, Франциско се објаснува со својот протокол и бара од нив да му ја вратат актовката која веќе ја однеле во авионот. "Не разбираш. Оди во авион. Земи ја, и те молам донеси ја тука." Она што помошниците не разбираат е дека до тогаш папите никогаш не го носеле својот багаж.

Телефонот - знаете оној апарат на којшто го ставате увото за да зборувате со некого - станува излишен во ера на други формaти на комуникација. Терминот изгледа треба да се ревидира, бидејќи тој веќе не го подразбира истото што и во времето кога тоа беше единствениот начин да чуеш нечиј глас, и тоа само откако ќе ја изговориш магичната формула: „Ало, Миле, ми текна".

Шпанија има стотици празни села кои живнуваат на една недела во годината или пак се сосема заборавени, ама за тоа Британија има луѓе кои не би да остават ништо заборавено.

Ова е изјава на бегалец од Сирија заглавен на просторот на ничија земја на грчко македонската граница. Човекот е уверен дека за стапицата во која се наоѓа е виновен Брисел.

Некогаш длабоко верувавме дека во иднината роботите ќе работат а ние ќе уживаме. Зошто тогаш денес 'рмбаме ко коњи? Целата статија на Њујоркер можеби би можела да се сведе на она: "If you're busy, you seem important."

Месецов пред 24 години, советските радикали, очајни да ја спречат започнатата демократска транзиција на земјата, го уапсија Михаил Горбачов и прогласија воена состојба. Mилиони демонстранти излегоа на улиците. Клучните елементи на армијата одбија да се приклучат на државниот удар и тој наскоро пропадна - а по него следуваше и Советскиот сојуз.

За оние кои планираат годинава да здуваат на Октобер фест, потсетување дека постирањето фотки од некој фино аранжиран оброк може да донесе и есап за кршење на авторски права и злоупотреба на уметничко дело. 

Како наследство од Француската револуција, на париските фурнаџии уште од 1790-та им беше забрането летно време да ги затвораат пекарите, со цел да се осигури дека градот и во овој период од годината ќе има пристап до багет.

Светски познатиот готвач од шпанско потекло Хозе Андрес се соочува со повеќемилионска тужба откако одби да готви во хотелот на Доналд Трамп после негоите навредливи коментари за Мексиканците.

Во четвртокот полицијата ги блокираше улиците на вечниот град за да мине позлатената посмртна поворка, додека во исто време хеликоптерите истураа латици од ружи врз нив. Ова беше последното изразување почит на 65-годишниот Виторио Касамоника.

Наш човек уште од старт има еден шлепер ментални препреки кои би го спречиле да го посака / смисли ова: кој ќе го чисти од бигор, да не им прска на комшиите, да не ми го маваат со камчиња, да не прокапе, па што ќе речат комшиите...

Изолирани напливи на вежбање не ги поништуваат штетните последици од целодневно седење во канцеларија. Ама затоа, многу работа околу ова ќе ви заврши - возење точак додека работите. Ајде сега да видиме како тоа.

ИСИС е еден од малкуте ентитети во човечката историја кои кога би биле во дуел со СИДА-та би ти дошло да навиваш за второво.

Градските власти на Дејтона Бич деновиве дадоа дозвола за започнување со работа на полигон за пукање. Во рамките на полигонот ќе има и ресторан. Во рамките на ресторанот ќе се служат и алкохолни пијалаци.

Не се работи за безумна теорија на заговор, туку се работи за истражувачи кои сериозно седнале и ја пресметале моќта на компанијата што господари со интернетот и публиката.

Станува збор за една неодамна дијагностицирана состојба, од која страдаат мал број на луѓе, и која има многу мала но пркосна заедница на научници кои ја изучуваат - мизофонија – наплив на гнев од звукот на џвакање храна.

Никој веќе нема да учи да пишува со моливите на ТОЗ (Tvornica olovaka Zagreb). Фирмата е ставена под катанец по најкласичното транзициско сценарио. Ќе го лапаат просторот за апартмани и деловни простории.

Мислевте само ние ќе ќариме од еволуцијата? Мутрирани вошки, отпорни на сите познати средства против нив, сериозно се шират низ градовите на Америка. Веќе добија таблоидно податливо име "супер вошки" а почнаа да фрчат медиумски предупредувања од типот: "Кријте ги децата, кријте ги главите!". Чешањето може да започне.

Секој има своја замисла како изгледа типичниот живот во Америка. За некого тоа се едноличните дворчиња и поштенски сандачиња, за некого бината на CBGB со Иги Поп на неа. Статистиката пак дава своја, не најбитна ама занимлива перспектива. Жално е колку најубавите години од животот имаат премал удел во целиот колач наречен живот.