Во 2000 Бил Гејтс својата позиција му ја предава на Стив Балмер, кој ќе управува со Микрософт во следните 14 години. Балмер тука брилјира: успева трикратно да ја зголеми продажбата на компанијата, профитот за два пати, да извади производи како Иксбокс и Кинект и да ги купи Скајп и Јамер. Сепак Балмер успева и да ја осакати иднината на компанијата.

Професори од UCL (University College London) успеале да патентираат шема која покажала дека мозочната активност пред некој настан е еднакво важна за негово меморирање како и онаа по случувањето. Треба акцијата да се префрли од лево на десно.

Се чини дека во политиката засакуваш некого само ако оние другите го мразат. И обратно, нормално. Пoлитико, технологијо кобасичарска...

Финската државна телевизија, Уле, ја објавува информацијата дека тамошното УБК се сомнева дека Русија започнала со програма за купување на финско земјиште, кое подоцна ќе го пополни со руски војници. Во состојба кога во врат ти дише воено мобилизирана Русија, за Уле доволно е и што извор на веста е еден фински таблоид.

Четвртина од Американците се закануваат со селење од земјата во случај на изборите да победи Доналд Трамп. Но, така викаат на истражувања на јавно мислење. А според фактите, токму во мандатите на Барак Обама рекордно пораснал бројот на Американците кои побарале друг пасош. Стивен Сигал знае за тоа.

„Да живееше Емануел во Алепо, неговата мака и очај можеби макар накратко ќе добиеја простор во некоја од предизборните дебати. Но, Емануел останува невидлив бидејќи живее во домашната ничија земја на сиромаштија, дроги и безнадежност“, пишува Њујорк тајмс. Читајте глобално, мислете локално.

Сите политички, идеолошки и вредносни разлики паѓаат во вода кога во име на помирниот сон на оваа планета ќе им побараш да се откажат од нуклеарките.

Гламур магазинот одлучи да го додаде Боно на својата листа на Жена на годината, одлука за која што главната уредничка на магазинот, Синди Леив, вели дека размислувале и разговарале веќе неколку години.

Во јужна Џорџија се уапсени две лица што планирале да упаднат во плантажата на ХААРП-от на Алјаска и да ја дигнат во воздух целата инсталација, за да ги спасат заробените души. Работеле под директни инструкции на Господ.

Има помалку од еден месец до американските претседателски избори. За двајцата кандидати всушност би требало да се зборува во категории "помалку опасен" и "крајно опасна": за Трамп може сешто да се каже, но неговата надворешно политичка платформа е нова и интересна, додека онаа на Хилари Клинтон знаеме каква е и каква ќе биде.

Треба да го најдеш таков што ќе можеш да го убедиш дека ако те сака, ќе ти го купи најновиот ајфон 7. И така едно 20 пати.

На 23 октомври се случи еден од најголемите координирани сајбер напади во историјата на интернетот, во кој паднаа некои од најголемите сајтови како Твитер, Спотифај, Нетфликс и Пејпал. Главен виновник - кинеска компанија што продала милиони не безбедни веб-камери преку кои е извршен нападот.

Сиенен ја прекина соработката со политичкиот коментатор Дона Бразилe откако новиот пакет мејлови објавен од Викиликс покажа дека таа и обезбедила на Хилари прашања од дебатите, пред тие да започнат.

Да не беше севернокорејскиот лидер склон кон егзекутирање на членови на семејството сите муабети ќе завршеа на тоа дека г-ѓа Ким е трудна па се пази по дома, вака сега треба да се објаснува со шпекулации за нејзино затворање или смрт.

Во средата Микрософт го презентираше својот прв десктоп компјутер, Сурфејс студио, кој е последниот чекор во еволуцијата на Сурфејс од проект, преку таблет до десктоп. Има екран од 28 инчи, чини 3.000 долари и е нереално револуционерен напредок кај компјутерите. Ден подоцна Епл го презентираше Мекбук про, кој е уште едно во редот предвидливи поколенија што Епл ги вади последниве години: потенок, побрз и поскап од претходникот.

Русија изгуби место во Комисијата за човекови права во ОН и нема сега да ја жалиме. Ама начинот на кој вообичаено се подготвува теренот за вакви политички пресметки заудара на тешка пропаганда.

Неолиберализмот предизвикува осаменост и изолација. Во свет во која постојано те тера да се тркаш со некого, човек најлесно решава да се затвори во себе. А сам човек, за кур не го бива. 

Без разлика на успешноста на нечија изборна кампања, се до самиот крај одлуката за гласањето е под влијание на најразлични, често пати ситни, уште почесто потсвесни склоности, што се вон сечија контрола.

Ако се водиме според бројот на војни што во моментот се одобрени од американскиот Конгрес, официјалниот број би бил нула. Тоа не значи дека на терен е така.

Не е до песната, до претерувањето е. Евергринот на Џон Ленон ја трпи истата судбина на "Македонско девојче," кога ќе ти ја отсвират во Бугарија или Србија за да ти направат мерак, а ти таа песна не ја можеш баш заради тоа.

Во земја со само 330.000 жители не е лесно да се избегнат братучедите и останатата подалечна фамилија. Затоа Исланѓаните си имаат апликација да им ја пребара генеалогијата.

За разлика од анкетите што речиси од почеток на трката покажуваат предност на Хилари, републиканскиот кандидат најде колку-толку оддишка во прогнози од вештачката интелигенција.

Оригиналната верзија на настанот беше дека соработникот на Хилари, Џон Подеста, добил меил порака со скриен линк (Битли) па откако кликнал хакерите го добиле пасвордот за неговиот меил. Новата тура мејлови од Викиликс, откри дека Подеста всушност бил сомничав дека мејлот е обид за фишинг и дека побарал помош ИТ луѓето на Хилари.