Тоа што брегзит е во мат позиција не е грешка на британската премиерка Тереза Меј, туку самиот процес на преговори е така поставен да мора да заврши со неуспех, а вината за тоа прво и најмногу лежи во Брисел.

Во 2017 за овој успех на Оксфам му беше потребно на куп да го преброи богатството на 43 милијардери, во 2016 списокот беше составен од 61 милијардер.

На младите им е неподносливо дека овде цел живот ќе треба работат само за да можат да преживеат додека родителите не им цркнат и после да ја добијат недвижноста што родителите им ја стекнале во социјализмот.

Во четвртокот Базфид ја објави информацијата што сите ја чекаат повеќе од две години: дека адвокатот на Трамп, Мајкл Коен, признал пред американските власти дека добил инструкции од Трамп да лаже на сослушувањето пред Конгресот околу наводната соработка на Трамп со Русите. Еден ден подоцна ова беше демантирано лично од човекот кој раководи со истрагата против Трамп.

Еврото моментално служи за цедење пари од периферијата на ЕУ и нивно префрлање во германски банки, а ако некогаш го видиме крајот на еврото тоа ќе биде само затоа што Германија така посакала, објаснува Јанис Варуфакис.

Ја видовме Топ 10 листата на Светската здравствена организација за здравствените опасности во 2019-та година и да знаете дека во Македонија речиси сè си имаме. Уште ебола и денга да нè спопаднат па да можеме со право да кажеме дека сме „светот во мало“.

Пишувајќи пред неодамнешното гласање со кое беше одбиен планот на Меј за брегзит, колумнистот на Гардијан, инаку Данец, пренесува како целата драма им изгледа на сите други кои живеат вон островот: „Извинете што не можеме да бидеме возбудени околу гласањето. Од надвор, тоа личи само како уште повеќе парализирање и илузии.“

Дури 60% од познатите сорти кафе се во опасност поради климатските промени и другите бељи кои ја задесуваат оваа планета. Меѓу нив и оние најпопуларните.

Кога човештвово еднаш ќе се распакува на Марс (како старите Словени кога од зад Карпатите стигнале некаде кај Пехчево, кога некој маж ѝ рекол на жена му: „А? Ти реков дека ќе те носам на јако место?“), многу веројатно е дека некој после напорниот пат ќе посака да го залие успехот со чаша вино. Грузијците веќе работат на тоа на црвената планета тогаш да има доволно грозје.

Веројатно е наивен и е само уште едно губење време по интернет и прегледување на фото архивите на вашиот телефон, но последниве неколку години толку многу народ се испоизгоре од доверба кон технолошките гиганти како Фејсбук, Твитер и слични, што веќе и на вакви челенџи почна да дува.

Компанијата неодамна објави една реклама со наслов „Најдобриот маж кој можеш да бидеш“. Стандардно корпоративно маркетинг парче, со прилично испрани и испеглани ситуации кои треба да го инспирираат мажот да не биде џукела. Еден интересен имам ги пингаше Жилет на Твитер и ги праша: Дечки, кај ви се вистинските проблеми?

Откако со децении килаво проаѓаат сите диети зад кои мотивацијата за слабеење е лична, научниците развиле диета која ветува дека оваа планета ќе може да прехрани 10 милијарди луѓе. Со други зборови, кога ќе сакате да загризете во оној ваш омилен колач, сочно парче месо, пастрмалија или што и да е што вам ви прави лиги, треба да си кажете: „Ама така ќе нема за сите!“. Наука ако не те насмее, кој?

Кинезите веќе долги години имаат пракса да одберат европски град што ги бендисува на око, и да направат негова идентична функционална копија во Кина. Хуавеи целата работа ја крева на повисоко ниво, па новиот кампус во Кина го прави исклучиво со клонови на населби од европски градови.

Се работи за Самбука, кој се наоѓа на Сицилија, излегува на Медитеранот, има полна зима со сончеви денови и од пред некое време нуди куќи на продажба по цена од 1 евро. Плус, сигурно ќе најдете место за паркинг.

Пораката е од рускиот министер за надворешни работи, според кого доволно децении се чека Јапонија да дојде на себе околу поразот и конечно да го потпише мировниот план со Русија. Двете земји се уште немаат потпишано мировен договор за завршување на Втората светска војна.

Откако се обистинил стихот од македонската песна „Зајди, зајди, јасно сонце“, на првиот зелен лист насаден на Месечината му станал јасен еден друг стих, од Забрањено пушење: „Овде ноќта паѓа грубо“. 

За еден пензиониран Чех, деноевиве осуден за тероризам. Не можејќи да дочека муслиманите да ја нападнат неговата земја, решава да ја напаѓа во нивно име.

Северното магнетно поле на нашата планета неочекувано забрзало и почнало да шиба од канадскиот Арктик накај Сибир. Промената е таква што актуелниот модел на магнетното поле на Земјата веќе не важи па мора да се прави нов.

Грчката царина ќе треба на ЕУ да и плати казна од 200 милиони евра затоа што не спречила кинеска криминална мрежа да шверцува облека и патики преку пристаништето во Пиреа. Инаку, во времето кога на Грците им беше најголема драма за пари пристаништето беше отстапено на Кинези.

Наспроти тоа што се едвај нешто над 600.000 луѓе, Луксембург константно има проблем со сообраќаен метеж. И ова планираат да го сменат со воведување бесплатен превоз.

Републиканците не минаа добро на последните избори за Конгрес, а Трамп речиси и да нема ден кога по некоја основа не минува добро. Овие првите имаат сериозен проблем со тоа што се случува, вториов барем за сега глуми дека ништо не го занима.

Европа е сама. Сама е стратешки и воено, како што тоа уште еднаш се покажа со одлуката на Трамп да ги повлече американските сили од Сирија, оставајќи голема празнина на Блискиот Исток. Сама е и економски, против двата блока - САД и Кина - кои, секој на свој начин, систематски ги таргетира индустриските капацитети на Европа и презема дигитална колонизација на Стариот континент.

Нобеловецот кој ја откри тајната на ДНК остана без сите свои титули, звања и почести поради неговите заклучоци дека расите се разликуваат по својата интелигенција. „Кој работел со црнци, знае,“ го шокираше светот своевремено Џејмс Вотсон. Кај вакви случаи никогаш не ти е докрај јасно дали научникот просто швркнал на стари години или пак можеби само открил една тајна премногу.

Една од најголемите, најмоќни и најбогати организации на светот е на почеток од едно долго натегање со градот Рим буквално за ситни пари.