Номинацијата на Трамп се базира на неговата заслуга за постигнување на Аврамовите спогодби меѓу Израел и Арапите, која според предлагачите се уште го нема добиено заслуженото признание.

Војната во Украина не е добра само за американскиот воено-индустриски комплекс, како што обично во САД се правда масовното праќање оружје на Украина, од аспект на зголеменото производство и работните места во тој комплекс. Затоа што и Русија има воено-индустриски комплекс. ММФ сега тоа го признава и ги менува прогнозите за Москва. 

Украинскиот претседател се откажал од смената на генералот Валериј Залужниј, барем за сега, откако добил закана дека заедно со Залужниј ќе заминат и највисоките офицери на украинската армија.

Првиот човек на норвешките вооружени сили предвидува дека Западот има две до три години за да се подготви за војна со Русија, Трамп победува на Њу Хемпшир, а Путин кон крајот на минатата недела се појавува во Калининград, сето ова аналитичарот на Телеграф го смета за причина што Британија за прв пат по децении е преплашена од започнување на Трета светска војна.

Студија открила дека оние кои донираат крв и крвна плазма, полесно се ослободуваат од таканаречените вечни хемикалии кои се неуништиви а ги има насекаде во човековата околина. Веста е добра за оние што донираат, но отвора проблем за оние што примаат, затоа што тие концентрации не се мерат. Дали некои сега ќе донираат крв само за да си го исплакнат организмот?

Како што блокадата на Републиканците за нова воена  помош за Украина се одолговлекува во четврти месец, администрацијата на Џо Бајден најде итар начин да им доставува оружје и муниција на украинските сили. Им даваат оружје и воена опрема на Грците за овие потоа да им даваат на Украинците.

Јасната економска математика покажува дека колку повеќе луѓето инсистираат да го задржат својот економски статус со зголемување на платите, толку повеќе придонесуваат кон растот на инфлацијата. Решението е или да се откажат од повисоки плати или да се откажат од пониска инфлација.

Судија во Делавер, американска држава во која е регистрирана компанијата Тесла, пресуди дека пакетот компензации кој Маск го добива за она што го прави за компанијата не може да биде поголем од 55 милијарди долари. Значи, може да си купи уште еден Твитер (за кој плати 44 милијарди) а другите 11 милијарди, за што попрво... Маск предлага, ако не ви се плаќа, дајте акции.  

Последно што објави Гардијан е дека Зеленски побарал од Залужни да даде оставка но популарниот командант на украинските вооружени сили одбил па се очекува да биде сменет. Ако е вистина тоа, Ким Дотком има една морничава верзија што се случува зад кулисите на оваа битна кадровска смена. Според него, конците ги влече „вистинскиот претседател на Украина,“ Викторија Нуланд.   

Нов водител и извршен продуцент на водечкото шоу на Комеди централ ќе биде човекот што го прослави и го претвори Дејли шоу во бренд и најпопуларниот водител на шоуто - Џон Стујарт.

За да се намали ќарот и исплатливоста на нелегалната продажба на кокаин, градоначалничката на Амстердам побара регулирање на продажбата и употребата на супстанцата, слично на формулата што беше искористена за марихуаната.

Доктор Ковид зачудувачки лесно проаѓа во медиумите иако е вклучен во многу контроверзни аспекти на пандемијата. За некои работи и натаму е убеден дека не била направена штета, за други дека е направена штета аама други се одговорни, а за некои работи кои во негова ера беа доминантна догма, допрва признава дека немале никаква научна основа. Социјалната дистанца, на пример.

Активирањето на Законот за вонредни ситуации за задушување на протестот камионџиите било спротивно на канадскиот устав, пресуди Федералниот суд на Канада. Според судот, либералната влада на Канада неуставно и неоправдано го употребила законот како одговор на блокадите од Конвојот на слободата.

Тоа што речиси дузина меинтстрим американски медиуми отпуштаат илјадници свои вработени и новинари покажува дека медиумскиот бизнис оди лошо. Тоа што ова се случува во изборна година која уште од сега се смета за историски важна, покажува дека бизнисот само ќе оди на бетер.

Едиторијал во влијателниот американски весник директно го прозива Бајден и неговата нерешителност за последните американски жртви на Блискиот исток. Американскиот претседател предолго се сведувал на празна реторика која звучи сè пошупшливо и му се предлага отворено да влезе во регионален конфликт. Како прво, да потопи еден ирански брод, на пример.

Американско-британската воена коалиција против Хутите не само што ги фрустрира Американците заради индифирентноста на европските сојузници од НАТО иако се засегнати и повеќе од САД, туку ги покажа и сите разлики меѓу американската морнарица и онаа на Велика Британија. Англичаните сфаќаат дека се многу назад и тоа Американците отворено им го кажуваат.  

Најмалку 9 од најголемите и најбогати држави на светот речиси синхронизирано го запреа финансирањето на УНРВА откако беше откриено дека вработени на агенцијата на Обединетите нации учествувале во нападот на Израел од 7 октомври.

Заборавена џебна ламба оставена пред моторот на Ф-35 ловец за време на редовен сервис во авионската база во Аризона, предизвикала штета од речиси 4 милиони долари на првото палење на моторот.

Јапонија стана петтата држава чие летало има слетано на Месечината (после Советскиот сојуз, САД, Кина и Индија). Слетувањето на нивното летало се смета за исклучително прецизно. Како врвен резултат се смета ако се приземји не подалеку од сто метри од посакуваната цел. Јапонците го слетале своето летало на помалку од десет метри. Со еден мал проблем.

Британците ги фаќа паника од новите правила за влез во ЕУ и проценуваат дека ќе им се направат огромни редови за излез. Новата гранична шема на унијата треба да стартува на есен, и освен плаќање за електронска авторизација (ЕTIAS), покрај пасош, ќе требаат и отпечатоци од прсти и фотографија. Англичаните проценуваат дека за да излезат кај Довер, би можело да се чека и по 14 саати.

Највисокиот американски авторитет за јавно здравје не испратил предупредување во врска со ковид вакцините и воспаление на срцето затоа што официјалните лица биле загрижени дека ќе се предизвика паника, покажува службен меил до кој дошол Епок Тајмс. Додека тие воделе сметка за својот имиџ во јавноста, мРНК вакцините масовно беа штанцани. 

Во Алабама е извршена првата егзекуција на затвореник осуден на смртна казна со помош на азот. Викаат дека тоа било похумано отколку со инекција со смртоносен коктел, како што вообичаено се изведува смртната казна во САД. Похумано? Јадников се мачел и се копрцал цели 22 минути пред да умре. Но, тоа не е сè. Претходно го имаат убивано четири саати. 

Акциите на Тесла паднаа за над 12%, откако берзата беше предупредена дека растот на продажбата годинава може да биде значително послаб отколку во 2023 година. Годишната заработка на Тесла, објавена ден претходно, исто така беше под очекувањата на Волстрит. Овие две работи инстантно избришаа околу 80 милијарди долари од берзантската вредност на компанијата на Илон Маск.

Некогаш синоним за слобода и животни шанси, денес Калифорнија пишти под разбудената агенда на гувернерот Гавин Њусом и суштински еднопартиската држава на која може да позавиди и кинескиот претседател. Децата во Калифорнија денес повеќе знаат за клима и зелени каузи отколку таблица за множење или граматика. А наскоро и рагби ќе им забранат.