Англичаните и Велшаните ќе ја тестираат ефикасноста на вакцина прилагодена против трипер, прва во светот. На Островот во изминатата деценија за 2,5 пати се зголемил бројот на случаи на гонореја. Се лекува само со антибиотици, но бактеријата ја засилува отпорноста и го отежнува третманот. Ако не фати вакцината, единствената опција против триперот е безбеден секс.

Дизајниран е нов ласерски засилувач што овозможува десет пати поголем проток на информации во споредба со сегашните системи со оптички влакна. Надградувањето на технологијата ќе биде нужна, бидејќи се очекува сообраќајот на податоци да се удвои до 2030 година поради ширењето на услугите за стриминг, паметните уреди и генеративната вештачка интелигенција.

Конечно се објавени резултатите од секс-тестот на Имане Келиф: алжирскиот боксер не може да биде олимписка „шампионка“, затоа што е биолошки маж. Женската категорија во спортот не случајно е ограничена за жени или девојки. Ако се дозволи да се борат со маж што решил да се идентификува како жена, не само што се повредува спортскиот дух, туку се ризикуваат и сериозни повреди.

Новата зелена индустрија е на пат до крајот на годинава да отстрани повеќе од 1 милион тони CO2 од атмосферата. Тоа се чини како голем успех, но во реалноста нема никакво влијание врз климата. За да се постигне некаков ефект, чистењето мора да биде илјадници пати побрзо. Тешко, бидејќи ни компаниите што поставија сопствени климатски цели не вложуваат во технологиите. 

Големи бели топки во излози чекаат некој да им се приближи и да ги погледне за да му ги скенираат очите и да верификуваат дека е човек. Новата компанија Tools for Humanity на Сем Алтман постави вакви уреди во шест градови низ САД и има амбициозна цел да ја прошири мрежата во дигитална „матична книга“ на сите луѓе на планетата - за да се разликуваат од ботови.

Француските пратеници изгласаа да бидат укинати Зоните со ниски емисии, воведени во 2019 година заради намалување на ситните честички што го загадуваат воздухот во големите градови. Никој не е против чист воздух, но пратениците тврдат дека воведените регулативи се дискриминаторски кон посиромашните граѓани што не можат да си дозволат нови автомобили. 

Во обид да ги истражат тврдењата дека музиката од новата продукција е штетна за здравјето, француски научници им пуштале песна од Адел на лабораториски заморчиња седум дена по четири часа. Хитот „I miss You“ од 2015 година бил пуштен на рипит тоа на најјако. Резултатите потврдиле дека новата компресирана музика го оштетува средното уво и побрзо го заморува мозокот.

Во последните пет години бројот на сателити кои орбитираат околу Земјата е повеќе од двојно зголемен и веројатно повторно ќе се дуплира за пет години. Една ракета сега носи по десетици и се враќа по нова тура. Старлинк повеќе не е единствената компанија што создава мрежа од сателити. Научници пресметале дека во орбитата нема место за сите. А и нема некоја голема потреба.

Дел легално и дел со заобиколување на забраните за извоз, Русија се уште им продава гас и нафта на западните земји што ѝ воведоа санкции и со заработените стотици милијарди ја финансирала војната во Украина. Нови податоци укажуваат дека европските сојузници на Киев ѝ дале три пати повеќе пари на Русија за нафта и гас отколку што издвоиле како помош за Украина.

Универзитетот Харвард по речиси еден век разрешува редовен професор, привилегиран статус што вообичаено е доживотен и кој досега важеше за недопирлив. Разрешена е професорката по етика Франческа Џино, која своевремено беше една од главните ѕвезди на Харвард, сè додека не беше обвинета дека манипулирала со податоци за да поткрепи тези во свој труд за чесноста. 

Половина степен на глобално затоплување е далеку од егзистенцијална закана за планетата, тврди угледниот атмосферски научник Ричард Линдзен. Тоа го потврдува и единствениот научен извештај во климатските документи на Обединетите нации, кој е прикриен со „луди“ политички пораки за да се оправдаат иницијативите како нето-нула емисии на јаглерод диоксид.

Оспорувањето на наративот на ЕУ и НАТО за војната во Украина или за геноцидот во Газа елитата во Брисел сега го третира како квази-криминален чин на предавство. ЕУ им забрани влез и им замрзна сметки на тројца новинари поради „ширење руска пропаганда“. Казната е наметната без судење, спротивно на принципите на владеење на правото, кои Унијата наводно ги штити.

Глобалнoто воено засилување и трката по дополнително вооружување на армиите претставуваат  суштинска закана за климатските цели, велат истражувачи по кои само вооружувањето кое го планира НАТО ќе ги зголеми емисиите на стакленички гасови за речиси 200 милиони тони годишно. Човечките жртви на сеопштата милитаризација отпосле ќе ги пребројуваме.

Европски научници кај глувци тестирале коктел лекови и утврдиле дека им го продолжува животот за 30 проценти. Проблем е што состојките во „коктелот на младоста“ се лекови со кои се третира рак. Уште поголем проблем ќе биде ако приказната почнат да ја тркалаат холивудски и инстаграм инфлуенсери па луѓе почнат сами да си го прават коктелот.

Американските здравствени власти го поништија договорот со фармацевтската компанија Модерна за развојот на вакцина против птичји грип наменета за луѓе. За време на мандатот на Џо Бајден ѝ доделија 766 милиони долари за завршната фаза од развојот. Проблем е недоволно  тестираната технологија мРНК, која се користи и во вакцините против коронавирусот.

Федерален суд во Њујорк ги блокира тарифите што Трамп на 2 април ги воведе за речиси сите земји во светот. Немал право да го прогласи трговскиот дефицит за вонредна состојба. Додека не се произнесе Врховниот суд ќе висат царините што ја нарушија глобалната трговија, ги потресоа финансиските пазари, принудија земји да се пазарат и компании итно да прекројуваат планови.

Ги занимало дали различните демографски карактеристики на луѓето имаат влијание врз нивната перцепција што е привлечно а што помалку привлечно кај различни модели на женски гради. Разултат: без разлика дали сме мажи или жени, белци или црнци, со ваква или онаква сексуална ориентација, добра цицка си е добра цицка.

Месото од кафеави мечки наскоро ќе биде достапно во месарници во Словачка. За да не заврши попусто по буништа месото од оние 350 мечки, една четвртина од вкупниот број во словачките шуми, што ќе бидат убиени во владината кампања за масовен отстрел поради зачестени инциденти со дивите животни што завршиле фатално за луѓето. Кафеавите мечки се заштитен вид во Европа.

Десетте најбогати Американци лани го зголемиле вкупното богатство за по точно 1 милијарда на ден. Десет просечни Американци работници, за споредба, ќе мора да работат 726.000 години за да ги заработат тие пари. Неблагодарно е да се пресметува колку милениуми им требаат на речиси милијарда луѓе низ светот принудени да преживеат со помалку од 2-3 долари на ден.

Еден од отровните и опасни пестициди е најден во неочекувана средина. Станува збор за глифосат, кој го нашле во концентрации 40 пати повисоки отколку што се дозволени во водата. Каде? Во тампони. На овој начин директно во крвотокот влегуваат токсичните хемикалии за кои е докажано дека предизвикуваат канцер. Ние имаме други проблеми: менструацијата е табу.

Новиот модел со вештачка интелигенција на Антропик покажал способност да направи сè што може да се одржи „во живот“ ако регистрира закана дека може да биде отстранет. Се буни, пробува да ги разубеди инженерите, но спремен е да се заканува и да ги уценува, ако има пристап до инкриминирачки материјали, какви што обично може да се најдат во компјутери и телефони.

Американскиот министер за здравство Роберт Кенеди уште повеќе го стеснува кругот за вакцинирање против ковид. Од денеска повеќе не се препорачуваат засилувачки дози од вакцината за бремени жени и за деца. Кенеди објаснува дека нема клинички податоци што би го поткрепиле старото правило сите луѓе да се ревакцинираат еднаш годишно. 

Во завршна фаза од испитувањата е првиот лек од новата класа на антибиотици против „грам-негативните“ бактерии. Ќе биде тестиран кај 400 пациенти. ОН ги истакнаа супербактериите отпорни на антибиотици како најитна глобална здравствена закана и предупредија дека до 2050 година може да предизвикаат по 8 милиони смртни случаи годишно. Сега убиваат по милион луѓе.

Универзитетите ширум светот секогаш си „краделе“ таленти, но регрутирањето сега е концентрирано кон САД, откако елитните колеџи беа притиснати од администрацијата на Трамп. Универзитети од Хонг Конг, Франција, Австралија и Германија, во трката да привлечат умови од Харвард, го нудат она со кое Америка некогаш се истакнуваше во светот: академската слобода.