Лабуристичката влада на Британија е решена цврсто да ги брани правата на работниците дури и ако за таа цел откине парче од слободата на говор, дури и во пабовите. Министерка тврди дека пабот нема да биде затворен ако бармен се навреди од ставови на гости на кои случајно им го слушнал разговорот. Но на муштериите им го згорчи пивото: ќе треба добро да помислат пред да кажат било што.

Службеничка од Њу Орлеанс, отпуштена поради долга историја на сексуално малтретирање на своите колеги, е вратена на местото на злосторствата. Градските власти оцениле дека не можат без неа, бидејќи им паднала продуктивноста. Жртвите ќе мора да ѝ простат и да продолжат да трпат. Фали уште некој да се сети да ангажира сексуални предатори за да поттикне поголема продуктивност. 

На планета во соѕвездието Лав многу поголема од нашата се откриени траги на две соединенија што на Земјата ги создава само биолошка активност. Астрофизичарите го сметаат тоа за досега најубедлив доказ дека живот постои надвор од Сончевиот систем. Нема знаци за вонземна цивилизација, но откритието ни помага да одговориме на вечното прашање дали сме сами во Универзумот.

Мото на ЕУ беше In varietate concordia („Единство во различноста“). Со децении европските елити ја негуваа сентименталната визија за отворени граници и хуманитарност, додека луѓето што тие наводно ги претставуваа станаа погневни и повознемирени поради дестабилизирачките ефекти на масовната миграција. Сега ќе ги носеле илегалните мигранти на Косово, во Багладеш.... Така било тоа.

Пред еден век антихистамините беа револуција во третманот на алергија. Нови клинички испитувања покажуваат дека уште поефикасни против алергии се лекови со моноклонални антитела што се наменети за астма. Една инјекција може да ги спречи симптомите цела пролетна сезона, не предизвикува непосакувани реакции и може да дејствува против сите типови на алергии. 

Европската стратегија со мерки за одвраќање да ги задржи мигрантите подалеку од нејзините граници постигнува резултати. Во првите три месеци од годинава за 31% е намален бројот на нелегални преминувања на границите, објави агенцијата Фронтекс. Мигрантите годинава најчесто ја заобиколуваат рутата преку Западен Балкан. По неа тргнале две третини помалку луѓе од лани. 

Врховниот суд на Обединетото Кралство пресуди дека транс-родовите жени, во правна смисла не се жени бидејќи легалната дефиниција на жена е базирана на биолошкиот пол а не на стекнатиот род. Tрансродовите лица повеќе нема да може да се жалат дека неправедно им се одземени правата да користат тоалети и соблекувални за жени.

Она што го сметавме за светски поредок станува светски неред, предизвикан не само од борбата за моќ меѓу Кина и САД, туку и од империјалистичките амбиции на Путин, вели претседателката на Европската комисија. Урсула фон дер Лајен најавува нова Европска Унија, подготвена да излезе во големиот свет и да игра активна улога во обликувањето на новиот светски поредок што доаѓа.

Ново истражување го оспорува долгогодишното верување дека високиот холестерол директно предизвикува коронарна артериска болест кај метаболички здрави лица чие ниво на ЛДЛ холестерол се зголемува поради кетогена диета со ниски јаглехидрати. Овие лица имаат високи нивоа на ЛДЛ без траги од коронарна артериска болест или прогресија на болеста со текот на времето.

Со или без Трамп, меѓународниот трговски систем треба да биде испратен по ѓаволите. Ни ја продаваа идејата дека глобализацијата навистина функционира, но дека е тешко за обичните Американци да го видат тоа бидејќи се потонати во горчина и носталгија. Фалена како лек, слободната трговија се покажа суштински корумпирана и треба да биде разнесена до небото.

Пописите воопшто не се прецизни во руралните средини, каде што живее 40% од светското население. Ново истражување открило грешки до 84%, што значи дека згора на официјалните 8,2 милијарди луѓе, планетава трпи уште барем милијарда што ги нема во статистиките. Со истражувањето била опфатена и Македонија. Кај нас реално има нешто помалку луѓе отколку што кажува пописот. 

„Европа не треба да го прави сè она што ќе ѝ го кажат Американците“. Оваа порака не доаѓа од Брисел, Париз или Берлин, туку од американскиот потпретседател Џеј Ди Венс. Вториот човек на Белата куќа ѝ порачува на Европа дека Америка ѝ останува пријател и сојузник. Само сака Европа да се соочи со реалноста, да биде понезависна, воено посилна и поодговорна кон сопствените граѓани.

Новата германска влада бара од ЕУ да се откаже од принципот на консензус за да може да продолжи проширувањето. Правото на вето на секоја земја е кочница за прием на нови членки. Ова го порача и францускиот претседател Макрон пред неколку години: прво реформи па проширување. Ако сега Европа не може до консензус со 27 членки, како ли ќе ѝ успее кога ќе има 35?

Кога во првиот мандат Трамп го пречека Трудо во Белата куќа (и цврсто му ја стискаше раката), говореше за „соседи што споделуваат многу повеќе од граница“. Во вториот мандат ја нарекува Канада „51 држава на САД“. Северниот сосед нема одговор зошто Трамп со територијалните претензии ги загрозува односите со најблискиот дипломатски, економски, воен и културен сојузник. 

Нема ништо од тврдењата на Кир Стармер дека ќе го реши проблемот со мигрантите и со шверцерските банди што ги транспортираат преку Ла Манш. Годинава со чамци пристигнале многу повеќе отколку во истиот период лани. Опозициските ториевци го обвинуваат премиерот дека единствениот план за заштита на границата му е „да се моли за лошо време“.

Пејачката Кети Пери, новинарката Гејл Кинг, свршеницата на Џеф Безос и уште три сопатнички го завршија својот краток вселенски излет со леталото „Blue Origin“ на Безос. Се спуштија безбедно во Тексас откако поминаа 11 минути на височина од 100 километри. Задоволството од неколку минути во бестежинска состојба, значката со сребрени крилја и дипломата „астронаути“ чинат 150.000 долари.

Претседателот Трамп го наведува трговскиот дефицит како доказ дека странците всушност ги ограбуваат Американците. Но, во пресметката на дефицитот се заборава на доларите што странците ги чуваат како резерви за да си обезбедат сигурна куповна моќ. Тој извоз што не се книжи во сметководството ја порамнува трговската размена и ја прави Америка богата и просперитетна.

За науката не е случајно тоа што Паркинсоновата болест почесто се појавува во земјоделски региони труени со глифосатии паракват. Сепак сè уште се прска и ќе се прска со овие пестициди. Холандски експерт го споредува ова со задоцнетото свестување од канцерогеноста на азбестот. Науката навреме предупредува, политиката не реагира, па дури по половина век ќе се прашаме „Што по ѓаволите мислевме?“.

Во воздухот во Париз буквално може да се забележат резултатите од политиките за ограничување на сообраќајот и за забрана на возилата што најмногу загадуваат. Многумина се бунеа, но мерките ги поттикнаа парижани да ги заменат автомобилите со велосипеди, да користат јавен транспорт и да пешачат. Покрај здравите навики, денес дишат двојно почист воздух и имаат поголеми зелени површини. 

Компанијата на Марк Закерберг се соочува со антимонополски судски процес што може да ја разбие како империја и да ја остави без главните извори на профит. Владата на САД настојува да докаже дека Мета со купувањето на Инстаграм и на Вотсап настапила монополски за да ги истисне заканите за нејзината доминација. Главниот адут на Закерберг е лобирањето кај Трамп.

Повеќе од еден век, Роршах тестовите со рандом дамки од мастило се користат како прозорец кон личноста на луѓето. Таквите тестови ја разигруваат човечката имагинација и способноста на нашиот ум да му дава значење на светот околу нас, во зависност од нашата психа, спомени, емоции... Но, како тие дамки ги толкува некој што нема ни психа, ни спомени, ни емоции?

Прашањето повеќе не е дали туку кога и каде ќе бидат депортирани Палестинците од Газа. Израелскиот врв се двоуми дали да ги префрли во Египет или пак да им најде нов „дом“ во Африка. Потоа само ќе треба да дојдат багерите да израмнат и да се посее трева, базени и туристички комплекси за ривиерата на Трамп. Само, стварно ли веруваат дека тоа ќе стави крај на палестинската и арапска приказна?

Идентитетот на уличниот уметник кој остава впечатливи визуелни дела со извонредно моќни и прецизни социјални коментари, над 30 години е вистинска енигма која многумина се обидуваа да ја хакнат. Едно време се поврзуваше со Масив Атак но човек кој со години бара траги на оваа тема вели дека Бенкси се бара на погрешно место - меѓу машките уметници.

Германска студија ги истражувала ефектите од таканаречениот универзален основен приход па три години на луѓе им давала пари секој месец, без никаква обрска како и за што ќе ги трошат. Студијата ја демантира главната секирација - дека таквиот џепарац ќе ги направи луѓето мрзливи. Да повтгориме, се работи за Германија.