Поранешниот грчки министер за финансии Јанис Варуфакис тврди дека проблемите на Европа извираат од лошо креираната монетарна унија на која ѝ недостасуваат соодветни фискални и инвестициски структури.
Нашата трагедија е тоа што имаме федерални пари. Имаме голема, монолитна Централна банка, и 20 државни трезори кои практично не можат да се потпираат на неа, вели Варуфакис.
Неговите коментари се насочени кон лидерите на ЕУ кои на неформалниот самит за конкурентност дебатираат за задолжувањето.
Со аргумент дека глобалните пазари бараат алтернативи на американскиот долар, францускиот претседател Емануел Макрон повика на објавување „еврообврзници ориентирани кон иднината“ заради финансирање на стратешки проекти. Германскиот канцелар Фридрих Мерц и италијанската премиерка Џорџа Мелони настапуваат со заедничка економска доктрина фокусирана на дерегулација. Холандија, нордиските и балтичките земји се спротивставуваат на иницијативата „Купувајте европски“, која ја сметаат за протекционизам.
Нашите големи лидери ќе се соберат во замок и, за жал, ќе дискутираат за сè освен за главното: дали сакаат да формираат федерален трезор и да ја променат структурата на Европската Унија од нефункционална конфедерација во федерација. Тоа е главното прашање, вели Варуфакис.
За иницијативите на претседателката на Европската комисија за нова рунда на дерегуларизација, тој одговара дека Урсула фон дер Лајен е „многу вешта да кажува фрази што звучат како решение, иако едноставно се манифестација на неуспехот“.
Можеби ни е потребна дерегулација. Но, причината за стагнирањето на Европа, за деиндустријализацијата на Германија, за фрагментирањето на Европа помеѓу САД и Кина е тоа што не сме имале ниту една инвестиција 20 години. Немаме, затоа што сме го формирале монетарниот систем, еврото, кое е федерално во својата монетарна структура, но нема фискална или инвестициска основа што би го поддржала, заклучува Варуфакис.
