Постепеното укинување на нуклеарната енергија во Германија беше сериозна стратешка грешка, оцени канцеларот Фридрих Мерц и најави обновување на атомските централи и изградба на нови реактори. Неразумната „зелена“ стратегија и запирањето на гасот од Русија ја оставија германската индустрија без доволно енергија, а домаќинствата со најскапа струја.

По долга расправа, европските земји ѝ дозволија на Украина да купува и американско оружје со заемот што неодамна ѝ го одобри Европската Унија. Макрон упорно инсистирал парите да се трошат само на европско оружје – што би значело милијардите од буџетот на ЕУ преку Киев да се прелеат во приватни европски компании. Германија и Холандија го разубедиле.

Тајван ја надмина Јужна Кореја како земја во која се раѓаат најмалку деца. Годишната стапка на наталитет паднала на 4,62 новороденчиња на 1.000 луѓе. Секоја жена просечно раѓа по 0,8 бебиња. Земјата важи за „супер-старо“ општество, бидејќи Тајванците на возраст над 65 години надминаа една петтина од вкупната популација.

При симулација на епидемија на птичји грип во Португалија, пациентите кои одбиваат да користат маски се издвоени како „закана“ за напорите за запирање на вирусот. Засилениот интерес за вирусот H5N1 потсетува на сличните симулации што ѝ претходеа на пандемијата на ковид, покрај  истражувањата со стекнување функции кај вируси и развојот на mRNA вакцини.

Српски и руски разузнавачи заеднички спроведувале експерименти за ефекти од моќни децибели од звучници насочени кон кучиња, тврди порталот Политико. Тестовите биле направени две недели откако демонстранти во Белград се пожалија на употреба на „звучни топови“. Руската ФСБ заклучила дека кај кучињата не биле забележани промени во однесувањето.

Не толку одамна, десничарските либерали беа сигурни дека фосилните горива наскоро ќе станат безвредни и светот ќе влезе во светла обновлива иднина. Сепак, како што покажува преземањето на Венецуела од претседателот Трамп, не може да има успешни економии без лесен пристап до нафта и гас. „Империјата на фосилни горива“ го возврати ударот.

Доналд Трамп тврди дека нема никаква врска со семејниот бизнис додека е на претседателска функција, но бодат очи градежните зделки на неговите синови по светот. Организацијата Трамп објави нови проекти за недвижнини во вредност од десетина милијарди долари во Саудиска Арабија - хотел, голф терен и луксузни вили во градот Дирија.

Покрај Венецуела, Доналд Трамп нанишани уште неколку земји во „неговата “западна хемисфера. Колумбија заради производството на дрога, Мексико заради нарко-картелите, Куба заради политичката кауза. Но, на списокот фали една земја која е предводена не од еден, туку од двајца диктатори и во која опозицијата се протерува, затвора или и на друг начин задушува. Станува збор за Никарагва.

Трамп мислеше дека со високи царини ќе ја зафркне Кина и ќе ја крене американската индустрија, ама експертите во Пекинг подготвиле добра одбранбена стратегија. Извозот на кинески производи во САД паднал за 20%, но со навремено пренасочување на трговијата кон други пазари Кина лани остварила рекорден суфицит од речиси 1.200 милијарди долари. 

Макрон и Мелони вршат притисок врз ЕУ да назначи специјален преговарач што ќе ги застапува колективните интереси во преговорите со Русија. Турбо-дипломатијата на Трамп и приближувањето кон Москва не само што ја изолира Европа од мировниот процес за Украина, туку и ја остави без глас во поширокото преуредување на односите на сопствениот континент.

Унгарскиот премиер Виктор Орбан упорно ги блокира напорите на ЕУ да ја продолжат војната во Украина или да ги грабнат замрзнатите руските милијарди. Затоа не се големо изненадување протечените документи што сведочат дека висок функционер во Брисел со години тајно планирал операција за отстранување од власт на Орбан и неговата партија Фидес.

Мобилна апликација со морбидно име се искачи на врвот листите на платени на продавниците на Епл во Кина, нудејќи суров потсетник за тоа колку мрачен може да биде модерниот живот и за младите и за старите. Апликацијата го адресира раширениот страв меѓу самците дека ќе умрат, а тоа никој нема да го забележи. А такви во Кина, за некоја година ќе има 200 милиони. 

Озлогласениот глифосат на Монсанто не е единствениот отров што ги труе земјоделците. Ново истражување покажува дека долготрајна изложеност на вообичаениот пестицид хлорпирифос за повеќе од 2,74 пати го зголемува ризикот од развој на Паркинсонова болест. Пестицидот е забранет во ЕУ, но до неодамна се прскал во САД и денес на големо се користи низ светот.

Германската министерка за здравство со огорченост реагираше на критиките од нејзиниот американски колега дека Берлин им ги наметнувал на граѓаните вакцинирањето против ковид и носењето маски. Јавноста коментира дека Роберт Кенеди всушност е во право и дека пациентите во Германија практично немаат слобода за медицински одлуки.

Постигнувањето на климатските цели за нето нула емисија на штетни гасови, ќе ја чини Британија многу повеќе од највисокиот проектиран минус од 7.600 милијарди фунти. Проценките за финансиската штета се базирале на „фантастични претпоставки“ за цената на обновливата енергија и технологијата со ниски јаглеродни емисии, покажува нов извештај.

Откако ги исклучија телефонските врски пристапот до интернет за 90 милиони луѓе во земјата, иранските власти настојуваат да ги откријат последните преостанати предаватели на Старлинк преку кои протекуваат видеа и информации за крвавото задушување на масовните протести. Трамп најави дека ќе им го врати интернетот на Иранците.

Трамп му објави војна на фентанилот. Поради огромниот број смртни случаи со декрет ја прогласи оваа синтетичка дрога за „оружје за масовно уништување“. Бројот на случаи од предозирање почнал да се намалува, но не поради заканите од Трамп, туку поради одлуката на Пекинг да го запре извозот на хемикалии за нарко-лабораториите во Мексико.

Неразјаснет хакерски напад го спречил пристапот до нова глобална студија во која се откриваат врски помеѓу нови и „разбудени“ случаи на рак кај луѓе по вакцинација против ковид. „Цензурата е жива и здрава во САД и влезе во медицината на голем, ужасен начин“, забележува еден од авторите на истражувањето спроведено во 27 земји. 

Комесарот за одбрана на Европската Унија бара обновување на старата иницијатива за создавање единствена и голема европска армија од 100.000 војници, која би била поефикасна од малите армии на 27-те членки. Одбраната на Европа зависи од повеќе инвестиции во производство, организирани институции и политичка волја за одвраќање или војна.

Кабинетот на Мерц сака да ѝ даде поголеми овластувања на разузнавачката служба за следење на интернетот, наводно за да ѝ ги зголеми капацитетите за кибернетска одбрана. БНД, според нов нацрт-закон ќе добие право да пребарува содржина на снимени комуникации и да хакира бази на оператори и на платформи како Google, Meta или X.

Охрабрен од успешната операција за грабнување на лидерот на Венецуела, Трамп не отфрла слично сценарио за отстранување на ајатолахот Хамнеи, со надеж дека идниот врховен лидер на Иран ќе биде пофлексибилен и отворен за соработка. Трамп изјави на социјалните медиуми дека знае каде се крие Хамнеи, но дека не би сакал да биде убиен - „барем не засега“.

Конрад Аденауер и неговото управување со Германија станува сè полегендарно, не затоа што се пронајдени некои нови историски извори или вистини, туку затоа што таа Германија на луѓето им изгледа речиси идилично во однос на денешна Германија и сите нејзини непознаници и предизвици. А и не за чудење што во споредба со политички и државнички кепеци како Мерц или Шолц, Аденауер изгледа како џин.   

Постојат околу 300 меѓувладини организации и околу 45.000 меѓународно активни невладини организации. Неодамнешното повлекување на САД од шеесетина ентитети и договори - кои се фокусираат главно на климата, миграцијата и работната сила - е огромен и битен чекор. Во сите нив Американците имаа клучна улога. Без главниот штеп, кројката на мултилатеризмот ќе се распара.

Американската специјална виза некогаш беше дизајнирана во земјата да донесе уметници од светска класа. Од апликантите се бараа светски достигнувања, важни награди и други параметри за докажување на нивните извонредни способности во областа на уметноста, филмот, музиката... Денес најбројни апликанти се оние од ОнлиФанс. Тие покажуваат број на фоловери и договори со брендови.