Група демократски сенатори неодамна предложија резолуција за запирање на одбранбените субвенции за Израел во вредност од 659 милиони долари, одобрени од претседателот Доналд Трамп.
Со оглед на ужасното уништување што екстремистичката влада на Израел го предизвика врз Газа, Иран и Либан, последното нешто на светот што американските даночни обврзници треба да го направат во моментов е да обезбедат 22.000 нови бомби за владата на Нетанјаху, соопшти Берни Сандерс, еден од предлагачите на резолуцијата.
Со пријавувањето дека оружјето е „продадено“ и дека Израел е „купувач“, всушност се прикрива кој плаќа за поголемиот дел од пратките. Планот за продажба на 22.000 бомби, кој сенаторите сакаат да го блокираат, е целосно финансиран од Военото финансирање во странство (ФМФ) - програма за воена помош на САД преку која Израел добива најмалку 3,3 милијарди долари годишно. ФМФ во пракса функционира како платежна картичка што Израел може да ја троши на оружје со пари обезбедени од американските даночни обврзници.
Во четирите најнови извештаи за продажба на оружје на Израел, во Федералниот регистар се запишани 740 милиони долари за оклопни транспортери, 1,98 милијарди долари за тактички возила и опрема, 3,8 милијарди долари за борбени хеликоптери и оружје и 150 милиони долари за повеќенаменски хеликоптери и делови.
Како „потенцијален купувач“ во сите белешки е наведена Владата на Израел, но како „извор на финансирање“ е запишан ФМФ. Во четирите договори во вкупна сума од 6,7 милијарди долари единствената трага од израелско финансирање има во договорот за тактички возила.
Овој систем функционирал и пред Трамп да се врати во Белата куќа. Во мандатот на претседателот Џо Бајден САД му продале на Израел оружје во вредност од 22 милијарди долари, за кое Американците платиле 17,8 милијарди - 11,9 милијарди долари со посредство на владата и 5,9 милијарди долари комерцијално, преку системот ФМФ.
Ваквото канализирање на плаќањето ги исклучува и сите тврдења на администрацијата дека продажбата на оружје носи значителни странски инвестиции во САД. Спорен е и аргументот дека тоа создава нови работни места.
Во 1985 година, кога воениот буџет на САД беше 295 милијарди долари (746 милијарди во денешни долари, со пресметана инфлација) имаше 3 милиони работници во воената индустрија. До 2021 година воениот буџет се зголеми за 132 милијарди долари во реални услови (879 милијарди долари денес), а бројот на работниците се намали на 1,1 милион. Тоа покажува дека воените трошоци реално се зголемиле за 18%, а вработувањата во одбранбената индустрија се намалиле за 63%.
