Ози Озборн почина на 76 години. Принцот на темнината беше икона на британскиот хевиметал и не ни се очекуваше да доживее толку, да не беше една ретка генетска деформација која огромните количини алкохол и дроги кои со децении ги истураше во себе не му ги поништуваше многи поефикасно отколку кај нормален човек. Ози Озборн се одјави само три недели по прошталниот концерт на Блек Сабат. „Mama, I’m Coming Home“, најави тој од бината.

Бриселските бирократи не дозволуваат некој да им ги нарушува строгите правила на единствениот пазар, дури ни кога тоа се водечки светски еколошки регулативи. Французите педантно со повеќегодишна кампања создавале култура граѓаните правилно да го сортираат отпадот. Брисел на суд ќе се бори против француските етикети на производите за да ги прилагоди на своите стандарди.

Иако постојано е напаѓан во својата земја поради смелите ставови, британскиот доктор Асим Малхотра ги убеди властите да го намалат нивото на шеќер во храната. Вакцините со мРНА ги смета за апсолутна катастрофа и го критикува масовното препишување статини како превентива од срцеви заболувања. Сега тргна во битка против „инјекцијата за слабеење“ што ја воведе NHS.

Вообичаениот третман со хемотерапија насочен кон примарниот тумор може да ги разбуди неактивните клетки на ракот што веќе се вгнездиле во други органи од пациентот, предупредуваат научници од Кинеската академија на науки. Во тек се клинички испитувања дали овие несакани последици може да се спречат со додавање лекови што го запираат стареењето на клетките.

Мозочни активности кај оптимистите и песимистите го потврдуваат Принципот на Ана Каренина, кој Толстој го дефинира на почетокот на романот: „Сите среќни семејства се слични; секое несреќно семејство е несреќно на свој начин“. Сличната бранова должина ги групира оптимистите во јадро на социјални групи, а секој песимист има сопствени стравови што го водат кон црно сценарио.

Кинеската хидроцентрала Три клисури ги собори сите рекорди според големината и произведената струја. На Кинезите и тоа им е малку, па сега градат нова брана на Тибет, три пати поголема. Вложија 167 милијарди долари за систем од пет брани и 20 тунели под планина. Индија и Бангладеш се жалат дека ќе останат без вода или може да бидат збришани ако Кина ги одврти вентилите.

Аналитичарка со дебели врски во ФБИ ги потврдува извештаите дека службеници во Вашингтон се ангажирани да го пребаруваат секое спомнување на Доналд Трамп во досието за педофилот Џефри Епстин. Прелистуваат 300.000 страници и водат дневник. На Трамп некако не му се сака, но и најзакоравените членови на МАГА го притискаат да ги објави целосните документи за Епстин.

Мајкрософт ќе собира милиони тони човечки измет од канализации, животински лепешки и арски гној за да ги спакува длабоко под земја и така да добие прошка за ѓубрето што во воздухот го испуштаат огромните центри за податоци со кои се напојува вештачката интелигенција. Нема да ги извалка рацете, туку ќе ѝ плати на специјализирана компанија за безбедно складирање отпад.

Од жаришта во Азија повторно на светот му се заканува тифусната треска, од која луѓето страдале со милениуми, сè додека не ја искорениле со едноставни апчиња. Бактеријата salmonella typhi сега покажува отпорност на речиси секој антибиотик што лекарите го користат против неа. Мутации се шират и се вгнездуваат во Африка, но и во земји со развиени здравствени системи како САД и Британија.

Агенции за изнајмување автомобили сè почесто користат скенери со вештачка интелигенција што темелно го снимаат возилото и пронаоѓаат и најситни оштетувања. Гребнатинка на бандаж може да чини повеќе од изнајмувањето. Чаре нема. Корисниците немаат можност ни да се пожалат дека можеби им е накалемена туѓа штета. Слаба одбрана им се осигурувањето или снимањето на колата.

Светското првенство на програмери во Токио ќе се памети како првиот и веројатно последниот натпревар на кој човек победил машина. Во конкуренција на 12 врвни програмери, ЧетГПТ бил на второто место. Како раната верзија на Дип блу, која загуби во првиот шаховски дуел од Каспаров. Велемајсторите денес немаат шанси против машини, но и не можат без нивна помош. Слично и програмерите.

Научници откриле дека ковид вакцината на Фајзер може да води кон оштетување на окото и губење на видот. Во случаите кои ги следеле и мереле, двете дози на Фајзер доведуваат до здебелена рожница и помалку ендотелни клетки во окото. На краток рок ништо страшно, но ако ваквите ефекти траат подолго, може да настанат сериозни проблеми.

Со технологија „украдена“ од Мајкрософт, Кина прави чекор подлабоко во трката со САД за супериорност во развој на вештачката интелигенција. Hailanyun гради центар за податоци на дното на морето близу Шангај. Енергијата за процесорите ќе ја црпи од плантажа ветерници, а серверите ќе се разладуваат природно, со што ќе се заштеди 30% струја и милиони тони вода за ладење.

Повикувајќи се на извори во Вашингтон, упатениот пулицеровец Сејмор Херш пишува дека смената на Зеленски е прашање на месеци. Ако нејќе доброволно да си оди, ќе си оди со сила, велат неговите информатори кои се надеваат дека нема да мора ЦИА да биде вклучена во тој проект. Во меѓувреме Херш добил проценки за руските жртви досега. Страшно. Два милиона луѓе.

Соочени со невозможна мисија да пополнат дупка од 20 милијарди фунти во буџетот, британските власти разгледуваат како да ги продадат криптовалутите што полицијата ги запленила од криминални зделки и измами. Експерти ги предупредуваат лабуристите да не ја повторат глупоста на Гордон Браун, кој од државните резерви продаде 400 тони злато кога беше по најниска пазарна цена.

Квантна состојба на светлина успешно била телепортирана на далечина од триесетина километри преку вообичаен оптички кабел за интернет, отповарен со бура од сообраќај со пораки, извештаи и клипчиња. Ова е далеку од телепортерот на Скоти од Стартрек или од транспорт на каков било предмет, но дозволува во обичен кабел да се вклучат компјутерите од идната генерација.

Откако САД дефинитивно се повлекоа од Парискиот климатски договор, Европската Унија гордо се претставуваше како глобален лидер во зелената кауза. Не за долго. Комисијата на Урсула фон дер Лајен сега испраќа јасни сигнали дека се откажува од таа улога. Брисел прво ја разлабави границата за емисии на стакленички гасови, а сега крати зелени проекти за да издвои повеќе пари за одбрана.

Директорката на американското разузнавање Тулси Габард побара кривично гонење на поранешниот претседател Барак Обама и на неговите најблиски соработници поради „велепредавнички заговор“ за дискредитирање на изборната победа на Доналд Трамп во 2016 година. Тврди дека дружината на Обама ширела непотврдени разузнавачки процени за руско мешање во изборите.

Она што почна како збир на длабоки претпоставки за поврзување на апстрактните гранки на математиката, еволуираше во просперитетен, мултидисциплинарен напор што се протега од темелите на Теоријата на броеви до границите на квантната физика. Доказот на хипотеза од пред половина век создаде мрежа од идеи што веројатно ќе ја обликуваат областа во годините што доаѓаат.

Американскиот авио-гигант Делта има долгорочна стратегија да ги напушти фиксните цени и да се насочи кон индивидуализирано одредување цени со помош на вештачка интелигенција. Досегашното искуство им било „неверојатно поволно“. Застапник на потрошувачите ја споредува оваа тактика со „хакирање на нашите мозоци“.

Фон дер Лајен можеби преживеа, но нејзиниот режим се напрега под притисок од популистите и само е прашање на време е уште едно гласање за недоверба. Ако на крајот биде принудена да се повлече, тоа нема да биде затоа што демократијата одеднаш пристигнала во Брисел. Ќе биде затоа што нејзините колеги-членови на картелот го изгубиле трпението со нејзиното управување со режимот.

Растечките трошоци за живот во Германија сè повеќе ја намалуваат реалната куповна моќ на граѓаните и им го прават животот сè поскап. Ако се имаат предвид цените, посиромашни се дури и од Русите, кои водат војна, трпат санкции и имаат висока инфлација. Германските семејства најмногу се оптоварени од зголемувањето на кириите, кои во големите градови поскапеле за 27%. 

Не само што веганското млеко не му е нутритивно еквивалентно на кравјото, туку и растителните суплементи може да предизвикаат токсиколошки проблеми, особено кај малите деца. Препораката од експертите е децата да пијат полномасно или полуобезмастено кравјо млеко. Оние на растителна основа се прифатлива алтернатива само ако се незасладени и збогатени со витамини.