Само неколку часа откако светот го достигна прилично шокантниот праг од 10 милиони случаи на ковид -19, стигна нова рекорд - 500.000 мртви. Тоа значи дека жртвениот биланс се има дуплирано за само седум недели. Македонија својски се труди да биде една од најлошите. 

Најпознатиот светски бренд за кафиња не само што ќе го бојкотира Фејсбук со реклами, туку истото им следува и на сите останати социјални мрежи што се во оптек. Пред некој ден и Кока-кола глобално ги стави на пауза рекламите на социјални мрежи.

Ѓоковиќ проба корона-драмата милеровски да ја напушти. Да обзнани дека животот мора да продолжи понатаму а ова што го имавме во претходните месеци не е живот и никогаш не смееме да прифатиме да го дефинираме како живот. Праведниците и душегрижниците ќе му се лутат како што ни се лутат и нам, малите и анонимни граѓани кои би сакале, малку од малку, да ги живуцкаме нашите животи, да се дружиме - дури и да се допираме и љубиме, јеботе! - да седиме во кафани, да одиме во театар (нема да ни дадат, не се секирајте) и генерално, да се однесуваме некако нестерилно.

Западни медиуми мораат да се враќаат во минатото и да потсетуваат дека на многу сличен отпор на денешните маски, своевремено наидоа и појасите во автомобилите. Во земја во која масовно се ставаат лажни лаживчиња или појасите се врзуваат зад седиште, нас не мора да нè потсетува минатото. 

Телеком операторот Веризон стана најновиот и најголем огласувач на Фејсбук кој реши да се приклучи кон бојкотот на рекламирање на социјалната мрежа обвинета дека не се труди ни приближно колку што треба за справување со говорот на омраза на платформата.

Кошаркарот и неговите бизнис партнери успеаа да осигурат инвестиција од 100 милиони долари за нивната медиумска компанија чиј главен таргет ќе биде црнечката публика.

Под будното око на глобалната глутница лустратори не помина незабележано црно-белиот расист кој со векови се провлекува неказнет. Ако се прашувате зошто шахот е расистички кога има подеднаков број црни и бели играчи и подеднаков број црни и бели полиња, во најмала рака сте наивни: а кој секогаш почнува прв? 

Веста е дека во Аргентина се продава станот во кој се родил Ернесто Че Гевара. Бонус информацијата што не ја знаевме е дека Че Гевара е роден и израснат во стан од 240 метри квадратни.

Медиуми од Бразил, Германија и Австралија успеаа да добијат договор со агрегаторот на вести на Гугл, да почне да им плаќа за вестите што се реобјавуваат (линкаат) на сервисот.

Ние малите народи имаме два непријатела. Едниот е Запад кој нè доживува само како дивјаци и робови способни единствено да ги чистат нивните гомна. Другиот непријател ни е многу поголем, политичарите кои со децении систематски нè убиваат со глад, лаги, безчувствителност, крадење, ширење омраза. Па ти избери. Или остани овде и цркни. Или оди некаде далеку и пцовисај.

Стратегот зад шведската ковид-19 стратегија, државниот епидемиолог Андерс Тегнел, е подготвен да ја ревидира употребата на маски, откако претходно беше изричито против нив.

Како мерка против ширење на епидемијата гласањето во Русија ќе трае 7 дена, а со него треба да се комплетира проектот за продолжување на владеењето на Владимир Путин и отворање пат за тој да остане на власт до 2036. Во 2036 Путин ќе има 83 години.

Еве ни уште еден шокантен пресврт и тоа во нешто што го мислевме за интуитивно разбирливо и сосема неконтроверзно поправање на штетата која човекот ја прави на планетата: да садиме што повеќе дрвја. Тоа може да донесе повеќе зијан отколку ќар, предупредуваат новите сознанија.

Откако не успеа да предизвика апокалипса со претходниот, ЦЕРН сега планира да гради речиси четири пати поголем супер-колајдер кој треба уште нешто да дообјасни околу Хигс Босон честичката.

Парчето јаже откриено во гаражата на НАСКАР возачот Баба Волис, кое беше протолкувано како закана за негово линчување и потоа беше основа за наплив на (оправдани) осуди и поддршка, всушност служи за кревање на вратата на гаражата и таму е уште од лани.

Агенцијата за кастинг ангажирана за серијата Господар на прстените, пушти оглас во кој бара луѓе со долги и костести екстремитети, големи клемпави уши, лузни од бубуљици, костесто лице, големи очи, вилици што се преклопуваат и недостаток на коски.

Секој фатен како се обидува да собори статуа или споменик ќе биде уапсен, и за тоа би можел да лежи до 10 години затвор, a затоа што ова само по себе не е доволно трамповски потег, американскиот претседател најави дека наредбата ќе важи и „ретроактивно“.

Дел од Сиетл веќе некое време се води како зона без полиција окупирана од вооружени демонстранти, и ова до сега главно беше дозволено по линија на „нека им пројде меракот“. Викендов во зоната беа застрелани три лица, а со тоа и зоната почна ситно да брои.

Една посериозна 'рчка со Кина подоцна и индиските власти инстантно се вратија на вршење притисок за што поскора испорака на рускиот С-400 одбранбен систем, кој до сега не го брза од атер на САД и Трамп.

Веста гласи дека Вашингтон е разочаран што Кинезите не се појавија на разговорите за нуклеарно разоружување во Виена па ќе мора светов да се спасува само со нив и Русија. А и столчиња им обезбедиле и знаменца им ставиле. Кинезот вика, чекај малку.

Активистот Шаун Кинг, еден од највлијателните лица во движењето Блек Лајвс Метер, даде „зелено светло“ за рушење на статуи на Исус Христос со објаснување дека начинот на кој тој е претставен е дел од идеологијата на белата супремација.

Таман пофаќавме некоја логика и се израдувавме од бројните вести дека заради пандемијата и генералното стишување на човекот, загадувањето е битно намалено и природата се враќа во нормала, ете ти вест дека Арктикот забалежува рекордно високи температури.

Слично како тестовите за бременост, главно ако некој тест за ковид-19 е позитивен тогаш сигурно значи дека си заразен, меѓутоа ако е негативен не е баш сигурно дека си негативен.

Идејата е тотално нетипична а звучи возбудливо: со помош на мамци да се прелаже коронавирусот и да му се одвлече вниманието од неговата главна цел,  да стигне во белите дробови.