Трамп се погоди и себе со царинскиот рафал за целиот свет. Форбс проценува дека за една недела неговото богатство се намалило за половина милијарда долари. Луѓето се потпираат на каприци, а не на логика, кога купуваат луксузни недвижности и скапи членства во клубови. Колку е поголема неизвесноста од потезите на Трамп за глобалната економија, толку повеќе ќе му се намали личното богатство.

Администрацијата на Доналд Трамп ќе ги удри по џебот илегалните мигранти за да ги притисне самите да си заминат. За секој ден поминат во САД по наредбата за депортација, ќе мора да платат како за ноќевање во луксузна соба во хотелот на Трамп во Њујорк. Целта повеќе е да се заплашат мигрантите и да се забрза депортацијата отколку да им се соберат пари или да им се заплени имот.

Трамп ги најави царините за секоја земја како „реципрочни“ и милозливо преполовени: Тие нас 65, ние нив 33%. Па беше објаснето дека процентите немале врска со реални царини за САД, туку биле баждарени со равенка врз основа на трговскиот дефицит со секоја земја. Сега се покажува дека и таа формула случајно или намерно била погрешна за да се добие четири пати повисок резултат.

На тарифите од 20% што Доналд Трамп им ги воведе на членките на Европската Унија, поранешните трговски сојузници ќе возвратат со повисоки контрацарини, но и со внимателно одмерен удар по најболната точка за Американците - по живинарските производи. Поради птичјиот грип Америка остана без јајца. Конечниот список производи за царинење ЕУ ќе го соопшти денеска.

Љубовта е посилна од сè, освен можеби од патриотизмот. На сите американски службеници во Кина им се забранети интимни врски со локални жители за да се спречи протекување доверливи информации шепнати по романтична вечера или секс. Причина е се поагресивното поставување „медени стапици“ - заводници што настојуваат да продрат подлабоко во американските тајни.

Големите инвеститори од Вол стрит, дури и оние што го поддржуваа Трамп, ја губат довербата во економската политика на претседателот. Пресвртот е воведувањето на тарифи за целиот свет, одлука што збриша илјадници милијарди долари од вредноста на акциите на берзите од Њујорк до Токио. Повеќето од половината „тешкаши“ од Вол стрит го оценија Трамп со „недоволен 1“.

По речиси 12 милениуми, повторно се слуша завивање на страшниот волк, снежнобела сорта исчезната од Леденото доба, овековечена во Дух во Играта на тронови. Трите младенчиња биле зачнати со генетски инженеринг, со ДНК од фосили на заб вметнат во јајце-клетка на волчица и созревани во утроба на кучка. Следниот предизвик: Да се оживее волнениот мамут.

Кога станува збор за глобалниот глад, теоретичарите на заговори, нивните долгогодишни непријатели ЦИА и Пентагон се согласуваат во едно: во предупредувањата колку брзо граѓанското општество може да се распадне кога на портата ќе затропа гладот. Вистината е дека луѓето не гладуваат затоа што нема доволно храна, туку бидејќи не можат да си ја дозволат. 

Мартин Вигинс ќе го трча Лондонскиот маратон облечен како флуоресцентен портокалов сообраќаен конус. Не оти има некој фетиш, туку за да биде препознатлив и да го привлече вниманието кон големиот проблем со кој се соочува секој осми возрасен маж. Да собере пари за истражување на ракот на простата и да ги охрабри мажите почесто да се тестираат.

Општата паника на берзите и стравувањата од инфлациски скок поради трговската војна Трамп повторно го истури својот гнев врз Федералните резерви, инсистирајќи да ги намали каматните стапки. Претседателот на Централната банка не дава знаци дека попушти под притисокот. ФЕД ќе чека материјални докази за повисока инфлација и невработеност за да интервенира.

Бебињата што веднаш по раѓањето примале антибиотици имале намалена имунореакција на вакцини кога биле на возраст од 7 до 15 месеци, покажува нова студија. Причината е уништувањето на корисна бактерија во цревата што го засилува ефектот на вакцините. Лекарите велат дека нема „претерана“ причина за загриженост, зашто и антибиотиците имаат важна улога.

Тајванскиот ТСМЦ го претстави својот нов микрочип од 2 нанометри, кој е најнапреден, најмал, најбрз и најштедлив во светот. Ќе биде основа за нова генерација телефони, апарати, возила, машини и центри за вештачка интелигенција. Но, чипот нема да се произведува во фабриките што ТСМЦ ги отвора во САД. Тајван љубоморно го чува како силициумски штит од кинеска инвазија.

Воведувањето тарифи за ненаселените пацифички острови на кои има само пингвини не било пропуст, туку претпазлив потег на администрацијата на Трамп. Избегната е вообичаената стратегија да се искористат законските дупки и таму фиктивно да се префрли производство преку утовар и истовар на бродски товар. Тоа веќе на големо се прави во трговијата со туна, за да ѝ се брише потеклото.

Доналд Трамп упорно тврди дека паничната продажба и падот на берзите од Њујорк до Токио се „горчливото апче“ што економијата мора да го проголта за да се стабилизира во систем што би бил поправичен за САД. На Американците им порача „Држете се!“. Инвеститорите не се убедени дека оваа шок-терапија ќе донесе благосостојба. Прогнозираат рецесија, повисока инфлација и невработеност.

Неочекуван пресврт во топ листата земји на Европската Унија во поглед на барањето азил. Стандардниот повеќегодишен лидер веќе не е на првото место, откако бројот на барања во последните три месеци паднал за преку 40 проценти. Првите места на таа листа имаат десетици илјади апликации. Унгарија само 22.

Иконата на француската десница, Марин Ле Пен, минатиот понеделник беше осудена на пет години политичка забрана и четири години затвор, од кои две ќе ги мине со електронска алка на нога. Осудена беше за проневера на јавни средства со пресуда која како бомба одекна во Франција и за момент засени еден далеку посимптоматичен, хроничен случај за проневери. Ви текнува на Саркози и Гадафи?

Како „бомба“ во Германија одекна повикот од шефот на канцеларијата за миграција, кој побара целосна ревизија на системот за азил. Тој тврди дека системот не е одговорен ни за мигрантите ни за граѓаните. Пратеничката Серап Ѓулер додава дека гастарбајтерите од постарата генерација морале да работат напорно, а сега „толку многу луѓе добиваат многу без да се бара ништо од нив“.

Вештачката интелигенција не е само најжешката технолошка приказна на деценијата - таа е веќе тука и незапирливо маршира. Тие што први ја прифатија ги оставаат зад себе колебливите. Новитетите како генеративните јазични модели го прошируваат полето за употреба. Прашањето сега е не е дали ВИ загрозува работни места, туку колку ефикасно може да се искористат нејзиниот потенцијал.

Економски експерти тешко може да направат историски паралели со потегот на Доналд Трамп за воведување тарифи на светот. Неговата стратегија на непредвидливост, која можеби има ефект на геополитичката сцена, може да се покаже деструктивна за економијата исто колку и тарифите зашто создава длабока неизвесност и ја изолира Америка на остров околу кој продолжува да тече трговијата.

Времето што децата го поминуваат играјќи на конзоли, компјутер или телефон не мора да е попусто потрошено. Ново истражување забележало зголемен коефициент на интелигенција кај децата што слободното време повеќе го трошеле на видео-игри. Поука за родителите: Не им дозволувајте на децата да зјапаат во телевизор или да киснат на социјалните мрежи.

Европската Унија најави дека ќе контрира на тарифите што ѝ ги наметна Доналд Трамп, но ќе го задржи здивот уште малку. Брисел купува време за да го калибрира внимателно одговорот – дали да ја активира „трговската базука“ насочена кон американските банки и технолошки гиганти, или да се реагира поблаго за да го омекне Трамп и да отвори простор за преговори.

Најголемата жртва на нападот на Трамп врз слободната трговија веројатно ќе биде самата Америка, на која нема да ѝ биде лесно да ги обнови врските со пријателите што сега ги турка подалеку од себе. Трамп ѝ отвора простор на Кина да ја засили домашната потрошувачка и да отвори простор за поранешните американските партнери, кои мораат да ја надоместат изгубената продажба.

Откако Трамп најави дека сака да ја преземе командата врз Форт Нокс и неговите трезори со злато, на  Германија ѝ текна дека потребна ѝ е директна контрола врз златното покритие за нејзините задолжувања. Конзервативци од Берлин побараа веднаш да се приберат златните резерви во Франкфурт, или барем да се избројат прачките една по една – околу 100.000.

Водечкиот европски институт за јадрено истражување ја завршил повеќегодишната физибилити студија на својот амбициозен проект Future Circular Collider (FCC). Сегашниот кружен судирач е долг 30 километри. Следниот треба да е трипати подолг а во него протони ќе се маваат со десет пати поголема енергија од сегашната.