Германија моментално ги има вторите по големина резерви на злато во светот. Повеќе од една третина од вкупно 3.352 тони злато (1.236 тони) се во трезорите на Федералните резерви на Њујорк. Чувањето злато во Њујорк ѝ гарантира на Бундесбанката брз пристап до вредност што може да ја промени во американски долари (или која било друга цврста валута), ако се укаже потреба за тоа.
На многумина конзервативци во Германија им е непријатно во Форт Нокс да се чуваат резерви во вредност од стотина милијарди евра во време кога претседателот Доналд Трамп постојано предупредува дека сака да ја засили контролата врз Федералните резерви.
Бундесбанката и федералната влада во оваа фаза треба веднаш да го вратат германското злато од САД. Ова е особено важно во време кога во Берлин и во Брисел се разговара за огромно задолжување. Потребен ни е брз пристап до сите резерви на злато во итен случај, изјави за „Билд“ Михаел Јегер од Европската асоцијација на даночни обврзници.
Европратеникот Маркус Фербер побара службеници на Бундесбанката да влезат во трезорот и да ги пребројат златните прачки една по една.
Бундесбанката не делува загрижено.
Во њујоршката ФЕД имаме доверлив партнер за складирање на нашите златни акции, изјави претседателот на Бундесбанката, Јоаким Нагел.
Банката во 2013 година го врати златото што го чуваше во Франција, по бучна кампања на десничарските популисти.
Вкупните златни резерви на Германија се 270.000 прачки од по 12,5 килограми во вредност од 280 милијарди евра. Повеќе од половината се чуваат во трезорите на Бундесбанката во Франкфурт. Покрај 1.236-те тони во САД, преостанатите 13% се чуваат во Банката на Англија.
Федералните резерви во Њујорк се најголемиот трезор на злато во светот. Таму се чуваат 6.330 тони злато од Централни банки на повеќе од 30 земји, вклучувајќи ја и Швајцарија.
