Видео-игрите ја зголемуваат интелигенцијата на децата

Времето што децата го поминуваат играјќи на конзоли, компјутер или телефон не мора да е попусто потрошено. Ново истражување забележало зголемен коефициент на интелигенција кај децата што слободното време повеќе го трошеле на видео-игри. Поука за родителите: Не им дозволувајте на децата да зјапаат во телевизор или да киснат на социјалните мрежи.

Спротивно на наративот дека видео-игрите ги затапуваат умовите на децата, ново истражување го поврзува подолгото играње со повисок коефициент на интелигенција.

Истражувањето исто така покажало дека гледањето телевизија или користењето на социјалните мрежи немаат ни позитивна ни негативна рефлексија на интелигенцијата.

Ова не е прва студија што сугерира врска помеѓу времето поминато на игри со развојот на когнитивните способности.

Дигиталните медиуми го дефинираат модерното детство, но неговите когнитивни ефекти се нејасни и предмет на жестока дебата. Веруваме дека студиите со генетски податоци би можеле да ги разјаснат вообичаените тврдења, пишува тимот од Холандија, Германија и Шведска.

Со студијата ABCD биле анализирани записи за времето поминато пред екран кај 9.855 деца од САД и на возраст од 9 или 10 години. Децата во просек 2,5 часа на ден гледале телевизија или видео-содржини на интернет, 1 час играле видео-игри и половина час се дружеле преку социјалните мрежи.

Две години подоцна, биле разгледани податоци за повеќе од 5.000 од тие деца. Кај оние што подолго од просечното време поминале со видео-игри било забележано зголемување на коефициентот на интелигенција за 2,5 поени повеќе од просекот.

Коефициентот бил утврден врз основа на постигнувања при читање со разбирање, визуелно-просторна обработка и задача фокусирана на меморија, флексибилно размислување и самоконтрола.

Во студијата не било испитано влијанието на платформата на играње (конзола, компјутер или телефон) ниту жанрот на игрите.

5 април 2025 - 11:52