Ханс-Екхард Зомер, шеф на германската федерална канцеларија за миграција, говорејќи како „приватен граѓанин“ пред Фондацијата Конрад Аденауер, повика да им се одземе правото да бараат азил на мигрантите што без документи доаѓаат на копнените граници.
Според сегашните правила, на мигрантите што ќе побараат азил Германија им обезбедува дом и социјална помош додека се разгледуваат нивните случаи. Процесот може да се развлече со години што не е во интерес ниту за мигрантите ниту за државата.
Сегашниот систем е неодговорен и за оние што бараат заштита и за нашето население. Загрозени се внатрешната безбедност и социјалната кохезија, порача Зомер.
Масовната имиграција е голем товар за домувањето, здравствените услуги, училиштата и социјалните служби . Нема доволно лица ангажирани за интеграција, како ни доволно курсеви за германски јазик.
Зомер вели дека сегашниот систем е екстремно неуспешен да ги заштити човековите права со тоа што ги стимулира бескрупулозните шверцери на луѓе и ја зголемува неизвесноста на мигрантите во собирните центри.
Правото на азил беше вклучено во Уставот на Западна Германија заради милионите луѓе што насилно беа раселени поради подемот на нацизмот и Втората светска војна. Но, сè поголем број умерени политичари велат дека тоа веќе не е соодветно на ситуацијата.
Пратеничката од ЦДУ, Серап Ѓулер, ќерка на турски гастарбајтери забележува дека имигранти од постарата генерација морале да работат напорно кога пристигнале во Германија, а сега „толку многу луѓе добиваат многу без да се бара ништо од нив“.
Ѓулер и Зомер повикуваат барателите на азил да бидат запрени на границата. Тоа не е лесно. Германија граничи со девет земји што одбиваат да примат мигранти. Засилени проверки сериозно ќе го нарушат протокот на стоки во еврозоната. Полицискиот синдикат предупредува дека за контрола на границите ќе бидат потребни најмалку 10.000 нови службеници.
Промена на правилата на азилот е возможна само со реформи низ ЕУ. Според новиот пакт за миграција и азил, кој треба да стапи на сила во 2026 година, барањата на мигрантите без документи на надворешните граници на Европа ќе бидат обработени во рок од неколку недели, благодарение на новите дигитализирани процедури. Одлуките за азил ќе бидат брзи, а одбиените апликанти ќе бидат депортирани. ЕУ објави и планови за зголемување на бројот на офицери во граничните сили Фронтекс.
Покрај војната во Украина и обновата на војската, задвижувањето на стагнантната економија и одговорот на трговската војна на Доналд Трамп, идната влада ќе мора да посвети енергија и на миграциска реформа.
На последните анкети, поддршката за ЦДУ веќе падна на 25%, што е помалку од 28,5% освоени на изборите во февруари. Антиимиграциската АфД со рејтинг од 24% го гази Мерц. Се чини, гласачите стануваат нетрпеливи, забележува Морис Франк, коосновач на магазинот Exberliner.
