Европската Унија проценува дека царините што ѝ ги наметна Доналд Трамп ќе погодат 70 отсто од извозот во САД и ќе направат штета од околу 380 милијарди евра.
Во првичната пресметка се земени предвид „реципрочните“ царини од 20%, што Трамп ги објави во средата, како и тарифата од 25% за автомобили, автомобилски делови и челик и алуминиум, објавени минатиот месец.
Претседателката на Европската комисија Урсула фон дер Лајен најави дека ЕУ е подготвена да возврати, за што доби поддршка од национални министри и истакнати членови на Европскиот парламент, но Брисел не објави никакви итни мерки, за разлика од февруари, кога веднаш ги објави контратарифите против царините на Трамп за челик и алуминиум минатиот месец.
Кога формулираме одговор на огромно и сложено геополитичко прашање, потребни се внимателна калибрација и прилагодување на стратегијата. Купуваме простор за да преговараме со Американците, рече портпаролот на Комисијата за трговија, Олоф Гил.
На одговорот можеби ќе се чека со недели.
Ако нивото на трговска размена остане непроменето, САД од новите царини ќе добијат 81 милијарда евра. Лани, за споредба, добиле 7 милијарди евра лани. Логичните економски ефекти од царините се дека трговијата ќе се намали.
Извори на „Политико“ во Брисел велат дека ЕУ ќе го подели процесот на возвраќање во две фази. Во средината на април ќе почнат веќе најавените контрамерки за царините на Трамп за челик и алуминиум. Владите на ЕУ ќе гласаат за пакетот следната недела и тој ќе стапи на сила во април и мај.
Подоцна ќе бидат објавени мерките против на тарифата за автомобили од 25 проценти и вкупната царина од 20 проценти. Во комбинација, двете фази имаат за цел да ги мотивираат САД да прифатат преговори.
За да ја подготви индустријата за ефектите од тарифите, претседателката на Комисијата в понеделник ќе одржи консултации за челик и автомобили, а следниот ден за фармацевтски производи. Комисијата веќе изработи акциони планови за да им помогне на тие сектори да се соочат со нивните предизвици.
