Градоначалникот на Солун кој пред неколку дена беше физички нападнат од банда националистички хулигани, на таквите кругови им боде очи по разни основи: Кемал Ататурк, Македонија, ЛГБТ, па дури и за кремирањето покојници. Зошто тогаш Солун на двапати го гласа? Главно, затоа што не краде.

Не само што повеќе луѓе од земјите членки сметаат дека ЕУ се движи во погрешна насока туку постои и сериозна недоверба дека со избори тој правец може да се поправи. Ваквата апатија, централата во Брисел ќе ја размрдува со вмровски финти - одвоиле 30 милиони евра за рекламни кампањи.

Покрај се што во моментов му се случува на Маск, сè што е измеѓу копање тунели под Лос Анџелес до патување во вселената, човекот одлучи дека е време да се вмеша во медиумите и да започне компанија што ќе работи на одвојување на „лошото новинарство“ од вистинското новинарство. Компанијата ќе му се вика - Правда (во оригинал: Pravda).

Иако за конкретни луѓе кои ги знаеме тоа ќе ни остане вечна дилема, на поопшто ниво стигнуваат некои објаснувања. Од една страна, можно е да имаме голем мозок за да можеме да решаваме комплицирани работи. Но другата можност е уште поинтригантна, дека баш затоа што имаме толкав мозок - комплицираме.

Еден од најголемите поборници во ЕУ за интернет приватност и заштита на податоците на корисниците во петокот поднесе 4 тужби, од кои три ќе завршат на адреса на Фејсбук, а една во Гугл.

Од оние безброј италијански владини комбинации, актуелната коалиција е една од најчудните. Составена е од партнери од спротивните краеви на политичкиот спектар кои, освен што не поднесуваат мигранти, ги обединува тоа што не ја фермаат ЕУ.

Се работи за полжави, кои, после научна интервенција, почнуваат да се сеќаваат на нешто што никогаш им се нема случено. Целата работа е во зародиш но нелагодно личи на епизода од Блек Мирор.

Во Европа (ЕУ) има растечка перцепција дека една конкретна категорија на општества или граѓани заслужува да биде етикетирана со презир или арогантно сожалување. Таа категорија е географски дефинирана: се наоѓа на исток. Во Брисел, Париз, Берлин и насекаде низ западниот дел од континентот, стана речиси нормално да се каже дека „Источњаците“ се оние што го расипаа ЕУ клубот. Дали е тоа фер?

Да беше конзервативен или теолошки мислител, Џордан Питерсон најверојатно немаше да дигне никаква галама. Но, бесот и омразата која тој ја предизвикува кај левичарите се должи на што игра токму на нивен терен, онаму каде што мислеа дека културолошкиот монопол им е загарантиран.

Очекувањата беа дека ЕУ парламентарците ќе го растргнат Закерберг и нема да остават камен на камен. Излезе дека тие што имаат вакви очекувања немаа предвид дека Закерберг го има избрано форматот и времетраењето на сослушувањето.

Лушпата од кафе која одгледувачите со генерации стандардно ја претвораат во природно ѓубриво ама почесто ја фрлаат во отпад, по сосема неочекувано откритие на една одгледувачка од Ел Салвадор се претвори во суво злато за фармерите.

Ќе беше убаво некој ова да им го каже на Грците во 1991 година ама и за денешни услови ова е невообичаен текст за Катимерини, текст кој експлицитно удира во сржта на проблемот: дека Грција не може да си признае дека на територијата на Македонија веќе имало создадена нација (која не била бугарска, за разлика од нивниот стандарден наратив), многу пред да тргнат да ја "ослободуваат" земјата на Александар.

Брачен пар од Њујорк поднесе тужба во која се бара иселување на непожелниот гостин што им живее дома - нивниот 30-годишен син.

За претстава колку на локалците им се смачени сите јабанџии што им шпартаат по град, замерката на противниците на планот на градоначалникот за ограничување на бројот на туристи што влегуваат во Венеција е дека тој не е доволно ригорозен.

Стратегијата со која се влезе во битката против он-лајн омразата колку што изгледаше едноставна толку за луѓето кои малку од малку имаат какви било познавања на темата изгледаше неизводлива. Tаа се сведува на два чекора: а пријавиш говор на омраза, Фејсбук (и кој било таа сфера) има фора од 24 часа да го избрише истото, а ако не го направи тоа, тогаш опција Б е казна од неколку милиони евра. Излезе ништо не е така едноставно.

За прв пат по повеќе од половина век шведската влада почна до сите 4,8 милиони домаќинства во земјата да испраќа памфлети со совети како населението може да се подготвува во случај на војна и како да придонесе кон одбрана на земјата.

Пред да ги минат изминатите 18 месеци трубејќи дека финансискиот конфликт на интереси на американскиот претседател не е нормален за една демократија, Демократите со години ги уверуваа истите луѓе дека е нормално политичари да имаат финансиски конфликт на интереси.

Со убиството на 10 лица во петочкиот масакр во средното училиште Санта Фе, годинава во САД имаат загинато повеќе ученици отколку активни припадници на американската војска распоредени во воени зони или дома.

Пред некое време вработени на Гугл исклучиво како вежба за размрдување мозочни вијуги, а никако како дел од некој сегашен или иден проект, замислуваат како компанијата би можела да го оформува човековото општество преку личните податоци што ги поседуваат за своите корисници, и по пат успеваат да достигнат сосема нови нивоа на ужас од технологија.

Одлуката на Зидојче цајтунг е по основа дека во карикатурата на израелскиот премиер се користени „анти-семитски клишеа“. На ваквата одлука реагираше Турција, потсетувајќи дека кога тие им префрлиле на Германците за карикатура на Ердоган од истиот автор, тој бил бранет по основа на слобода на говор.

Речиси 10% од глобалните приходи од реклами на Фејсбук доаѓаат од Кина, и годинава во пари тоа ќе изнесува околу 5 милијарди долари, ако не и повеќе. За овие пари Кина е вториот по големина извор на приходи од реклами за Фејсбук по САД.

Ова нешто е (наводно) 9-годишно девојче по име Лил Теј, и ако до сега не сте чуле за неа извините што ви ги нарушуваме мирот.

„Без разлика колку лоша била работата пред да падне режимот, ситуацијата најверојатно ќе стане полоша откако стариот поредок ќе колабира. Оние што го смениле режимот веруваат дека ќе бидат славени како ослободители но многу поверојатен исход е населението брзо да ги изгуби некогашните илузии и да стане непријателско и насилно“, заклучува анализа во американскиот магазин со 40 годишна историја, Форин полиси.

Пораката од Русинка за која се тврди дека има 128 години и е најстариот човек на светот е: еден единствен ден не сум била среќна во животот.