Не сите се во трка по вакцина за коронавирус. Некои веруваат дека можат да дојдат до ефикасен спреј за нос кој би ја сосекувал заразата уште на старт. Првите резултати им се охрабрувачки.

„Америка, ме обвинувате за мешање во вашата демократија, но јас не морам да го правам тоа, вие го правите тоа за мене,“ е текстот што е одбран за Путин во предупредувачкото дипфејк видео чија порака е дека странските сили немаат потреба да се мешаат во изборите на земјата, бидејќи самите Американци ќе ја уништат сопствената демократија.

Немање армија и 27 ветоа го отежнува носењето одлуки, а не па да го спроведеш тоа што си го донел.

Градоначалник во Романија победи на изборите три недели откако почина од ковид-19. Немало време да го тргнат неговото име од изборните ливчиња а ете, народ го сака, жив или мртов. Замислете со колку ниска самодоверба ќе стартува неговиот (жив) наследник.

Испостувањето, не верско, туку она за дебели, кое периодов се шири бетер од пандемија благодарејќи на неодоливите ветувања (јадеш што и колку сакаш, ама само хх часови во денот), излезе дека и не им врши многу работа баш на дебелите.

Не само што платил помалку данок од најголемиот дел богаташи во САД, туку платил помалку и од добар дел сиромашни Американци, пишува Њујорк тајмс во текстот во кој за прв пат во историјата се објавуваат даночните пријави на Доналд Трамп.

Договорот не е „историски напредок“ туку само уште еден нож во грбот на палестинскиот народ, се оценува во текстот на Ал Џезира.

Што ќе се случи во еден град ако на коронавирусот му се дозволи да прави што сака? Тоа му се случи на Манаус, главниот град на Амазонија, и сега тоа се разгледува како случај кој дава увид во тоа како би изгледало најлошото сценарио.

Една од најголемите предности што Шведска ја имаше кога влезе во својата битка со ковид-19 е што земјата е полна со Швеѓани, па стратегијата многу повеќе им се базираше на доброволна согласност отколку на присила.

Невообичаено учтиво и не шокантно наспроти се што се случува денес, Велшаните повикаа на „прелиминарен референдум“ на кој ќе се разгледаат опциите за независност од Британија.

Најголемата американска генетска студија на коронавирусот изведена во Хјустон покажува дека во вториот бран доминира мутација со многу потенцијално битни но една сигурно битна особина: дека тој сега полесно се шири. Тоа значи дека вирусот се снаоѓа со бариерите од типот носење маски и миење раце.

Откако Јужна Кореја објави дека нивен функционер исчезнал и дека бил убиен од Северна Кореја а неговото тело запалено, господарот на Северот, Ким Џонг Ун, наспроти сите очекувања му се извинил на Сеул за инцидентот.

"При вработувањата кај нас, ќе ги признаваме овие сертификати како еквивалент на 4 годишно студирање," порачаа од Гугл а други компании сигурно ќе следат. Би прашале ние „Спиеш ли мирно, УКИМ,“ ама знаеме дека спие. Мирно.

Виетнамската полиција заплени над 320.000 користени кондоми од луѓе кои во животот за егзистенција мораат да препродаваат користени кондоми.

Во време кога златото достигна историски рекордни цени (минатиот месец беше над 2.000 долари за унца) на луѓе почна да им текнува дека златото, на страна сите карактеристики што ги има, исто така е и ограничен ресурс кој еден ден ќе се потроши.

Намерата на Икеа е да го намали количеството на отпад што го создава (а во меѓувреме и да заработи нешто), и за почеток тоа би требало да биде преку поправање и препродажба на свои стари производи.

Ишгл се поврзува со ширење на ковид-19 низ 45 држави во Европа откако зимоска илјадници луѓе се заразија додека беа во австрискиот зимски центар.

Сергеј Тороп а.к.а. Висарион а.к.а. рускиот Исус е уапсен во акција на руските специјалци во една недојдија во Сибир.

Сатиричниот весник реши одново да ги објави карикатурите кои доведоа до вооружен масакар на неговата редакција. Истите овие што тогаш масакрираа најавија дека и тие ќе го репризираат својот дел. Сега над 100 француски медиуми потпишаа отворено писмо за поддршка на Ебдо.

Близу илјада образовни кампуси во Лос Анџелес ќе останат без полициска заштита како резултат на кратењето на буџетите за обезбедување. Ама затоа, кога Алиса Милано, актерка и гласна активистка за дефинансирање на полицијата ќе пријави пукање (нормално, на полиција), во маало ќе се нацртаат куп полициски коли, чета службени кужиња, пожарна и хеликоптер.

Откако европски регулатори нагазија на нивниот слободен трансфер на податоци меѓу серверите во ЕУ и САД, Фејсбук соопшти дека ќе биде невозможно да работи под тие услови и се закани дека е можно да ги исклучи сервисите на ФБ и Инстаграм за околу 400 милиони корисници во Европската Унија.

Кој може да работи од дома, пабовите да затвораат во 10 часот, забрана за сите тимски спортови на затворено и дополнителни ограничувања на свадбите, се дел од новите мерки за борба против ковид-19 кои ги објави Борис Џонсон „во време кога Британија е пред опасна точка на пресврт“.

На почетокот од пандемијата еден од столбовите на глобалниот хаос беше немањето доволно тестови, па само најтешките случаи беа тестирани за ковид-19. Минатата недела само Британија спроведе околу 1,3 милиони тестови, што е 20 пати повеќе отколку од почетокот на април.

Уште за изборите 2016 една од сериозните паники на Демократите беше дека следниот претседател ќе треба да пополни едно испразнето место на американскиот Врховен суд, а и судијката Рут Бадер Гинсбург дека не е добра со здравјето. Трамп го пополни празното место, во меѓувреме именуваше уште еден врховен судија и сега брза да го фати и местото што се ослободи по неодамнешната смрт на Гинсбург.