Гардијан ги пренесува песимистичките оценки и проценки на вториот човек на украинското воено разузнавање. Артилериските битки на фронтовите ќе ја одредат судбината на териториите зафатени со судири а таму ситуацијата е 1 спрема 15 во корист на Русија.

Ние сакаме да го финансираме мирот а не војната, порача унгарскиот премиер за одлуката да не праќа оружје за Украина. Но вели дека моќни бизнис центри имаат поинаков интерес: војната да продолжи бидејќи тие од неа профитираат. Не е тешко да се погоди на кого мисли Виктор Орбан.

Половина од Германците и сите држави сојузници веруваат дека германскиот канцелар може да направи многу повеќе за да и помогне на Украина. Прашањето на Шпигел е „тогаш зошто не прави?“

Во еден редок пример на добри вести во изминативе месеци беше прифатен турскиот план и понуда да го придружува бродскиот транспорт на украинско жито до остатокот од светот. Затоа што нема зошто да се очекува среќа периодов, излезе дека ќе требаат најмалку 6 месеци да се расчистат сите морски мини поставени во Црното море.

Епл се буни за воведување стандардизиран полнач за различни уреди бидејќи таа ставка им носи вагон пари, но ЕУ се чини дека е решена да воведе таква регулатива која би опфатила 15 видови уреди. Денес секој човек во Европа во просек има по три кабли и електронскиот отпад станува сериозен проблем.  

Европски компании за бродски транспорт се предводници во „подбивање“ со европските санкции против Русија, успевајќи да ги дуплираат своите пратки со руска нафта од почетокот на инвазијата на Украина.

„Секоја девојка е ’би’. Само треба да откриеш дали тоа е ’поларна’ или ’сексуална’“ е твитот што беше доволно неподнослив за Вашингтон пост, за новинарот Дејвид Вајгел, со 8-годишен стаж во весникот, да биде суспендиран заради него.

Во развод кој ја добил етикетата „Маги разводот“ Индиец се разделува од својата сопруга затоа што за појадок, ручек, вечера, секој божји ден, му готвела инстант нудли. (Ете зошто Маги).

Прајдот е станат помпезен, гротескен и нетолерантен, пишува еден англиски сценарист кој е геј но не би да драматизира околу тоа. Знамето кое нон стоп се апдејтира, кратенката која постојано добива нови букви, изливи на солидарност од сите страни, сето тоа прави јуни да стане еден од потешките месеци за поднесување, пишува тој. 

Со секоја додадена ветерница или соларен панел Кина „фрла“ се повеќе и повеќе зелена енергија бидејќи нејзината електрична мрежа нема капацитет да ја искористи истата.

Детално проучувајќи биографии на 180 лица кои извршиле масовни пукања и убиства уште од 1966 година, истражувачи дошле до фрапантни сличности меѓу тие луѓе, сознание за кое сметаат дека може да помогне да се заузда овој автохтон американски проблем. Само кога политичарите би слушале.

Бројот на американски деца кои се предозирале со мелатонин, хормонот кој помага во заспивање, отишол во небеса последнава деценија. Преку 500% раст имаат вакви случаи во изминатиот период. Нас како нација ова не нè засега. Ние сме на дијазепам.

Пред изборите за Конгрес во ноември, кај републиканските кандидати и понатаму најпосакуваниот политички благослов е од Доналд Трамп. Финансискиот е од Питер Тил, еден од основачите на Пејпал и сопственик на Палантир, меѓу другото.

Ако Западот не најде начин да ја залечи економската болка низ која минува, единството околу санкциите полека ќе го снема.

Службените авиони на корпорациите нема да бидат предмет на оданочување според предложените  мерки за зелена такса на авионското гориво. Предлагач е владата на ЕУ, Европската комисија. Што би се рекло на народен јазик: врана на врана очи не копа.

Војните во странство обично се најпопуларни на почетокот, посебно ако на американската јавност и се рекламирани во морално апсолутни термини, меѓутоа освен ако не се завршат релативно брзо со одлучна победа, јавната поддршка и политички консензус почнуваат да се распаѓаат. И изгледа дека токму ова се случува со војната во Украина.

Грчки бродски компании прават огромни профити маскирајќи го транспортот на руска нафта. Или префрлаат товар од брод на брод или одат директно до руските пристаништа и сето тоа не се смета за кршење на западните санкции.

Комбинација од „елити“, „реформатори“, „гневни претприемачи“ плус премиерот Ли Кечијанг е наводниот состав на опозицијата со која се соочува кинескиот претседател и која му ја крои пензијата по гласањето за нов мандат закажано за есенва.

Рос Вијтман е 40-годишен поранешен пилот на кого канадската влада му признава дека останал инвалид по примањето на АстраЗенека вакцината против ковид-19.

Кога мислиме на загадување од автомобили, обично мислиме на она што излегува од нивните ауспуси. Гледаме на погрешно место, особено во последно време. Ауспусите на новите коли се толку чисти, што, да се почнува сега, тоа не би се ни регулирало. Ама затоа гумите прават партал. Пар-тал!

Новиот шеф на CNN пишал допис до вработените во куќата да намалат со бомбастичната најава за „Брејкинг њус“ која со години инфлаторно ја користат и веќе има изгубено секаква смисла. Инаку, по падот на нивниот архи-непријател Доналд Трамп, рејтинзите на CNN се жив резил.

Кинеска корпорација за која се тврди дека е директно поврзана со Комунистичката партија на Кина и тамошниот воен комплекс изрази намера да го купи фамозниот Форбс. Американски сенатори на ова го гледаат како на закана за американската национална безбедност.  

Авторот на Хил ја почнува својата колумна со цитат од Шерлок Холмс кој во една ситуација порачува „Кога ќе го елиминираш невозможното, тоа што ќе остане, без разлика колку неверојатно, мора да е вистината.“

Неколку доктори за Њујорк тајмс потврдуваат дека трансродовата пливачка Лиа Томас има нефер предност пред остатокот од женските пливачки, без разлика дали била на терапија за потиснување на тестостерон или не.