До пред една година, да се кажеше дека коронавирусот можеби има лабораториско потекло и дека можеби човек сепак нешто има рчкано околу тоа, по автоматизам значеше дека ќе бидете нашлакан како љубител на завери. Колку тогаш беа бучни фамозните факт-чекери, толку беа нечујни кога се смени наративот.

Џеф Закер повеќе не е претседател на Си-ен-ен откако со години пред колегите (а многу веројатно и пред сопругата) криел љубовна врска со директорка во телевизијата.

Портпаролот на кинеското министерство за надворешни работи не ја престанува својата кампања на тролање на американските власти и општо западот, главно со мемиња и клипови што наликуваат како да се симнати од екс-Ју Вибер и Фејсбук групи.

Вакцините на Фајзер за бебиња и деца на возраст од 6 месеци до 5 години ќе бидат готови далеку побрзо од очекуваното до крајот на февруари, по што компанијата во рок од неколку седмици треба да добие одобрување за две дози од вакцината за оваа група на деца.

Бадијала е да се ситиме дека мечката заигра на нивна врата, но охридскиот рамковен договор жестоко го има зајавано Холивуд. Слушнете ја оваа инсајдерска приказна за тоа како разбуденоста ја убива филмската индустрија, за стравот, квотите и другите аспекти на Рамковен Холивуд, приказна во која многумина се плашат и да си го кажат името.

Владините мерки кои опфаќаа масовно затворање на цели народи и држави по дома имале многу мало или никакво влијание врз намалување на смртноста од ковид-19 ама затоа па направиле пустош во економијата и општествениот живот, заклучува мета-студија на Џонс Хопкинс Универзитетот.

За разлика од сите сомнежи околу 5Г, народ воопшто не треба да има сомнеж за 6Г бидејќи Кина го развива главно и (за сега) само за потребите на нивната војска и хиперсоничните оружја.

Иако вакцинацијата останува најдобра одбрана против ковид-19, јас верувам дека повеќе не е пропорционално да се бара задолжителна вакцинација за лицата ангажирани во здравствениот систем, порача британскиот министер за здравство, Саџид Џавид.

Цела њујоршка полиција излезе и наредена рамо до рамо како фаланга по тамошните авении се поздрави со Џејсон Ривера, еден од двајцата полицајци кои беа убиени дур решаваа пријава за семејно насилство во Харлем.

Климатските активисти заслужуваат респект зашто со децении ја зголемуваа свеста за проблемите. Но денес тие се поголема пречка за решавање на проблемите отколку оние што не веруваат во постоење климатски промени. Првенствено затоа што по инерција се противат на онаа чиста енергија која реално може да ја смени сликата на планетава.

Откако по тројца сменети гувернери на народната банка од јули 2019 лирата продолжи да пропаѓа, турскиот претседател се реши на нова стратегија и го смени човекот одговорен за бројките кои покажуваат дека лирата девалвира.

Прво Нил Јанг му даде ултиматум на Спотифај дека ќе ја повлече својата музика ако не го тргнат подкастот на Џо Роган. Потоа, Спотифај одлучи да го задржи подкастот, па Јанг ја повлече музиката. За сега ова се заокружува со „акција“ од Амазон мјузик за 4 месеци гратис претплата за сите фанови на Нил Јанг.

Подкастот на Џо Роган на Спотифај минатава недела беше под звучни критики дека содржел „опасни дезинформации“ за ковид. „Многу работи кои пред некое време ги сметавме за дезинформации, денес се факти. Пред 8 месеци да кажевте дека и вакциниран можете да се закачите и да ширите ковид, ќе бевте отстранети од социјалните медиуми“, поентира Роган.

Старите песни во моментов претставуваат 70 отсто од музичкиот пазар во САД. Оние кои живеат од нова музика - особено загрозениот вид познат како музичар - нема многу леб да се најадат. Сиот пораст во музичкиот свет денес доаѓа од старата музика а најголемите инвестиции се во купување каталози на автори кои се или починати или имаат 70-80 години.

Проблемот што не може да навјаса да произведе доволно чипови Интел ќе го решава со отворање на нова фабрика за чипови, која по дифолт требаше да биде во Кина, барем додека во плановите не натежна Белата куќа и трговската војна што продолжува да ја води со Кина.

Сижето од телефонскиот разговор е: Бајден не може да го убеди украинскиот претседател дека Русија во секој момент ќе нападне, Зеленски не може да го убеди американскиот претседател дека работите не се толку црни како што тоа нему му изгледа.

Канадските камионџии го минаа Онтарио и продолжија кон Отава, решени да ја блокираат Владата додека не им бидат вратени слободите, односно не се укине задолжителноста на вакцините за сите кои ја минуваат границата. Многу ги има.

На Британија и на ЕУ не може целосно да им се верува во судирот со Русија бидејќи и двете страни се „толку многу компромитирани со руски пари“, е предупредувањето од американскиот ЦАП.

Пандемиските мерки што беа воведени за намалување на страдањата на германскиот народ, ја чинат германската економија околу 350 милијарди евра, проценува Германскиот Економски Институт (IW) од Келн.

Последниве 7 години, САД ја имаат накрцкано Украина со оружје и воена опрема од преку 2,4 милијарди долари а западниот извоз на оружје во оваа земја деновиве работи со полна пареа. Само уште треба некој да гине. А кога не си тоа ти, тогаш е лесна работа.

Британец заработува по 160 фунти на ден (20 фунти од час) трошејќи го своето време по најразлични редови во Лондон каде чува место за богати клиенти.

Шекил О' Нил важи за еден од најголемите хедонисти кои ги видела американската кошарка (Коби има кажано, да тренираше Шекил колку мене, ќе беше најдобар на сите времиња). Но, и над попот има поп. Грамадата вели дека никогаш нема да ја заборави сцената во која го запознал Принц.

Првата година на Бајден на власт заврши како и што почна, со САД со сериозни кризи на повеќе фронтови. Пролетта 2021, проблемите на САД беа руски сили на границата со Украина, и кинески во близина на Тајван. На почетокот од 2022, Русија има уште повеќе сили на границата, Кина продолжува да маневрира околу Тајван, а во игра се врати и Иран.

Над 5.000 возила беа заглавени на минусни температури на обиколницата околу Атина откако снежна бура го затрупа главниот град на Грција.