Фајзер на суд ќе се брани од колективната тужба на повеќе од 1.000 жени што тврдат дека развиле тумор на мозокот по користење на хормонско средство за контрацепција. Фармацевтскиот гигант не ги предупредил потенцијалните корисници и лекарите за ризикот од развој на интракранијален менингиом ако инјекцијата Депо-Провера се користи повеќе од една година.

За само пет години Европа изгубила зелени и обработливи површина колку Кипар. Во сива зона од патишта, згради, фабрики и туристички центри биле претворени 9.000 квадратни километри што биле дом на животни и го собирале јаглеродот од воздухот. ЕУ со години ветуваше дека ќе ја штити природата, но буквално ја цементираме сопствената иднина, коментира европратеничка од Зелените.

Американскиот претседател последниве месеци заработи фина сума на пари додека неговите правни тимови ги гонеа оние коишто го исфрлија од своите платформи после немирите во Капитол од 6 јануари 2021 година. 25 милиони долари од Мета, 10 милиони долари од Икс, сега 25 милиони долари од Јутјуб. Лојалноста е платена и запечатена, сега може пак да се „пријатели“.

Европските лидери го убедуваат унгарскиот премиер Виктор Орбан да не го блокира интеграцскиот процес на Украина и Молдавија, но не сакаат да се укине правото на вето и проширувањето на ЕУ да се решава со надгласување. Без вето, Бугарија нема да може да го блокира приемот на Македонија, Грција приемот на Турција, Хрватска на Србија, а Франција на сите заедно.

Американски научници го потврдиле контроверзниот концепт дека е возможно да се создаде човечки ембрион без биолошка мајка, со генетски материјал од двајца мажи. Наместо јајце-клетка успешно оплодиле генетски манипулирана и осакатена клетка од кожа. Сите рани ембриони создадени во експериментите имале хромозомски абнормалности и не можеле да се развијат во бебе.

Американскиот министер за одбрана (по ново „за војна“), свика околу 800 генерали и адмирали лично да се нацртаат во базата Квантико во Вирџинија за да слушнат што има да им каже. Многумина се пожалија дека бадијала доаѓале бидејќи настанот им личел на партиски спектакл а поентите можеле да ги добијат и преку меил. Една од главните поенти била дека војската им е  дебела. 

Американските пациенти ќе можат да купат лекови од Фајзер со огромен попуст и до 85%, но само ако ги нарачаат директно преку веб-сајтот на Белата куќа наречен според претседателот – TrumpRx. Лековите што се издаваат на рецепт преку програмата Медикејд ќе бидат продавани по најниската цена што ја има во другите земји. За возврат, Фајзер три години ќе биде ослободен од царини.

Длабоките партиски поделби ја затворија федералната влада на САД. Вработените на неопределено нема да добиваат плата. На работа ќе останат само луѓето на виталните позиции. Блокадата значи привремено отпуштање на околу 750.000 службеници. Многумина нема воопшто да се вратат на работа. Трамп се закани дека ќе ја искористи паузата за масовна чистка во владините служби.

Членките на Европската Унија (со исклучок на Данска) издаваат лични карти со години. Ако самиот обем на нелегална имиграција е некаков показател, личните карти не направиле ништо за да ги направат границите на Европа побезбедни или да го спречат работењето на црно. Па зошто воведувањето на дигитална лична карта би било поефикасно во Британија?

Научници во Кина развија хируршки лепак кој овозможува речиси инстантно лекување на фрактури кои со традиционалните третмани заздравуваат со месеци. Откако ќе ја изврши функцијата лепакот се разградува во телото. Се избегнуваат сложени операции на вградување метални шипки, кои може да бидат отфрлени од телото или треба да бидат отстранети со нова операција.

Џаред Кушнер како дете пораснал со компјутерските игрици на гејмерското студио Електроник Артс. Зетот на Трамп сега е „пресреќен“ што за рекордна сума од 55 милијарди долари може да го купи производителот на ФИФА, Симс и Бетлфилд. Здружен е со саудискиот престолонаследник, кој си игра со инвестирање на кајмакот од нафтата во индустрии што ќе му носат уште повеќе пари.

Мировниот план што го предложија Трамп и Нетанјаху би бил смешен ако не беше толку опасен за светскиот мир, предупредува Јанис Варуфакис. Ако планот Трамп-Нетанјаху се спроведе, тој официјално ќе го врати човештвото на Законот на белиот колонизатор кој избира која земја да ја окупира, кои освоени народи ќе ги распореди како свои пиони и кои ќе ги истреби.

Лабуристите ќе воведат низа нови услови што мигрантите ќе треба да ги исполнат за да се квалификуваат за право на престој на неопределено време во Британија. Ќе мора да научат англиски јазик на високо ниво, да плаќаат национално осигурување, да имаат чисто криминално досие и да придонесуваат за своите заедници. Во спротивно нема да им биде продолжена визата за престој.

Трамп упорно се фали дека откако се врати во Белата куќа успеал да запре седум војни низ светот. Во јули се пофали дека просечно завршува по една војна секој месец. До август беа шест, а во говорот пред ОН станаа седум. Реалноста потврдува дека две војни измислил, во една учествувал, а во другите имал епизодна улога, што не им пречи на смирените земји да го предложат за Нобелова награда.

Британската лабуристичка влада е под лупа по извештаите дека поранешниот премиер Тони Блер тајно лобирал проектот за „печатење“ на дигиталните лични карти да заврши кај неговиот личен пријател и финансиер Лари Елисон, вториот најбогат човек на планетата. Оракл на Елисон може да додаде уште некоја стотка на 700-те милиони фунти што досега ги добил од зделки со британската влада.

За само десет години, хрватските домаќинства го удвоиле своето финансиско богатство, а најголемиот раст се случил минатата година. Структурата на заштедите на граѓаните исто така се има променето - хрватските граѓани сè повеќе инвестираат во хартии од вредност, а сè помалку пари чуваат на банкарски сметки.

Проектот со кој Обама сакаше да ги промовира САД во глобален лидер во битката против фосилните горива, сега стана пример на расипничко трошење на пари од даночни обврзници. Сончевата централа Ајванпах, не само што не ја направи Калифорнија независна од фосилни горива, не можела да ги задоволи ни сопствените енергетски потреби, па трошела гас за да остане во погон.

Проевропската партија ПАС победи на парламентарните избори во Молдавија, кои беа оценети како клучен тест дали поранешната советска република со 2,4 милиони жители ќе продолжи се движи кон Брисел или кон Москва. Русија беше обвинета дека се меша во изборите, но и другата страна објави многу аргументи што ја оспоруваат легитимноста на изборите.

Израелскиот премиер Бенјамин Нетанјаху прв пат ја прифаќа идејата за амнестија на терористите од Хамас, ако ги ослободат израелските заложници и заминат од Газа. Досега инсистираше на целосно уништување на Хамас и ликвидирање на лидерите. Новиот американски план предвидува и воспоставување палестинска држава. Но, за да има мир планот треба да биде прифатен и од Хамас.

Неодамнешната одлука на Виетнам да избрише над 86 милиони банкарски сметки ја зголеми загриженоста од централизирана контрола на личните финансии. Виетнам не е изолиран случај на масовно блокирање депозити. Ова го зголемува интересот за децентрализирани алтернативи како што е биткоинот, кој функционира изолиран од владини или институционален надзор.

Кибернетска банда упаднала во синџирот градинки Кидо и украла најчувствителни податоци за повеќе од 8.000 деца во Британија, САД и во Индија - имиња, фотографии и адреси. Криминалците велат дека имаат и информации за родителите и старателите на децата. Ги користат за да ги уценуваат родителите да платат откуп. Полиција ги советува родителите никако да не плаќаат.

По низата неразјаснети нарушувања на воздушниот простор и сомнителните и се уште неидентификувани летала над аеродромите, ЕУ се согласи да ги забрза и да ги засили плановите за изградба на „ѕид“ против дронови. Во оваа нова линија на одбрана може да останат дупки, исто како во Мажино, која хитлеровите сили пред речиси еден век едноставно ја заобиколија.

Истражување утврдило сериозна поврзаност на користење вештачки засладувачи со пад на конгинитивните функции како што е размислувањето и меморијата. На умерените потрошувачи стапката на опаѓањето била за 35% а на сериозните косументи дури за 65% повисока. Мозокот предвреме им остарел 1,6 години.  

Медиумите и експертите за јавно здравје, сè до СЗО, го отфрлаат заклучокот на претседателот Трамп и министерот за здравство Роберт Ф. Кенеди Џуниор, дека лекот тиленол земан во текот на бременоста е поврзан со зголемување на случаите на аутизам. Не и производителот на лекот, кој со години знаел за ризиците и наместо да ја предупреди јавноста барал начин да ја избегне одговорноста.