Фактчерите го побиваа раширениот страв дека ковид вакцините, со оглед на тоа што не се класични вакцини туку мРНК, можат нешто да поматат во човековиот ДНК и клетките. Неодамна биле правени истражувања дали тоа може да се случи не на здрави, туку на клетки на рак. Може.  

Онколози се од оние лекари кои сешто виделе во својата пракса но за многумина од нив, ништо не ги снеможува така како кога ќе видат млад човек на кого ќе му најдат еден од оние ракови кои обично фаќаат луѓе постари од 65 години. Ќе се помисли на дебелина, алкохол, процесирана храна... но не, рак често фаќаат здрави и тотално фит луѓе, без никакви ризични фактори за канцер.

Кога Нил Јанг во знак на протест ја повлече својата музика од Спотифај несакајќи да дели иста платформа со Џо Роган, подкастерот беше ексклузивец под договор од 100 милиони долари. Сега е под договор од 250 милиони, без ексклузивитет. Така можело. Признавајќи дека ја изгубил битката против она што тој го смета за дезинформации, Нил Јанг вели дека следната надеж му е Спотифај бар да го подобри звукот.   

Дон Лемон беше избркан од Сиенен. Едно време го немаше па деновиве неочекувано најави ново шоу кое ексклузивно ќе оди на платформата Икс. Обезбеди и интервју со Маск, како најава на новото партнерство. Што направи Лемон после тоа? Отиде во Сиенен, да го олајава Маск како не си ја разбирал одговорноста. Дур си исцедил лимон, Маск му го раскина договорот.

Дневното туширање со жешка вода, што некои го имаат доведено до прлење, ја оштетува и кожата и косата, како што би оштетувало што било друго изложено на топла вода.

Паниката дека планетата е пренаселена и дека веќе нема место за луѓе, последниве години полека се заменува со страв дека нè чека колапс на популацијата, без разлика колку Индија и Африка работеле на нејзино спасување. Кина веќе не може ни сама да си помогне, не на другите.

Ненаситноста на Французите за жабји батаци е деструктивна за природата и ги загрозува водоземците во Азија и југоисточна Европа, алармираа група на научници и ветеринари.

За неколку дена, Бил Бур тргнува со нова турнеја и стартува во Цезар Арената во Детроит (20.000 седишта). Повторно ќе го прави она што најдобро го знае: да истражува зошто е толкав кретен. Изборите ќе ги игнорира. „Не сакам да прифатам дека оние двајца стари идиоти се најдоброто нешто што го имаме“, вели комичарот чиј филм „Стари татковци“, две недели беше најгледан на Нетфликс. 

Милиони луѓе страдаат со месеци, ако не и години откако се заразиле со ковид. Таканаречениот продолжен ковид е сериозен но слабо сфатен и проучен проблем. Но, постои загриженост дека и вакцините можат да предизвикаат слична состојба. Од 1.000 пациенти, 70% го добиле проблемот после вакцинација, а не после зараза. Лекари стравуваат дека ваквите наоди повторно ќе бидат цензурирани, како во времето на пандемијата. 

Повеќе од 1 милијарда деца, адолесценти и возрасни низ светот се дебели, односно имаат БМИ од над 30 (до 30 си само прекумерно тежок) преброиле секогаш педантните Лансет. За да не биде дебел маж со 186 сантиметри треба да тежи максимум 103 килограми, а е „нормален“ со максимум 86 кг.

На состанок во лондонското биро на CNN имало незгоден состанок на кој се конфронтиралле две страни: оние што работат на вестите и оние кои ја менаџираат компанијата. Во име на првите се карала влијателната/контроверзната/озлогласената Кристијана Аманпур.  Кавгата била за тоа како се покрива војната во Газа и колку тоа  ги доведува во опасност нивните арапски новинари.

Основно училиште од Бленфорд, Англија, планира од септември за учениците да нуди од оние базичните мобилни телефони, бидејќи со смартфони и сите опции кои со нив ги имаат, децава не можат да се спастрат и да се фокусираат на школото, часовите и лекциите. Родителите се за, за нивните деца не сме сигурни. 

Папата Франциск зборувајќи пред учесниците на симпозиумот „Маж - Жена: Слика на Бога“, ја опишува родовата идеологија како „најгрдата опасност“ на нашето време, бидејќи ги брише сите различности меѓу мажите и жените, кои го прават човештвото уникатно.

Новите насоки од американскиот Центар за контрола на болести се дека четири години по почетокот на најголемата глобална пандемија на нашето време, ковидот веќе може да се третира на ист начин и мерки како и сезонскиот грип,

Јужнокорејски компании решени да го запрат драматичниот пад на новороденчиња во земјата почнаа да даваат бонуси од 75.000 долари на семејствата кои имаат деца.

Нова студија објавена во журналот Нејчр метаболизам покажала дека консумирање на преголема количина на протеин е штетна за артериите, бидејќи предизвикува таложење на масти, холестерол и други состојки на ѕидовите на артериите а со тоа го стеснува и го намалува протокот на крв.

Научници успешно одгледале „тестиси во тегла“ кои еден ден би можеле да помогнат во решавањето на машката неплодност, која погодува секој 12-ти маж ширум светот. Башка, тие вештачки тестиси би биле драгоцени за луѓе што се занимаваат со македонската политика или пак им се дадени институции на раководење. Ах, како јако ќе изгледа официјалното пречекување на вештачките тестиси на некој наш граничен премин.

Компанијата запре со објавување нови содржини на својата главна вебстрана и во исто време најави дека планира да избрка стотици вработени откако сопственикот не успеа да ја продаде Вајс медиа како пакет.

Истражувачи во Стенфорд покажале дека машкиот и женскиот мозок сепак функционираат различно, што е сериозен нокдаун за оние кругови кои сакаа да ја потценат биолошката основа на човечкиот идентитет и да го сведат на социјален конструкт. Се разбира, и натаму секој може да се чувствува како сака, само што науката ќе може да утврди дали мозокот му е машки или женски. Ако му го најде.

Намерата на законодавците од Тенеси е да го намалат бројот на сообраќајки и жртви под дејство на алкохол, со тоа што целосно ќе забранат ладење на пиво. Сè друго останува исто, па кој сака нека се прави камен од топло пиво.

Откако еден американски конгресмен крева галама со својот предлог закон во кој братучед/братучетка се брише од списокот на инцестоидни семејни односи (што потоа по итна постапка беше коригирано), Економист тргна со објаснување како тоа не е забрането со закон во најголемиот дел од САД и Европа, освен што се смета за одвратно.

Научна анализа на записите од повеќе од 50.000 пациенти пресметала како нивната болест ќе напредувала доколку не беше пандемијата и сиот хаос во неа. Заклучиле дека одложувањата на дијагностицирањето на ракот на кожата поради пандемијата и состојбата на здравствените капацитети довела до 100.000 изгубени животи во Европа.

Ерик Ајдл неочекувано запука по Џон Клиз велејќи дека тој отсекогаш бил некој што ги малтретира оние со кои работи. Клиз потврди дека не сега, туку отсекогаш се презирале. Ајдл е разочаран што на стари години мора да работи и за тоа ја обвини ќерката на Тери Гилијам. Палин е со Клиз а останатите двајца Пајтоновца имаат среќа да не учествуваат во оваа неславна геријатриска епизода на славната трупа.

Волците кои хараат во зоната на радијација на Чернобил низ годините успеале да развијат мутација што ги прави отпорни на рак, откриваат научници од Принстон.