Во пустината Кубуки во кинеската провинција Внатрешна Монголија почнува изградбата на две комбинирани енергетски централи од нов тип. Ќе произведуваат струја и од обновливи извори и од горење јаглен, во зависност од условите и потребите.
Вкупната инвестиција за двете централи е 127 милијарди јуани (18,4 милијарди долари). Планирано е во иднина да се изградат и уште повеќе.
Логично за регион што изобилува со сончеви часови и со ветер, приоритет ќе имаат ветерниците и соларните плочи. Јагленот ќе се користи како резервен извор, за пополнување на празнините во производството на струја и за стабилизирање на енергетската мрежа.
Внатрешна Монголија моментално придонесува со 57% од кинеското производство на струја од ветер и дава 21% од вкупниот потенцијал за сончева енергија. Користењето на фосилното гориво ќе биде економично, затоа што во провинцијата е концентрирана една четвртина од кинеските резерви на јаглен.
Централите ќе обезбедуваат струја за источниот економски центар Шангај и за провинцијата Џангсу. Секоја година ќе испорачуваат по 72.000 гигават часови електрична енергија, од кои 60% ќе бидат генерирани од обновливи извори.
Централата наменета за за Шангај ќе има капацитет за генерирање 8 гигавати од сончева енергија, 4,5 од ветер и 2,6 од јаглен. Комплексот ќе има и акумулатори на струја од 9 гигават-часови. Централата за Џангсу ќе произведува нешто помалку струја од ветер и ќе има помал капацитет за складирање енергија.
Овој проект значително ќе ја унапреди трансформацијата на енергетската структура, ќе ги поддржи напорите за заштеда на енергија и ќе придонесе за намалување на емисиите низ источна Кина. Тој ќе ја подобри регионалната распределба на висококвалитетни енергетски ресурси и ќе обезбеди безбедност на снабдувањето со електрична енергија и стабилност на мрежата, објавија регионалните власти.
Глобалната група за енергетски анализи Ембер проценува дека Кина стратешки го пренаменува јагленот од основен генератор на струја во поддршка за стабилноста на мрежата и дека може да ја заврши трансформацијата за две години.
Во исто време Кина веќе инсталирала речиси една половина од сите батериски складишта на струја во светот, што ѝ овозможува да ја надмине главната слабост на обновливите извори – зависноста од временските услови.
